- આફ્રિકન દેશ કેન્યામાં મૂશળધાર વરસાદને લીધે મુસીબત સર્જાઈ
- પૂરમાં એક ડેમ તૂટી જતા નીચાણ વાળો વિસ્તાર જળમગ્ન થતા તબાહી
- વરસાદી પ્રકોપમાં હજી મોતનો આંક વધી શકે છે
આફ્રિકન દેશ કેન્યાના પશ્ચિમ વિસ્તારમાં એક ડેમ તૂટી પડવાને કારણે ઓછામાં ઓછા 40 લોકોનાં મોત થયા છે. આ અંગેની માહિતી કેન્યા પોલીસે આપી છે. પોલીસ અધિકારી સ્ટીફન કિરુઈએ આપી હતી. મળતી માહિતી અનુસાર, ડેમ તૂટ્યા બાદ પૂરના પાણી આસપાસના ઘરોમાં ઘુસી ગયા હતા અને મુખ્ય માર્ગની પહોંચ બંધ કરી દીધી હતી. પરિસ્થિતિ કાબૂ બહાર છે અને લોકોને મદદ પહોંચાડવાના પ્રયાસો ચાલુ છે.
કિજબે ડેમ તૂટી પડ્યો
પોલીસના જણાવ્યા અનુસાર, ગ્રેટ રિફ્ટ વેલી ક્ષેત્રના માઇ માહિયુ વિસ્તારમાં સ્થિત જૂના કિજાબે ડેમના ભંગાણ બાદ આ ઘટના સોમવારે સવારે બની હતી. ગ્રેટ રિફ્ટ વેલી ક્ષેત્રમાં અચાનક પૂરનું જોખમ રહેલું છે. ડેમ તૂટ્યા બાદ પાણી નીચે તરફ વહેવા લાગ્યું હતું. કેન્યામાં છેલ્લા કેટલાક દિવસોથી ભારે વરસાદને કારણે ઘણા વિસ્તારોમાં પૂરની સ્થિતિ છે. પૂરના કારણે અત્યાર સુધીમાં લગભગ 140 લોકોનાં મોત થઈ ચુક્યા છે.
કેન્યાના અનેક ભાગો પૂરના પાણીમાં
ઉલ્લેખનીય છે કે કેન્યામાં ભારે વરસાદે તબાહી મચાવી છે. ભારે વરસાદને કારણે દેશના ઘણા ભાગોમાં ભયંકર પૂરની સ્થિતિ સર્જાઈ છે, સ્થિતિ નિયંત્રણ બહાર થઈ ગઈ છે. એવું કહેવું ખોટું નહીં હોય કે કેન્યાનો લગભગ અડધો ભાગ હાલમાં પૂરની ઝપેટમાં છે. પૂરના કારણે લાખો લોકો પ્રભાવિત થયા છે. રસ્તાઓ, શેરીઓ અને લોકોના ઘરોમાં પણ પાણી ભરાઈ ગયા છે. રસ્તા પર અનેક જગ્યાએ વાહનો પાણીમાં ગરકાવ જોવા મળે છે. જનજીવન ખરાબ રીતે પ્રભાવિત થયું છે અને લોકો સુધી રાહત પહોંચી રહી નથી.
નૈરોબીમાં મુશ્કેલ પરિસ્થિતિ યથાવત્
કેન્યાની રાજધાની નૈરોબીમાં પૂરના કારણે ઘણા રસ્તાઓ બંધ થઈ ગયા છે અને ઘણા વિસ્તારોમાં પાણી ભરાઈ ગયા છે. નૈરોબીમાં સ્થિતિ ખૂબ જ મુશ્કેલ બની ગઈ છે, દરેક જગ્યાએ પાણી જ દેખાઈ રહ્યું છે. સરકાર રાહત અને બચાવ કાર્યમાં તમામ સંસાધનોનો ઉપયોગ કરી રહી છે પરંતુ સ્થિતિ નિયંત્રણ બહાર છે. સૌથી ચિંતાજનક બાબત એ છે કે હવામાનશાસ્ત્રીઓએ જૂન મહિના સુધી વરસાદની સંભાવના વ્યક્ત કરી છે. કેન્યામાં માર્ચ મહિનાથી વરસાદ પડી રહ્યો છે. પરંતુ હાલના દિવસોમાં ભારે વરસાદ લોકો માટે મુશ્કેલીનું કારણ બન્યો છે.
