- ઈરાન દ્વારા ઇઝરાયલનું માલવાહક જહાજ કબજે કર્યાનો દાવો
- ઇઝરાયલના વિદેશ મંત્રીએ ટ્વિટ કરીને જહાજને લઈને આપી માહિતી
- “ઈરાની નૌસેનાએ પોર્ટુગીઝ નાગરિક માલવાહક જહાજ કબજે કર્યું”
મિડલ ઈસ્ટમાં વધતા તણાવ વચ્ચે, ઈરાનના રિવોલ્યુશનરી ગાર્ડ્સે શનિવારે 13 એપ્રિલના રોજ યુએઈના દરિયાકાંઠે ઈરાનના અખાતમાં ઈઝરાયેલ સાથે જોડાયેલા એક કન્ટેનર જહાજને જપ્ત કર્યું હતું. ઈરાન દ્વારા આ જહાજને જપ્ત કરવાની જાહેરાત બાદ ઈઝરાયેલી સેનાએ પરિણામ ભોગવવાની ચેતવણી આપી છે.
‘પોર્ટુગીઝનું જહાજ પકડાયું’
ઈરાનના રિવોલ્યુશનરી ગાર્ડ્સે દાવો કર્યો છે કે તેઓએ ઈઝરાયેલનું એક કન્ટેનર જહાજ કબજે કર્યું છે. દરમિયાન ઈઝરાયેલના વિદેશ મંત્રી કાત્ઝે દાવો કર્યો છે કે ઈરાન દ્વારા કબજે કરવામાં આવેલ જહાજ ઈઝરાયેલનું નથી. તેમણે કહ્યું કે ઈરાનના રિવોલ્યુશનરી ગાર્ડ્સે પોર્ટુગીઝ નાગરિક માલવાહક જહાજને કબજે કર્યું છે.
કાર્ગો શિપ ઇઝરાયલનું નથી: વિદેશ મંત્રી
ઈઝરાયેલના વિદેશ મંત્રીએ દાવો કર્યો કે આ કાર્ગો જહાજ યુરોપિયન યુનિયનના સભ્યનું છે, જે ઈઝરાયેલનું હોવાનું કહેવામાં આવી રહ્યું છે. તેમણે ઉમેર્યું કે ઈરાનનું ખામેનેઇ શાસન એક અપરાધી છે, જે હમાસના ગુનાઓને સમર્થન આપે છે. તેમણે કહ્યું કે હવે ઈરાન આંતરરાષ્ટ્રીય કાયદાનું ઉલ્લંઘન કરી રહ્યું છે અને ચાંચિયાઓની જેમ હુમલા કરી રહ્યું છે.
ઓમાનની ખાડીમાં ઈરાનની કાર્યવાહી
જણાવવામાં આવી રહ્યું છે કે ઈરાનની નૌસેનાએ હોર્મુઝ સ્ટ્રેટની નજીક ઓમાનની ખાડીમાં આ કાર્યવાહી કરી છે. પહેલા ઈઝરાયેલના જહાજ પર હેલિકોપ્ટર દ્વારા હુમલો કરવામાં આવ્યો અને ત્યારબાદ ઈરાની નૌસેનાએ જહાજ પર કબજો કરી લીધો હતો. જાણવા મળી રહ્યું છે કે આ જહાજ ઈઝરાયેલના અબજોપતિ ઈયલ ઑફરના જોડિયાક ગ્રુપ સાથે સંકળાયેલું છે. જો કે આ અંગે હજુ સુધી તેમની તરફથી કોઈ ટિપ્પણી આવી નથી.
છેલ્લે દુબઈથી હોર્મુઝ તરફ જતું જોવા મળ્યું હતું જહાજ
સુરક્ષા દળોએ એમઆઈ-17 હેલિકોપ્ટર દ્વારા જહાજ પર હુમલો કરવામાં આવ્યો હતો, તેનો ઉપયોગ અગાઉ ઈરાન સમર્થિત હૂતી બળવાખોરો દ્વારા પણ કરવામાં આવ્યો હતો. આ જહાજનું નામ MSC Aries છે અને તે છેલ્લે શુક્રવારે દુબઈથી હોર્મુઝ જતા જોવા મળ્યું હતું. અહેવાલ છે કે જહાજે તેના ટ્રેકિંગ ડેટાને સ્વિચ ઓફ કરી દીધો હતો. આ વિસ્તારમાંથી પસાર થતી વખતે ઇઝરાયેલી જહાજો ઘણીવાર ટ્રેકિંગ ડેટા બંધ કરી દે છે.
