સુરતથી અમદાવાદ આવતા મુસાફરો ચેતી જજો, લૂંટારાઓ સક્રિય થયા

પોલીસ સૂત્રો દ્વારા પ્રાપ્ત થતી વિગતો મુજબ મૂળ રાજસ્થાનના ઝાલોરના વતની અને સુરતમાં ઇચ્છાપોર જયરાજ સોસાયટી ઘર નં.જે/12 માં રહેતા 38 વર્ષીય વાલ્મીકભાઈ ચંદનભાઈ મહેશ્વરી ઈચ્છાપોરમાં માધવ પ્લાસ્ટીકના નામે તાડપત્રીનો વેપાર કરે છે. વાલ્મીકભાઈ અમદાવાદ ખાતે રામાપીરની બીજ ભરવા માટે ગયા હતા અને ત્યાં મણિનગર ખાતે સંબંધીને મળી રાત્રે લક્ઝરી બસમાં સુરત પરત ફરતા હતા ત્યારે બાજુમાં બેસેલા 40 થી 45 વર્ષના અજાણ્યાએ મુસાફરી દરમિયાન વિશ્વાસમાં લીધા હતા. ત્યાર બાદ પાલેજ નજીક ન્યુ ક્ષમા હોટલ પાસે બસ થોભી ત્યારે તે અજાણ્યાએ તેમને પારલેજી બિસ્કીટ ખવડાવતા તે બેભાન થઈ ગયા હતા. બીજા દિવસે સવારે બસ વરાછા રેશમભવનના પાર્કીંગમાં પહોંચી ત્યારે તે બેભાન મળતા તેમને સારવાર માટે હોસ્પિટલમાં દાખલ કર્યા હતા.