કડી શહેરમાં વૃદ્ધ વેપારીને પોલીસની ખોટી ઓળખ આપી અપહરણ કરી રૂ.50 લાખની ખંડણી માંગી હતી અને જો વૃદ્ધ વેપારી પૈસા નહી આપે તો બળાત્કારના કેસમાં ફ્સાવી દેવાની ધમકી આપી હતી. જેના પગલે વૃદ્ધ વેપારીએ કડી પોલીસ મથકે ગુનો નોંધાવતા પોલીસે વધુ તપાસ હાથ ધરી છે.
પ્રાપ્ત માહિતી અનુસાર કડીના ચિંતન એવન્યુમાં રહેતા વિનુભાઈ પટેલ (વેપારી) 2 ડિસેમ્બરે પૂજાજી ઠાકોર નામના વ્યક્તિએ ફોન ઉપર છત્રાલ ખાતે 12.15 વીઘા જમીન વેચવાની વાત કરતા વિનુભાઈ પટેલ જમીન જોવા ગયા હતા.જમીન જોઈને વિનુભાઈ પોતાની એક્સેસ ઉપર કડી ખાતે પરત ફરી રહ્યા હતા. તે સમયે રસ્તામાં અણખોલ પાટિયા પાસે એક ગાડી વિનુભાઇના એક્સેસ આગળ આવી ઊભી રાખી ગાડીમાંથી અજાણ્યા શખ્સો ઉતરી પોલીસ તરીકેની ઓળખ આપી વિનુભાઈને ગાડીમાં બેસાડી છત્રાલ તરફ્ ગાડી ભગાડી મૂકી હતી. તે સમયે અપહરણકર્તાઓની ગાડીમાં પહેલીથી મોઢું બાંધી એક યુવતી બેઠી હતી. જેને છત્રાલ ખાતે ઉતારી અપહરણકર્તાઓએ ગાડી નારદીપુર ખાતે લઈ ગયા હતા. ત્યાં વિનુભાઈને પોકસો અને બળાત્કારના કેસમાં ફ્સાવી દેવાની ધમકી આપી માર મારી વિનુભાઈ પટેલ પાસે રૂ.50 લાખની ખંડણી માગી હતી.
જેથી વિનુભાઈ પટેલ અપહરણકર્તાઓને કરગરી રૂ.5 લાખ આપવા જણાવી રૂ.1 લાખ રોકડા આપતા અપહરણકર્તાઓ વિનુભાઈ પટેલને ઉતારી ફરાર થઈ ગયા હતા.અપહરણકર્તાઓ પાસેથી છૂટતા વિનુભાઈ પટેલ દીકરાને બોલાવી તાત્કાલિક કડી પોલીસ મથકે દોડી આવી પોલીસ સમક્ષ સમગ્ર હકિકત જણાવી અજાણ્યા શખ્સો વિરુદ્ધ પોલીસની ઓળખ આપી અપહરણ કરી લઈ જઈ બળાત્કારના કેસમાં ફ્સાવવાની ધમકી આપી રૂ.50 લાખની ખંડણી માગવા બાબતે ફરિયાદ નોંધાવતા કડી પોલીસે વૃદ્ધ વિનુભાઈ પટેલના નિવેદનના આધારે ફરિયાદ નોંધી વધુ તપાસ હાથ ધરી છે.
https://sandesh.com/maru-saher-maru-gaam
ગુજરાતના વધુ સમાચાર વાંચવા માટે ક્લિક કરો
