- ભાજપના નેતાએ વહીવટ લઈને ખોટા બિલ્ડિંગ ઊભા કરવા બિલ્ડર્સને છૂટ આપી
- જાણે પાલિકાનો કોઈ ડર ન હોય તે રીતે કામ કરી રહ્યા છે
- બિલ્ડરને નોટિસ આપતા શાસક પક્ષના વજનદાર નેતા દ્વારા ચીફ ઓફિસરની બદલી કરી દેવાઈ
ડીસા નગરપાલિકા વિસ્તારમાં ગેરકાયદેસર અને મંજૂરી વગર બનતા શોપીંગનું કામ બંધ કરવા અને કાગળો રજૂ કરવા નોટિસ આપી છતાં બિંન્દાસ શોપીંગના કામો ચાલી રહ્યા છે અને જાણે પાલિકાનો કોઈ ડર ન હોય તે રીતે કામ કરી રહ્યા છે.ડીસા એ ઉત્તર ગુજરાત અને દક્ષિણ રાજસ્થાનનો વેપારી મથક ગણાય છે. જેથી ડીસામાં સતત વેપાર ધંધાનો વ્યાપ વધતા વાહનો પાર્ક કરવાની સમસ્યા ઉભી થઈ રહી છે. ત્યારે કેટલાક બિલ્ડર પોતાના સ્વાર્થ માટે પાર્કિંગની જગ્યા છોડવા વગર મસમોટા શોપીંગ ઉભા કરી રહ્યા છે. એના કારણે સતત ટ્રાફિકની સમસ્યા પણ સર્જાઈ રહી છે. ત્યારે ડીસાના પાટણ સ્ટેટ હાઈવે પર અને ડીસાના લાલ ચાલી રહેણાંક વિસ્તારમાં કેટલાક બિલ્ડર નકશા વિરૂદ્ધ તો કેટલાક મંજૂરી વગર શોપીંગ બાંધી રહ્યા છે. તો પાટણ હાઈવે પર સોસાયટીનું કોમન પ્લોટ પર દબાણ કરીને પણ બાંધકામ કરી રહ્યા છે. જેની ફરિયાદ નગરપાલિકા પાસે જતા નગરપાલિકાએ પાંચ શોપીંગને નોટિસ આપી બાંધકામને લગતા કાગળો રજૂ કરવા જણાવ્યું હતું. જેમાં કેટલાક બિલ્ડર્સે કાગળો રજૂ કર્યા છે તો કેટલાકએ રજૂ કર્યા નથી છતાં બાંધકામ ચાલુ રાખી જાણે કાયદાનો કે નોટિસનો ડર ન હોવાનું સ્થાપિત કરી રહ્યા છે. તો કેટલાક બિલ્ડર ચૂંટાયેલા ભાજપના નેતા સાથે બેઠક કરી તેના દ્વારા પાલિકાના ચીફ ઓફિસર પર દબાણ લાવી કામ ચાલુ કરાવવા જણાવ્યું હતું. જોકે નોટિસ આપ્યા ના ગણતરીના દિવસોમાં ચીફ ઓફિસરની બદલી થઈ જતા બિલ્ડરમાં ખુશી જોવા મળી હતી અને બિન્દાસ શોપીંગનું કામ શરૂ કર્યું હતું. ત્યારે બુધવારે જાગૃત નાગરિકો દ્વારા લાલ ચાલી વિસ્તારમાં ચાલી રહેલ બાંધકામ બાબતે રજૂઆત કરતા પાલિકા પ્રમુખે ટાઉન પ્લાનિંગની ટીમને મોકલી કામ બંધ કરાવ્યું હતું. તો પાટણ હાઈવે પરના બિલ્ડર્સ પણ શોપીંગના કામો ચાલુ રાખતા તેમને પણ બંધ કરવા સૂચના અપાઈ હતી. જોકે ડીસામાં પાલિકાની મિલીભગતથી વર્ષોથી ગેરકાયદેસર બાંધકામ થઈ રહ્યા છે. ત્યારે નવા પાલિકા પ્રમુખ સંગીતાબેન દવેએ આવા બાંધકામો પર અંકુશ લાવવા અને કાયદેસર બાંધકામ કરવા તેમજ આવા ગેરકાયદેસર બાંધકામ થતાં અટકાવવા કર્મચારીઓને પણ કડક સૂચના આપી છે.
