ટ્રમ્પ પ્રશાસન દ્વારા ગેરકાયદેસર રીતે રોકાયેલા પ્રવાસીઓ વિરુદ્ધ સખત ઈમિગ્રેશન પોલીસી અને ઝડપથી દરોડા પાડ્યા બાદ લોસ એન્જેલિસમાં જે વિરોધ પ્રદર્શન થયુ તે ાખા અમેરિકામાં ફેલાઈ ગયુ છે. ન્યુયોર્ક, શિકાગો, અટલાન્ટા, ઓમાહા અને સિએટલ જેવા મુખ્ય શહેરોમાં લોકો રસ્તા પર ઉતરી આવ્યા છે. જે રીતની સ્થિતિ આખા દેશમાં સર્જાઈ છે તેને જોતા ટેક્સસ નેશનલ ગાર્ડના જવાનોને સૈન અંટોનિયોમાં નિયુક્ત કરવામાં આવ્યા છે.
એક તરફ રાષ્ટ્રપતિ ડોનાલ્ડ ટ્રમ્પ જરા પણ નમતુ મુકવાના મુડમાં નથી. તેમણે એલર્ટ જાહેર કર્યું છે કે તેમનું ધ્યાન ફક્ત લોસ એન્જેલિસ સુધી સિમિત નથી પણ ડોમેક્રેટિક શાસનવાળા અન્ય શહેરો અને રાજ્યોમાં પણ ગેરકાયદેસર પ્રવાસીઓ વિરુદ્ધની કાર્યવાહીને સખત કરવામાં આવશે. આ રાજ્યોમાં ફક્ત પ્રવાસીઓમાં જ ડરનો માહોલ નથી પણ નાગરિક અધિકાર સંગઠનો અને સામાન્ય જનતા વચ્ચે આઁદોલનો અને પ્રદર્શનની આશંકા વધી ગઈ છે. ટ્રમ્પ પ્રશાસનની આ નીતિને કારણે પહેલા પણ ઘણા સામાજીક અને રાજકીય વિવાદો સર્જાયા છે.
પીટીઆઈ પાસેથી મળતી માહિતી પ્રમાણે પોલીસે લોંસ એન્જેલિસ શહેરમાં લાગુ કરેલા કરફ્યૂ બાદ પહેલી રાતે 20થી વધુ લોકોની ધરપકડ કરવામાં આવી હતી. પોલીસ વિભાગે જણાવ્યું હતું કે કરફ્યૂ બીજી રાતે પણ યથાવત રહેશે. યુએસ પ્રમુખ ડોનાલ્ડ ટ્રમ્પની ઇમિગ્રેશન નીતિનો વિરોધ કરી રહેલા સેંકડો વિરોધીઓને વિખેરવા માટે ભીડ નિયંત્રણ હથિયારોનો ઉપયોગ કરવામાં આવ્યો હતો. જોકે, પોલીસ વિભાગના વડાએ જણાવ્યું હતું કે વિરોધીઓ સંપૂર્ણપણે તૈયાર થઈને આવે છે. તેમની પાસે રેડિયો કમ્યુનિકેશન છે.
14 જૂન ડોનાલ્ડ ટ્રમ્પ અને અમેરિકા બંને માટે ખાસ છે કારણકે આ દિવસે ડોનાલ્ડ ટ્રમ્પનો જન્મદિવસ હોય છે અને અમેરીકન સેનાનો 250મો જન્મદિવસ પણ હોય છે. આ અવસર માટે પરેડની તૈયારીઓ થઈ રહી છે. પરંતું આ દિવસે 1800 જગ્યાએ પ્રદર્શન થશે, જે ટ્રમ્પ પ્રશાસન માટે એક એલર્ટ હશે.
