અમેરિકામાં ચાલી રહેલી મેજર લીગ ક્રિકેટ (MLC) 2025માં વેસ્ટ ઈન્ડિઝના અનુભવી ઓલરાઉન્ડર કાયરન પોલાર્ડે એક મોટી સિદ્ધિ હાંસલ કરી છે. કાયરન પોલાર્ડ હવે T20 ક્રિકેટ ઈતિહાસમાં સૌથી વધુ રન બનાવનારા ખેલાડીઓના લિસ્ટમાં ચોથા સ્થાને પહોંચી ગયો છે.
કાયરન પોલાર્ડે આ મામલે ભારતના દિગ્ગજ બેટ્સમેન વિરાટ કોહલીને પાછળ છોડી દીધો છે. આ સિઝનમાં પોલાર્ડ MI ન્યૂયોર્ક ટીમનો ભાગ છે. તેની પહેલી મેચ ટેક્સાસ સુપર કિંગ્સ સામે હતી, જેમાં તેને માત્ર 16 બોલમાં 32 રન બનાવ્યા હતા. આ ઈનિંગ સાથે પોલાર્ડે વિરાટ કોહલીના કુલ રનને પાછળ છોડી દીધા હતા. કાયરન પોલાર્ડે અત્યાર સુધી 696 T20 મેચ રમીને કુલ 13569 રન બનાવ્યા છે, જ્યારે વિરાટ કોહલીએ 414 મેચમાં 13543 રન બનાવ્યા છે.
T20માં અત્યાર સુધી સૌથી વધુ રન બનાવનાર ખેલાડી
ક્રિસ ગેલ – 14562 રન (463 મેચ)
એલેક્સ હેલ્સ – 13704 રન (497 મેચ)
શોએબ મલિક – 13571 રન (557 મેચ)
કાયરન પોલાર્ડ – 13569 રન (696 મેચ)
વિરાટ કોહલી – 13543 રન (414 મેચ)
પોલાર્ડ પાસે નંબર 2 બનવાની તક
ક્રિસ ગેલ આ લિસ્ટમાં સૌથી ઉપર છે, જેને 14562 રન બનાવ્યા છે. ઈંગ્લેન્ડનો એલેક્સ હેલ્સ બીજા સ્થાને છે, જ્યારે પાકિસ્તાનનો શોએબ મલિક ત્રીજા સ્થાને છે. કાયરન પોલાર્ડ હવે ચોથા સ્થાને છે અને વિરાટ કોહલી પાંચમા સ્થાને સરકી ગયો છે.
કાયરન પોલાર્ડ દુનિયાભરની લગભગ દરેક મોટી T20 લીગમાં રમે છે, જેના કારણે તેને ઘણી બધી મેચ રમવાની અને આટલા રન બનાવવાની તક મળી છે. બીજી તરફ, વિરાટ કોહલી T20 આંતરરાષ્ટ્રીય ક્રિકેટમાંથી નિવૃત્તિ લઈ ચૂક્યો છે અને હવે તે ફક્ત IPLમાં જ રમે છે.
જો પોલાર્ડ આગામી મેચમાં ફક્ત 3 રન વધુ બનાવે છે, તો તે શોએબ મલિકને પાછળ છોડી દેશે અને T20 ક્રિકેટમાં ત્રીજો સૌથી વધુ રન બનાવનાર ખેલાડી બની જશે. કાયરન પોલાર્ડની સિદ્ધિ દર્શાવે છે કે કોઈપણ ખેલાડી સતત પ્રદર્શન કરીને અને લાંબા સમય સુધી રમીને ઈતિહાસ રચી શકે છે, પછી ભલે તે કોઈપણ ટીમ કે લીગમાં રમી રહ્યો હોય.
