તાન્ઝાનિયામાં આફ્રિકાના સૌથી ઊંચા પર્વત માઉન્ટ કિલિમંજારો પર એક હેલિકોપ્ટર દુર્ઘટનામાં પાંચ લોકોનાં મોત થયા છે. પોલીસે તેને પર્વત પર ફસાયેલા દર્દીઓને બહાર કાઢવા માટે ચલાવવામાં આવેલા બચાવ અભિયાન દરમિયાન થયેલી દુર્ઘટના તરીકે જણાવ્યુ છે. પોલીસના જણાવ્યા મુજબ, મૃત્યુ પામનારાઓમાં કિલિમંજારો પરથી તબીબી સહાય માટે બહાર કાઢવામાં આવેલા બે વિદેશી નાગરિકો સામેલ હતા. આ દુર્ઘટનામાં એક સ્થાનિક ડોક્ટર, એક ટૂર ગાઈડ અને એક પાયલોટનું પણ મોત થયું છે.
બચાવ અભિયાન દરમિયાન હેલિકોપ્ટર ક્રેશ
પોલીસે જણાવ્યું કે આ દુર્ઘટના પર્વતના બારાફુ કેમ્પ અને કિબો શિખર વચ્ચે 4,000 મીટર (13,100 ફૂટ)થી વધુ ઊંચાઈ પર થઈ હતી. બે વિદેશી નાગરિકોને બચાવવા માટે ચલાવવામાં આવેલા બચાવ અભિયાન દરમિયાન આ હેલિકોપ્ટર દુર્ઘટનાગ્રસ્ત થયું હતું.
દુર્ઘટના અંગે કોઈ નિવેદન આપવામાં આવ્યું નથી
કિલિમંજારો વિસ્તારના પોલીસ કમાન્ડર સાઇમન માઈગુઆએ પત્રકારોને જણાવ્યું કે આ વિમાન કિલિમંજારો એવિએશન કંપનીનું હતું, જે અન્ય સેવાઓ સાથે સાથે તબીબી ઇવેક્યુએશન સેવાઓ પણ આપે છે. કંપની તરફથી હજી સુધી આ દુર્ઘટના અંગે કોઈ નિવેદન આપવામાં આવ્યું નથી.
અગાઉ પણ ઘટી હતી દુર્ઘટના
પોલીસે જણાવ્યું કે દુર્ઘટના અંગે વધુ માહિતી સામે આવ્યા પછી લોકોને જાણ કરવામાં આવશે. દુર્ઘટનાના કારણો જાણવા માટે તપાસ ચાલુ છે અને એક પોલીસ ટીમ આ તપાસમાં લાગી ગઈ છે. બુધવાર સાંજે કિલિમંજારો પર્વત પર થયેલી આ ઘટના ચોંકાવનારી છે, કારણ કે સામાન્ય રીતે અહીં વિમાન દુર્ઘટનાઓ બહુ જ ઓછી થાય છે. અગાઉ નવેમ્બર 2008માં અહીં એક વિમાન દુર્ઘટના થઈ હતી, જેમાં ચાર લોકોનાં મોત થયા હતા.
