- ઈઝરયલ IB ચીફે રાજીનામામાં ‘આ પીડા મારી સાથે હંમેશા રહેશે’નો ઉલ્લેખ કર્યો
- ગુપ્તચર વિભાગની બેદરકારીની જવાબદારી આઈબી વડાએ સ્વીકારી
- હમાસ અને ઈઝરાયલ વચ્ચે આશરે પોણા સાત મહિનાથી યુદ્ધ યથાવત્
ઇઝરાયેલ પર હમાસના હુમલાને નિષ્ફળ ગણીને ઈઝરાયેલની સેનાના ગુપ્તચર વિભાગના વડા મેજર જનરલ અહારોન હલીવાએ પોતાના પદ પરથી રાજીનામું આપી દીધું છે. હમાસના હુમલાને રોકવામાં સક્ષમ ન હોવાની જવાબદારી લેતા મેજર જનરલ હલિવાએ પદ છોડ્યું. ઉલ્લેખનીય છે કે ઈઝરાયેલમાં હમાસના હુમલા બાદ ટોચના સ્તરે આ પ્રથમ રાજીનામું છે અને માનવામાં આવી રહ્યું છે કે આગામી દિવસોમાં અન્ય ઘણા ટોચના અધિકારીઓ અને નેતાઓ પણ રાજીનામું આપી શકે છે.
હમાસના હુમલાને ન રોકવાની જવાબદારી લીધી
હમાસે ગયા વર્ષે 7 ઓક્ટોબરે ઈઝરાયેલ પર હુમલો કર્યો હતો. હમાસના હુમલામાં ઈઝરાયેલમાં 1200 લોકો માર્યા ગયા હતા અને 250 લોકોને હમાસના આતંકવાદીઓએ બંધક બનાવ્યા હતા. હમાસના હુમલા બાદ જ ઈઝરાયેલે ગાઝા પર હુમલો કર્યો અને હવે ગાઝા યુદ્ધને સાત મહિના વીતી ગયા છે. ઇઝરાયેલના હુમલાને કારણે ગાઝામાં 30 હજારથી વધુ લોકોના મોત થયા છે અને ગંભીર માનવતાવાદી સંકટ સર્જાયું છે. પોતાનું પદ છોડતી વખતે, મેજર જનરલ હારોન હલિવાએ તેમના રાજીનામામાં લખ્યું હતું કે ‘મારા નેતૃત્વ હેઠળ ગુપ્તચર વિભાગ તેની જવાબદારીઓનું પાલન કરી શક્યું નથી. એ અંધકારમય દિવસનું દર્દ આજે પણ મારી સાથે છે અને હંમેશા મારી સાથે રહેશે.
ઈઝરાયલી સેનાએ રાજીનામું સ્વીકાર્યું
હમાસના હુમલા પછી તરત જ, હલીવાએ હુમલાને રોકવામાં નિષ્ફળ રહેવાની જવાબદારી લીધી. જો કે, હલીવાએ તે સમયે રાજીનામું આપ્યું ન હતું. મેજર જનરલ હલિવાનું રાજીનામું સ્વીકારી લેવામાં આવ્યું છે અને ઇઝરાયલી સેનાના વડાએ તેમની સેવાઓ માટે મેજર જનરલ હલિવાનો આભાર માન્યો છે. હમાસ દ્વારા કરવામાં આવેલા હુમલા બાદથી ઈઝરાયેલ યુદ્ધમાં ફસાઈ ગયું છે. હમાસની સાથે સાથે લેબનીઝ સંગઠન હિઝબુલ્લાહ સાથે પણ ઈઝરાયેલનો તણાવ વધી રહ્યો છે. ઈઝરાયેલનો ઈરાન સાથે ભૂતકાળમાં પણ તણાવ રહ્યો છે.
