નાની નાની વાતોનું ધ્યાન રાખવાથી ગરમ કપડાનો રંગ,આકાર અને કદ જળવાઈ રહે છે
તમારા સ્વેટર,મોજાં, શાલ, જેકેટની યોગ્ય કાળજી નહિ રાખો તો તેની ગુણવત્તા ઘટી શકે છે.
શિયાળાનો રંગ હવે બરાબર દેખાઈ રહ્યો છે.ઠંડી પડતા જ ગરમ કપડાં વોર્ડરોબમાંથી બહાર આવી જાય છે.શિયાળાના દિવસોમાં ગરમ કપડાંની યોગ્ય કાળજી લેવી જરૂરી છે.જો યોગ્ય કાળજી રાખવામાં આવે તો ગરમ કપડાં નવા જેવા જ દેખાય છે અને લાંબો સમય ચાલે છે. વૂલન ક્લોથ્સ ખૂબ જ નાજુક અને સોફ્ટ હોય છે. આવી સ્થિતિમાં, તેમને સાફ કરતી વખતે એક્સ્ટ્રા કેર કરવી જરૂરી છે. જો તમે તમારા સ્વેટર, વૂલન મોજાં, શાલ, જેકેટને યોગ્ય રીતે સાફ નહિ કરો તો તેની ગરમાવો રાખવાની ક્ષમતા ઘટી શકે છે. ગરમ કપડાની કાળજી રાખવા માટે અમુક નાની નાની બાબતોનું ધ્યાન રાખવું જરૂરી છે.
- ગરમ કપડાં આમ તો નોન એલર્જીક હોય છે પરંતુ જો તે કાપડ ખૂંચે કે ખંજવાળ આવે તો તેમાં લેનોલીન મિક્સ કરેલ હોવું જોઈએ.
- ગરમ કપડા માટે હેન્ડ વોશ કે મશીન વોશ કરતા ડ્રાય ક્લિનિંગ વધુ યોગ્ય હોય છે.આમ છતાં વોશિંગ ઇન્સ્ટ્રક્શન જોઈ લેવી જરૂરી છે.સુપર વોશ,મશીન વોશ કે પછી વોટર ટેમ્પ્રેચર 40 ° એવું લખેલ હોય છે.
- મશીનમાં વૂલન કપડા ધોવાનો વિકલ્પ હોય તો તેમાં જ ધોઈ લો. કેટલાક લોકો નોર્મલ કપડા ધોવાનું સેટિંગ કરીને તેમાં જ સ્વેટર, કોટ અને જેકેટ ધુએ છે જે બિલકુલ યોગ્ય નથી.
- ગરમ પાણીમાં ક્યારેય ગરમ કપડાં સાફ ન કરવા જોઈએ. ગરમ પાણીમાં ઊનના સ્વેટરને સાફ કરવાથી તેની ગુણવત્તા પર અસર પડે છે.
- માઈલ્ડ ડિશ વોશિંગ લિકવિડને પાણીમાં ઓગળી,ત્રણ ચાર મિનિટ પલળવા દો ત્યારબાદ એકદમ હળવા હાથે ઘસી લો.કડક બ્રશ ફેરવવું નહીં.ફરી હુંફાળા ગરમ પાણીમાં ધોઈ નાખો.
- ગરમ કપડાં પર શાકભાજી, મસાલા ચા કે બીજા કોઈ પણ ડાઘ પડી ગયા હોય તો તેને પહેલા હુંફાળા પાણીમાં પલાળી દો. તેમાં 1 ચમચી સ્પિરિટ ઉમેરો. તેને સારી રીતે ધોઈ લો અને ડાઘ દૂર થઈ જશે
- જો લિકવિડના બદલે પાવડર વાપરવો હોય તો હુંફાળા પાણીમાં પાવડરને સંપૂર્ણ ઓગળી જવા દો ત્યારબાદ ગરમ કપડાં પલાળો.
- ગરમ કપડાં ચોખ્ખા પાણીમાં ધોઈને વધુ નિચોવવા નહીં.પોલા હાથે નિચોવો અથવા નિતરવા દો.
- દોરી પર સુકાવવાના બદલે હેંગરમાં લગાવી દો. ગરમ કપડાને સુકાવતી વખતે ઉલ્ટા કરી નાખો.
- એકદમ જ સુકાવા દો અને સંપૂર્ણ સુકાઈ જાય પછી જ ઈસ્ત્રી કરો.
- વૂલન ક્લોથ્સ પર ક્યારેય નોર્મલ આયરન ન કરો. જો કે તેમને આયરન કરવાની જરૂર નથી, આમ છતાં જો ઈસ્ત્રી કરવી હોય તો હંમેશા સ્ટીમ આયરન કરો. જો તમારી પાસે સ્ટીમ આયરન ન હોય, તો નોર્મલ આયરન કરતા પહેલા સ્વેટર પર પાતળું સુતરાઉ કાપડ મૂકી
- એકદમ વજન ન દેતા હળવા હાથે ઈસ્ત્રી ફેરવો.ઈસ્ત્રી થઈ ગયા પછી એકદમ સરસ ઘડી કરીને કબાટમાં મુકવા.
- શિયાળો પૂરો થાય ત્યારે આ ગરમ કપડાં કબાટમાં ગોઠવવા સાથે ફીનાઇલની ગોળી મુકવી અથવા એક પાતળા કપડામાં લવિંગ અથવા કાળીજીરી બાંધીને મૂકી દેવી
આમ નાની નાની વાતોનું ધ્યાન રાખવાથી ગરમ કપડાનો રંગ,આકાર અને કદ જળવાઈ રહે છે.
