જોય ઓફ ગિવિંગ અભિયાન થકી માનવતાની મહેંક પ્રસરાવી
શાળાના વાલીઓએ ગરમ કપડા, ધાબળા, રમકડાનું દાન કર્યુ
અગ્ર ગુજરાત, રાજકોટ
નવા વર્ષની ઉજવણી માત્ર ફટાકડા કે મિષ્ટાન્ન પૂરતી મર્યાદિત ન રહેતા, કોઈના જીવનમાં ઉજાસ પાથરવાનું નિમિત્ત બને તેવા ઉમદા હેતુ સાથે ડોલ્સ એન ડ્યુડ્સ પ્રી-સ્કૂલ અને મેંગોપીપલ પરિવાર દ્વારા “જોય ઓફ ગિવિંગ” અભિયાનનું સુંદર આયોજન કરવામાં આવ્યું હતું.
આ પહેલ અંતર્ગત ડોલ્સ એન ડ્યુડ્સ પ્રી-સ્કૂલ ખાતે એક ખાસ ‘ડ્રોપ બોક્સ’ રાખવામાં આવ્યું હતું. જેમાં શાળાના વાલીઓએ ખુલ્લા હાથે ગરમ કપડાં, ધાબળા અને રમકડાંનું દાન કર્યું હતું. મેંગોપીપલ પરિવાર દ્વારા શિયાળાની કકડતી ઠંડીમાં ઝૂંપડપટ્ટી વિસ્તારના જરૂરિયાતમંદ પરિવારો અને બાળકો સુધી આ વસ્તુઓ પહોંચાડીને સંસ્થાએ હૂંફ અને સ્મિત ફેલાવવાનું કાર્ય કર્યું છે. આ ઉપરાંત, કરુણાના પ્રતીક રૂપે શાળા દ્વારા નાનકડો ચેક પણ અર્પણ કરવામાં આવ્યો હતો.
ઉલ્લેખનીય છે કે, મેંગોપીપલ પરિવાર છેલ્લા ૧૨ વર્ષથી સ્લમ વિસ્તારના બાળકોના શિક્ષણ અને સર્વાંગી વિકાસ માટે અવિરત કાર્યરત છે. સંસ્થા દ્વારા બાળકોને નિઃશુલ્ક શિક્ષણની સાથે પૌષ્ટિક નાસ્તો અને જ્ઞાન સાથે ગમ્મત પીરસવામાં આવે છે. સાથે જ, ‘પ્રોજેક્ટ મુસ્કાન’ દ્વારા છેલ્લા ૮ વર્ષથી રાજકોટ, જામનગર, વાંકાનેર અને મોરબી જેવા શહેરોમાં જરૂરિયાતમંદ દીકરીઓને દર મહિને નિઃશુલ્ક સેનેટરી પેડ્સ અને અંડરગારમેન્ટ્સ પહોંચાડવાનું ભગીરથ કાર્ય પણ કરવામાં આવે છે.
આ અભિયાનને સફળ બનાવવા માટે શાળાના ટ્રસ્ટીઓ, સ્ટાફ, વાલીગણ અને મેંગોપીપલ પરિવારના સભ્યોએ પૂરા દિલથી સહયોગ આપ્યો હતો. સંસ્થાના પ્રતિનિધિઓએ જણાવ્યું હતું કે, અમારી સંસ્થાની ટેગલાઈન છે કે “ચાલો સાથે મળીને કોઈના સ્મિતનું કારણ બનીએ.”
સંપર્ક અને સહયોગ માટે જો આપ પણ આ સેવાયજ્ઞમાં જોડાવવા માંગતા હોવ અથવા સહયોગ આપવા ઈચ્છતા હોવ તો મનીષ રાઠોડ અને રૂપલ રાઠોડ (મોબાઈલ: ૯૨૭૬૦૦૭૭૮૬) પર સંપર્ક સાધવા એક યાદીમાં જણાવાયું છે.
