આફ્રિકન દેશ ઈથોપિયામાં એક મોટી દુર્ઘટના સર્જાઈ છે. અહીં ટ્રક પુલ પરથી નદીમાં નીચે ખાબકતા ઓછામાં ઓછા 66 લોકોના મોત થયા છે. જેમાંથી 64 લોકોના ઘટનાસ્થળે જ મોત થયા છે, જ્યારે 2 લોકોના હોસ્પિટલમાં સારવાર દરમિયાન મોત થયા છે.
ટ્રકમાં સવાર લોકો લગ્ન પ્રસંગમાં હાજરી આપવા જઈ રહ્યા હતા, ત્યારે આ ગોઝારો અકસ્માત સર્જાયો હતો. ટ્રક જૂની અને જર્જરિત હાલતમાં હતી, જેના કારણે પુલ પસાર કરતી વખતે તેણે સંતુલન ગુમાવ્યું હતું અને નદીમાં પડી હતી. સ્થાનિક ગ્રામજનોએ જણાવ્યું કે આ વિસ્તારમાં અગાઉ પણ અનેક અકસ્માતો થયા છે.
રાહત અને બચાવ કામગીરીમાં લાગ્યો સમય
રાહત અને બચાવ કામગીરીમાં સમય લાગતા સ્થિતિ વધારે ગંભીર બની હતી. ઘાયલ લોકોને તાત્કાલિક મદદ ન મળી, જેના કારણે મૃત્યુઆંક વધી ગયો અને ગંભીર રીતે ઘાયલ દર્દીઓને સારી સારવાર માટે મોટી હોસ્પિટલોમાં મોકલવામાં આવ્યા છે. સ્થાનિક લોકોના જણાવ્યા અનુસાર પુલ અને આસપાસના રસ્તાઓ ખૂબ જ ખરાબ હાલતમાં છે. તેમણે અગાઉ પણ આ જગ્યાને સુરક્ષિત બનાવવા માટે લોકોએ માગ કરી હતી, પરંતુ કોઈ કાર્યવાહી કરવામાં આવી ન હતી.
લોકો લગ્નમાં જઈ રહ્યા હતા
આ અકસ્માત ઈથોપિયાની માર્ગ સુરક્ષા વ્યવસ્થા અને ઈમરજન્સી સેવાઓની ખામીઓને બતાવે છે. આ ઘટના માત્ર પીડિત પરિવારો માટે જ નહીં, પરંતુ સમગ્ર વિસ્તાર માટે એક ઊંડી કરૂણાંતિકા બની હતી. લગ્નની ઉજવણી શોકમાં ફેરવાઈ ગઈ અને અકસ્માતે ઈથોપિયામાં માર્ગ સલામતી અને માળખાકીય નબળાઈઓ અંગે ગંભીર પ્રશ્નો ઉભા કર્યા છે.
ઈથોપિયા એક લેન્ડલોક દેશ
ઈથોપિયા પૂર્વ આફ્રિકામાં એક લેન્ડલોક દેશ છે. તે આફ્રિકાનો બીજો સૌથી વધુ વસ્તી ધરાવતો દેશ છે. ઈથોપિયાની રાજધાની એડિસ અબાબા છે. દેશમાં ખેડૂતો માટે ઘણા ઉદ્યોગો છે, પરંતુ છેલ્લા કેટલાક વર્ષોમાં રાજકીય અસ્થિરતા અને વંશીય સંઘર્ષોએ અહીંના વિકાસને અસર કરી છે. 2018થી ઈથોપિયામાં સુધારાના પ્રયાસો કરવામાં આવ્યા છે, પરંતુ પ્રાદેશિક સંઘર્ષો અને માનવતાવાદી કટોકટીઓએ વિકાસને અવરોધ્યો છે.
