નાની ઉંમરમાં શાનદાર ફટકાબાજી કરનાર મુકુલ ચૌધરીને તેની વિસ્ફોટક બેટિંગનો પુરસ્કાર થોડા કલાકોમાં જ મળી ગયો, LSG એ ₹2.60 કરોડમાં પોતાની ટીમમાં સામેલ કર્યો.
રાજસ્થાનના ખેલાડીએ રંગ રાખ્યો
IPL 2026 મીની હરાજીમાં રાજસ્થાનના યુવા વિકેટકીપર-બેટ્સમેન મુકુલ ચૌધરીના ખરીદદારોમાં તીવ્ર સ્પર્ધા જોવા મળી હતી. લખનૌ સુપર જાયન્ટ્સે તેને ₹2.60 કરોડમાં પોતાની ટીમમાં સામેલ કર્યો. મુકુલની બેઝ પ્રાઈસ માત્ર ₹30 લાખ હતી, પરંતુ બોલી લડાઈમાં તેની કિંમત ઝડપથી વધી ગઈ. નોંધનીય છે કે, મુકુલ ચૌધરીએ થોડા કલાકો પહેલા જ ભારતીય ઘરેલુ ટુર્નામેન્ટ, સૈયદ મુશ્તાક અલી ટ્રોફીમાં ધમાકેદાર ઇનિંગ્સ રમી હતી.
લખનૌ સુપર જાયન્ટ્સે મેદાન માર્યું
રાજસ્થાન રોયલ્સે મીની હરાજીમાં મુકુલ ચૌધરી માટે બોલી ખોલી, ત્યારબાદ મુંબઈ ઇન્ડિયન્સે બોલી લગાવી. મુંબઈએ 95 લાખ સુધી બોલી લગાવી, પરંતુ પછી પીછેહઠ કરી. ત્યારબાદ, લખનૌ સુપર જાયન્ટ્સે મેદાનમાં ઉતર્યું અને મુકુલને હરાજીમાં 2.60 કરોડમાં ખરીદ્યો. આનાથી 16 ડિસેમ્બરનો દિવસ મુકુલ ચૌધરી માટે યાદગાર બની ગયો.
ઘરેલુ ટુર્નામેન્ટમાં કર્યું શાનદાર પ્રદર્શન
સૈયદ મુશ્તાક અલી ટ્રોફીમાં, તેણે મુંબઈ સામે માત્ર 28 બોલમાં અણનમ 54 રનની વિસ્ફોટક ઇનિંગ રમી હતી. 192.85ના નોંધપાત્ર સ્ટ્રાઇક રેટથી બેટિંગ કરતા, તેણે 4 ચોગ્ગા અને 3 છગ્ગા ફટકાર્યા. આ જ ટુર્નામેન્ટમાં, તેણે દિલ્હી સામે 26 બોલમાં અણનમ 62 રનની ધમાકેદાર ઇનિંગ પણ રમી હતી. આ પ્રદર્શને ફ્રેન્ચાઇઝીઓનું ધ્યાન ખેંચ્યું અને તેની કિંમતમાં નોંધપાત્ર વધારો કર્યો.
આ પણ વાંચો: IPL 2026 Auction: IPL 2026ની હરાજીમાં આ ભારતીય ખેલાડીને થયું થયુ ₹16.75 કરોડનું નુકસાન
