ગુજરાત હાઈકોર્ટના જાહેરનામા મુજબ તાત્કાલિક અસરથી વિવિધ અદાલતોમાં હોદ્દામાં ફેરફાર
અગ્ર ગુજરાત, રાજકોટ
રાજકોટ જિલ્લાના ન્યાયિક તંત્રમાં મહત્વપૂર્ણ ફેરફાર કરવામાં આવ્યા છે. ગુજરાત હાઈકોર્ટ દ્વારા તારીખ 5 જાન્યુઆરી, 2026ના રોજ પ્રસિદ્ધ કરાયેલા સત્તાવાર જાહેરનામા મુજબ રાજકોટ જિલ્લાના વિવિધ અદાલતોમાં ફરજ બજાવતા કુલ 10 ન્યાયાધીશોની આંતરિક બદલી કરવામાં આવી છે. આ તમામ બદલીઓ તાત્કાલિક અસરથી અમલમાં આવી ગઈ છે.
જાહેરનામા અનુસાર, રાજકોટમાં ચોથા એડિશનલ ડિસ્ટ્રિક્ટ જજ તરીકે કાર્યરત તેજસ સુરેશકુમાર બ્રહ્મભટ્ટને હવે ત્રીજા એડિશનલ ડિસ્ટ્રિક્ટ જજ તરીકે નવી જવાબદારી સોંપવામાં આવી છે. જ્યારે ધોરાજી ખાતે પાંચમા એડિશનલ ડિસ્ટ્રિક્ટ જજ તરીકે ફરજ બજાવતા અલીહુસેન મોહિબુલ્લા શેખને ચોથા એડિશનલ ડિસ્ટ્રિક્ટ જજ (ધોરાજી) તરીકે બદલી કરવામાં આવી છે.
ગોંડલ ખાતે છઠ્ઠા એડિશનલ ડિસ્ટ્રિક્ટ જજ તરીકે સેવા આપતા હેમાંગ અશ્વિનભાઈ ત્રિવેદીને પાંચમા એડિશનલ ડિસ્ટ્રિક્ટ જજ (ગોંડલ) તરીકે નિયુક્ત કરવામાં આવ્યા છે. રાજકોટના સાતમા એડિશનલ ડિસ્ટ્રિક્ટ જજ તરીકે ફરજ બજાવતા ઈકરામખાન બસીરખાન પઠાણને હવે છઠ્ઠા એડિશનલ ડિસ્ટ્રિક્ટ જજ તરીકે જવાબદારી સોંપાઈ છે.
આ સાથે, આઠમા એડિશનલ ડિસ્ટ્રિક્ટ જજ અશ્વિનકુમાર કેશવલાલ શાહને સાતમા એડિશનલ ડિસ્ટ્રિક્ટ જજ તરીકે બદલી કરવામાં આવી છે. જેતપુર ખાતે નવમા એડિશનલ ડિસ્ટ્રિક્ટ જજ તરીકે કાર્યરત સુરેશચંદ્ર પુરાણીને હવે આઠમા એડિશનલ ડિસ્ટ્રિક્ટ જજ (જેતપુર) તરીકે નિયુક્ત કરવામાં આવ્યા છે.
રાજકોટના દસમા એડિશનલ ડિસ્ટ્રિક્ટ જજ વસંતકુમાર કાંતિલાલ ભટ્ટને નવમા એડિશનલ ડિસ્ટ્રિક્ટ જજ તરીકે બદલી આપવામાં આવી છે. અગિયારમા એડિશનલ ડિસ્ટ્રિક્ટ જજ સલીમ અબ્દુલ્લા ગલારિયાને હવે દસમા એડિશનલ ડિસ્ટ્રિક્ટ જજ, રાજકોટ તરીકે ફરજ સોંપાઈ છે.
તે જ રીતે, બારમા એડિશનલ ડિસ્ટ્રિક્ટ જજ પ્રિતેશ જગદીશચંદ્ર કાયસ્થને અગિયારમા એડિશનલ ડિસ્ટ્રિક્ટ જજ તરીકે નિયુક્ત કરાયા છે, જ્યારે તેરમા એડિશનલ ડિસ્ટ્રિક્ટ જજ ચેતના જયંતીલાલ પટેલને રાજકોટના બારમા એડિશનલ ડિસ્ટ્રિક્ટ જજ તરીકે બદલી કરવામાં આવી છે. આ આંતરિક બદલીથી રાજકોટ જિલ્લાના ન્યાયિક કામકાજમાં વધુ સુવ્યવસ્થા અને કાર્યક્ષમતા વધશે તેવી અપેક્ષા વ્યક્ત કરવામાં આવી રહી છે.
