- ગ્લોબલ ફાયર પાવર ઈન્ડેક્સમાં ઈરાન શક્તિના સંદર્ભમાં 14મા ક્રમે
- સેજીલ ઈરાનની સૌથી ઘાતક મિસાઈલ કે જે ઘન ઈંધણથી ચાલે છે
- ખોરમશહર – 4 મિસાઈલ જે મધ્યમ અંતરની બેલેસ્ટિક મિસાઈલ
ઈરાન અને ઈઝરાયલ વચ્ચેનો તણાવ ખતરનાક તબક્કે પહોંચી ગયો છે. તાજેતરમાં જ લેબનોનથી ઈરાન સમર્થિત હિઝબુલ્લા જૂથે ઈઝરાયેલ તરફ લગભગ 40 મિસાઈલો છોડી છે. વોલ સ્ટ્રીટ જર્નલના રિપોર્ટમાં દાવો કરવામાં આવ્યો છે કે ઈરાન આગામી 24 થી 48 કલાકમાં ઈઝરાયેલ પર પણ હુમલો કરી શકે છે. બંને દેશોની સેનાઓ એલર્ટ પર છે. મળતી માહિતી મુજબ આ હુમલો ઈઝરાયલની સીમામાં થઈ શકે છે.
ઈરાને ઈઝરાયલ પર હુમલો કરવાની ચેતવણી આપી
ઈરાન માને છે કે ઈરાની દૂતાવાસ પર તાજેતરમાં થયેલા હુમલા માટે ઈઝરાયલ જવાબદાર છે. આ હુમલામાં ઈરાનના ઈસ્લામિક રિવોલ્યુશનરી ગાર્ડ કોર્પ્સના કમાન્ડરો અને સભ્યો માર્યા ગયા હતા. આ ઘટનાના જવાબમાં ઈરાને ઈઝરાયલ પર હુમલો કરવાની ચેતવણી આપી હતી. સમાચાર એ છે કે તે થોડા કલાકોમાં પોતાની રણનીતિને અંજામ આપી શકે છે. આ દરમિયાન, ચાલો જાણીએ કે ઈરાન પાસે એવી કઈ મિસાઈલ છે જે ઈઝરાયેલ માટે ખતરો બની શકે છે.
ગ્લોબલ ફાયર પાવર ઈન્ડેક્સમાં ઈરાન સૈન્ય શક્તિના સંદર્ભમાં 14મા ક્રમે
ગ્લોબલ ફાયર પાવર ઈન્ડેક્સમાં ઈરાન સૈન્ય શક્તિના સંદર્ભમાં 14મા ક્રમે છે. એક રિપોર્ટ અનુસાર, ઈરાન પોતાના ક્ષેત્રમાં સૌથી વધુ બેલેસ્ટિક મિસાઈલો ધરાવતો દેશ છે. તેહરાનના હથિયારોમાં મિસાઈલ ખૂબ જ મહત્વપૂર્ણ છે. ઈરાનની ISNA ન્યૂઝ એજન્સીએ દાવો કર્યો છે કે તેમની પાસે આવી 9 મિસાઈલ છે જે ઈઝરાયેલ પર હુમલો કરવામાં સક્ષમ છે. આમાં કેટલીક એવી મિસાઈલ છે જે અમેરિકા અને ઈઝરાયેલની એન્ટી-બેલિસ્ટિક મિસાઈલ સિસ્ટમમાં પ્રવેશ કરી શકે છે.
સેજીલ ઈરાનની સૌથી ઘાતક મિસાઈલ
સેજીલ ઈરાનની સૌથી ઘાતક મિસાઈલોમાંથી એક છે. તે ઘન ઈંધણ પર ચાલતી મધ્યમ રેન્જની બેલેસ્ટિક મિસાઈલ છે. તેની રેન્જ 2000-2500 કિલોમીટર હોવાનું કહેવાય છે. તે 700 કિલો વજનના હેવી વોરહેડને ધ્વનિના અવાજ કરતા અનેકગણી વધુ ઝડપે લઈ જઈ શકે છે. કારણ કે સેજીલ મિસાઈલ ઘન ઈંધણ પર ચાલે છે, તેને લોન્ચ કરવામાં વધુ સમય નથી લાગતો અને તેને એક જગ્યાએથી બીજી જગ્યાએ લઈ જવામાં પણ સરળ છે.
ખોરમશહર 4 મિસાઈલ મધ્યમ અંતરની બેલેસ્ટિક મિસાઈલ
ખોરમશહર-4 મિસાઈલ મધ્યમ અંતરની બેલેસ્ટિક મિસાઈલ છે. ખોરમશહર મિસાઈલની આ ચોથી પેઢી છે. સેજીલની તુલનામાં, તે બમણું વજન એટલે કે 1,500 કિલો વજન ઉપાડી શકે છે. તે વાતાવરણની બહાર અવાજ કરતા 16 ગણી ઝડપે ઉડી શકે છે. તેની મહત્તમ જાહેર કરેલ રેન્જ 2000 કિમી છે. તેને ખૈબર તરીકે પણ ઓળખવામાં આવે છે.
શહાબ 3 મધ્યમ અંતરની લિક્વિડ ઈંધણ સંચાલિત બેલેસ્ટિક મિસાઈલ
શહાબ 3 મધ્યમ અંતરની લિક્વિડ ઈંધણ સંચાલિત બેલેસ્ટિક મિસાઈલ છે. તેની મહત્તમ રેન્જ 1,3000 કિમી અને સ્પીડ મેક 7 છે. સીએસઆઈએસ (સેન્ટર ફોર સ્ટ્રેટેજિક એન્ડ ઈન્ટરનેશનલ સ્ટડીઝ)ના અહેવાલ મુજબ, આ ઈરાનની પ્રથમ સફળ મધ્યમ-અંતરની બેલેસ્ટિક મિસાઈલ હતી, જે તેને તેની સરહદો જેમ કે, ઈઝરાયલની બહારના લક્ષ્યોને ધમકી આપવાની ક્ષમતા આપે છે. આ મિસાઈલ 2003 થી સેવામાં છે અને કહેવાય છે કે તે ઉત્તર કોરિયાની નો ડોંગ 1 મિસાઈલ પર આધારિત છે.
ઈમાદ મિસાઈલને નિયંત્રિત કરીને લક્ષ્ય સુધી લઈ જઈ શકાય
ઈરાને શહાબ-3 મિસાઈલના અલગ-અલગ પ્રકારો બનાવ્યા છે. તેનું એક પ્રકાર ઇમાદ મિસાઇલ છે. ઈરાનના રક્ષા મંત્રીએ 2015માં કહ્યું હતું કે ઈમાદ ઈરાનની પહેલી મિસાઈલ છે જેને નિયંત્રિત કરી શકાય છે અને તેના લક્ષ્ય સુધી લઈ જઈ શકાય છે. CSIS મુજબ, ઈમાદની રેન્જ 1,700 કિલોમીટર, 500 મીટરની ચોકસાઈ અને 750 કિલોગ્રામની પેલોડ ક્ષમતા છે.
ગદર મિસાઈલ પ્રવાહી ઇંધણ પર ચાલે છે
ગદર મિસાઈલ ઈરાનની શહાબ-3 મિસાઈલનું એક પ્રકાર છે. આ એક મધ્યમ અંતરની મિસાઈલ છે. તેને ગદર-101 અને ગદર-110 પણ કહેવામાં આવે છે. તેની રેન્જ 2,000 કિલોમીટરથી ઓછી છે. તે પહેલાથી જ ઈમાદ મિસાઈલની સેવામાં છે. ગદર પણ પ્રવાહી ઇંધણ પર ચાલતી મિસાઇલ છે.
હજ કાસિમ મધ્યમ રેન્જની બેલેસ્ટિક મિસાઈલની રેન્જ 1,400 કિમી
હજ કાસિમ એક મધ્યમ રેન્જની બેલેસ્ટિક મિસાઈલ છે અને તેની રેન્જ 1,400 કિમી છે અને તે 500 કિલોગ્રામનું પેલોડ લઈ જઈ શકે છે. ઓગસ્ટ 2020 માં તેનું અનાવરણ કરવામાં આવ્યું હતું. હજ કાસિમ મિસાઈલનું નામ કુદ્સ ફોર્સના કમાન્ડર કાસિમ સુલેમાનીના નામ પરથી રાખવામાં આવ્યું છે. કાસિમ સુલેમાની ચાર વર્ષ પહેલા બગદાદમાં અમેરિકી ડ્રોન હુમલામાં માર્યા ગયા હતા. કથિત રીતે ડિફેન્સ સિસ્ટમ આ મિસાઈલને પકડી શકતી નથી.
ઈરાનની પાવેહ નામની લાંબા અંતરની ક્રૂઝ મિસાઈલ
ગત વર્ષે ઈરાને પાવેહ નામની લાંબા અંતરની ક્રૂઝ મિસાઈલ દુનિયા સમક્ષ રજૂ કરી હતી. તેની રેન્જ 1650 કિમી અને સ્પીડ 600-900 કિમી પ્રતિ કલાક હોવાનું કહેવાય છે. તેની પહોંચ ઇઝરાયલ સુધી વિસ્તરેલી છે. ક્રુઝ મિસાઈલ હોવાના કારણે તે અન્ય મિસાઈલોથી અલગ છે. પ્રક્ષેપિત થયા પછી, બેલેસ્ટિક મિસાઈલ નિશ્ચિત માર્ગ પર આગળ વધતી રહે છે. જ્યારે ક્રુઝ મિસાઈલને લોન્ચ કર્યા પછી પણ નિયંત્રિત કરી શકાય છે.
ફતહ-2 હાઇપરસોનિક ક્રૂઝ મિસાઇલની રેન્જ 1,400 કિમી
ફતહ-2 હાઇપરસોનિક ક્રૂઝ મિસાઇલની રેન્જ 1,400 કિમીથી વધુ છે અને તે મેક 13ની ઝડપે ઉડી શકે છે. સંરક્ષણ પ્રણાલીઓને ટાળવા માટે તે ઝડપથી ચાલુ થઈ શકે છે. દાવો કરવામાં આવે છે કે તે અમેરિકા અને ઈઝરાયેલની એન્ટી બેલેસ્ટિક મિસાઈલ સિસ્ટમમાં પણ પ્રવેશ કરી શકે છે. અહેવાલો અનુસાર, ફતહ-2માં બેલેસ્ટિક મિસાઈલ મોટર અને રી-એન્ટ્રી વ્હીકલનો સમાવેશ થાય છે, જે બોઈંગની X-51 વેવરાઈડર પ્રયોગ ક્રુઝ મિસાઈલ જેવું લાગે છે.
ખૈબર શકન ઈરાનના ઈસ્લામિક રિવોલ્યુશનરી ગાર્ડ કોર્પ્સ દ્વારા સંચાલિત મિસાઈલ
ખૈબર શકન એ ઈરાનના ઈસ્લામિક રિવોલ્યુશનરી ગાર્ડ કોર્પ્સ દ્વારા સંચાલિત મધ્યમ અંતરની બેલેસ્ટિક મિસાઈલ છે. મિસાઈલની રેન્જ 1,450 કિમી છે. તે 5000 કિમી પ્રતિ કલાકની ઝડપે ટાર્ગેટને હિટ કરી શકે છે. તે ઘન ઇંધણનો ઉપયોગ કરે છે અને સંરક્ષણ પ્રણાલીને ડોજ કરવામાં સક્ષમ છે. તેના લોન્ચિંગની તૈયારીમાં વધારે સમય નથી લાગતો.
