- મેક્સિકોમાં ગરમી વધી જવાથી અત્યાર સુધી 26 લોકોનાં મોત થઈ ચુક્યા છે
- ગરમીથી વાંદરાઓ ટપોટપ ઝાડ પરથી પડીને મોતને ભેટી રહ્યા છે
- મેક્સિકોમાં હાલ ગરમીનો પારો 46 ડિગ્રીએ પહોંચી ચુક્યો છે.
વિશ્વ આખું ગરમીમાં શેકાઈ રહ્યું છે. ભારતની સાથે વિદેશમાં પણ તાપમાન 45 ડિગ્રી સેલ્સિયસની ઉપર રહ્યું છે. મેક્સિકોમાં સ્થિતિ ખૂબ ખરાબ છે. અહીં ગરમીને લીધે જનાવરોનાં મોત થઈ રહ્યા છે. ગત છ દિવસમાં અહીં કાળઝાળ ગરમીમાં 138 કપિરાજના મોત થઈ ગયા છે. મેક્સિકોમાં હાલ ગરમીનો પારો 46 ડિગ્રીએ પહોંચી ચુક્યો છે. જેથી પશુ-પંખી, જનતા ત્રાહિમામ પોકારી ઉઠી છે. ગરમીથી બચાવવા માટે સ્થાનિક લોકો એક જૂથ થઈ રહ્યા છે. મૃતક વાંદરાની પ્રજાતિ હાઉલર છે. આ વાંદરાઓ તેમના જોરદાર અવાજ માટે જાણીતા છે. આ વાંદરા મેક્સિકોની ખાડી તટ પાસે આવેલા રાજ્ય ટબેસ્કોમાં મૃત મળી આવ્યા છે.
મેક્સિકોમાં ભીષણ ગરમીથી 26 લોકોનાં મોત
સ્થાનિક વહીવટી તંત્ર અનુસાર, પાંચ કપિરાજને એક પશુ હોસ્પિટલ ખસેડાયા હતા. તેઓની સઘન સારવાર આપવામાં આવી પરંતુ તેઓ સફળ ન થઈ શક્યા. તબીબના જણાવ્યા પ્રમાણે વાંદરાઓ ડિહાઈડ્રેશન અને તાવને લીધે ગંભીર સ્થિતિમાં પહોંચી ગયા હતા. વાંદરાઓને લૂ લાગી હતી. મેક્સિકોમાં માર્ચ પછી અત્યાર સુધી ગરમીને લીધે 26 લોકોનાં મોત થઈ ચુક્યા છે. મંગળવારે મેક્સિકોમાં ગુરુત્તમ તાપમાન 45 ડિગ્રી સેલ્સિયસ નોંધવામાં આવ્યું હતું. હજી પણ ત્યાં ભારે ગરમીની આગાહી કરવામાં આવી છે.
ઝાડ પરથી ટપોટપ નીચે પડીને મોતને ભેટયા
મળતી માહિતી અનુસાર, હાઉલર કપિરાજ 20 વર્ષ સુધી જીવતા રહી શકે છે. વાંદરાના મોટા-મોટા જડબા અને ભયંકર દાંત હોય છે પરંતુ આ બધા કરતાં આ વાંદરાઓ પોતાના મોટા અવાજ માટે જાણીતા છે. વન્યજીવે જમીન પર મળેલા આશે 138 જનાવરની ગણતરી કરી. આનાં મોત પાંચમી મેથી શરૂ થયા, કારણ કે ત્યારથી ગરમી ઘણી વધી ગઈ છે. વિભાગે કહ્યું કે કપિરાજ વૃક્ષ પરથી સફરજનની જેમ પડતા રહ્યા હતા. ત્યારબાદ તેઓનાં મોત થયા હતા.
