- GST, Banks, Paytm, CNG-LPG સહિતના નિયમોમાં ફેરફાર
- બેંકોમાં રહેશે 12 દિવસની રજાઓ, ફાસ્ટેગ KYC ન કરાવ્યું તો થશે ડિએક્ટિવ
- બદલાશે GSTના નવા નિયમો, થશે LPG અને CNGના ભાવમાં ફેરફાર
આજે 29 ફેબ્રુઆરી એટલે કે લીપ ઈયરમાં ફેબ્રુઆરી મહિનાનો અંતિમ દિવસ છે. આવતીકાલથી નવો મહિનો એટલે કે માર્ચ-2024ની શરૂઆત થઈ જશે. દરેક મહિનો પોતાની શરૂઆતની સાથે જ અનેક પરિવર્તનો લઈને આવતો હોય છે. માર્ચ 2024થી દેશભરમાં કેટલાંક મહત્વના પરિવર્તનો થવા જઈ રહ્યા છે. આ પરિવર્તનોની સામાન્ય માણસ પર સીધી અસર થશે. એવામાં, તેમના વિશે માહિતી હોવી ખૂબ જ જરૂરી છે. માર્ચ મહિનામાં GST, ફાસ્ટેગ, LPG-CNGની કિંમતો અને Paytm પેમેન્ટ્સ બેંક સંબંધિત ફેરફારો થવા જઈ રહ્યા છે. ચાલો જાણીએ તેના વિષે…
GSTના નવા નિયમો
કેન્દ્ર સરકારે 01 માર્ચ, 2024થી GSTના નિયમોમાં મોટા ફેરફારો કરવાનો નિર્ણય લીધો છે. આ ફેરફાર હેઠળ હવે 5 કરોડ રૂપિયાથી વધુનું ટર્નઓવર ધરાવતા વેપારીઓ ઈ-ઈનવોઈસ વિના ઈ-વે બિલ ઈશ્યુ નહિ કરી શકે. આ નિયમ 1 માર્ચથી લાગુ કરવામાં આવશે. 1 માર્ચથી, રૂ. 5 કરોડથી વધુનું ટર્નઓવર ધરાવતા વ્યવસાયો તમામ B2B વ્યવહારો માટે ઈ-ઈનવોઈસ વિગતોનો સમાવેશ કર્યા વિના ઈ-વે બિલ જારી કરી શકશે નહીં. ગુડ્સ એન્ડ સર્વિસ ટેક્સ (GST) વ્યવસ્થા હેઠળ, એક રાજ્યમાંથી બીજા રાજ્યમાં 50,000 રૂપિયાથી વધુની કિંમતનો માલ મોકલવા માટે ઈ-વે બિલની જરૂર પડે છે.
બેંકોમાં રહેશે 12 દિવસની રજાઓ
માર્ચ મહિનામાં જાહેર અને ખાનગી ક્ષેત્રની બેંકોમાં 12 દિવસની રજાઓ રહેશે. તેમાં શનિવાર અને રવિવારની સાપ્તાહિક રજાઓનો પણ સમાવેશ થાય છે. ભારતીય રિઝર્વ બેંક દ્વારા જાહેર કરવામાં આવેલ બેંક હોલીડે કેલેન્ડર મુજબ, 11 અને 25 માર્ચે બીજો અને ચોથો શનિવાર હોવાથી બેંકો બંધ રહેશેહોળી પણ 25મી માર્ચે છે. આ સિવાય 5, 12, 19 અને 26 માર્ચે રવિવાર હોવાથી બેંક શાખાઓ બંધ રહેશે.
LPG અને CNGના ભાવમાં ફેરફાર
LPG, CNG અને PNGના ભાવ દર મહિનાની પહેલી તારીખે બદલાય છે. જોકે, છેલ્લા મહિનામાં ઘરેલુ LPG સિલિન્ડરની કિંમતોમાં કોઈ ફેરફાર થયો નથી. કોમર્શિયલ સિલિન્ડરના ભાવમાં અનેક વખત ફેરફાર કરવામાં આવ્યા છે. એવું માનવામાં આવે છે કે માર્ચ 2024 થી LPG સિલિન્ડરની કિંમતોમાં ફેરફાર થઈ શકે છે.
ફાસ્ટેગ KYC ન કરાવ્યું તો થશે ડિએક્ટિવ
નેશનલ હાઈવે ઓથોરિટી ઓફ ઈન્ડિયા (NHAI) એ ફાસ્ટેગના KYC અપડેટ કરવાની છેલ્લી તારીખ 29 ફેબ્રુઆરી નક્કી કરી છે. જો આ તારીખ સુધીમાં ફાસ્ટેગની KYC પ્રોસેસ પૂર્ણ ન કરવામાં આવી હોય તો તેને નેશનલ હાઈવે ઓથોરિટી ઓફ ઈન્ડિયા દ્વારા ડિએક્ટિવ અથવા બ્લેકલિસ્ટ કરી દેવામાં આવશે. એવામાં, 29 ફેબ્રુઆરી સુધીમાં તમારું ફાસ્ટેગ KYC કરાવી દો, નહિતર 1 માર્ચથી મુશ્કેલીનો સામનો કરવો પડી શકે છે.
બદલાઈ જશે ક્રેડિટ કાર્ડ સંબંધિત નિયમો
દેશની સૌથી મોટી જાહેર ક્ષેત્રની બેંક સ્ટેટ બેંક ઓફ ઈન્ડિયા (SBI)એ પોતાના ક્રેડિટ કાર્ડના નિયમોમાં ફેરફાર કરવાનો નિર્ણય લીધો છે. SBI 15 માર્ચથી તેના ન્યૂનતમ દિવસના બિલની ગણતરીના નિયમોમાં ફેરફાર કરવા જઈ રહી છે. બેંક આ માહિતી ગ્રાહકોને ઈ-મેલ દ્વારા આપશે.
Paytm પેમેન્ટ બેંકના સંચાલન પર લાગશે પ્રતિબંધ
RBIના દિશાનિર્દેશો મુજબ, 15 માર્ચથી પેટીએમ પેમેન્ટ્સ બેંક સેવાઓ પર પ્રતિબંધ મૂકવામાં લાગી જશે. આ 15 માર્ચ પછી થઈ રહેલા મોટા ફેરફારો પૈકી એક છે. રિઝર્વ બેંક ઓફ ઈન્ડિયા (RBI) એ પેટીએમ પેમેન્ટ બેંકને 29 ફેબ્રુઆરીથી નવા ગ્રાહકો ઉમેરવાનું બંધ કરવાનો નિર્દેશ આપ્યો હતો, પરંતુ ત્યારબાદ આ સમયમર્યાદા 15 માર્ચ સુધી લંબાવી દેવામાં આવી હતી. Paytm એ દેશના સૌથી મોટા પેમેન્ટ પ્લેટફોર્મ્સમાંનું એક છે, તેથી તેની પેટાકંપની પર RBIની આ કાર્યવાહી બાદ બજાર આ વિવાદ પર નજર રાખી રહ્યું છે.
