મોહમ્મદ આમિર પાકિસ્તાન ટીમમાં કરી શકે છે વાપસી, મોટું કારણ સામે આવ્યું

• પાકિસ્તાનના ફાસ્ટ બોલર મોહમ્મદ આમિરે ટીમમાં કરી શકે છે વાપસી
  
• આમિરે વર્ષ 2020માં આંતરરાષ્ટ્રીય ક્રિકેટમાંથી નિવૃત્તિ જાહેર કરી હતી
  
• આમિરની લીગ ક્રિકેટમાં ખૂબ જ ખતરનાક બોલિંગ જોવા મળી છે
  

પાકિસ્તાન ક્રિકેટ ટીમના પૂર્વ ફાસ્ટ બોલર મોહમ્મદ આમિરે છેલ્લા ઘણા સમયથી રાષ્ટ્રીય ટીમ માટે કોઈ મેચ રમી નથી. હવે એવા અહેવાલો સામે આવી રહ્યા છે કે મોહમ્મદ આમિર ટૂંક સમયમાં પાકિસ્તાન ક્રિકેટ ટીમમાં વાપસી કરી શકે છે. મોહમ્મદ આમિરે વર્ષ 2020માં આંતરરાષ્ટ્રીય ક્રિકેટમાંથી નિવૃત્તિ લેવાની જાહેરાત કરી હતી. આ દરમિયાન આમિર સતત ફ્રેન્ચાઈઝી ક્રિકેટ રમી રહ્યો છે. જેમાં આમિરની ખૂબ જ ખતરનાક બોલિંગ જોવા મળી છે. હવે તેની પાકિસ્તાન ટીમમાં વાપસીની અટકળો ફરી એકવાર તેજ થઈ ગઈ છે. રિપોર્ટ્સ અનુસાર પાકિસ્તાન T20 ટીમના કેપ્ટન શાહીન આફ્રિદી આ અંગે મોહમ્મદ આમિર સાથે વાત કરી શકે છે.

આમિર ILT20માં રમી રહ્યો

આ દિવસોમાં મોહમ્મદ આમિર ILT20 લીગમાં રમી રહ્યો છે. શાહીન શાહ આફ્રિદી પણ ILT20 લીગમાં રમી રહ્યો છે. આ બંને ખેલાડીઓ એક ટીમમાં છે. અહેવાલો અનુસાર, થોડા સમય પહેલા શાહીન શાહ આફ્રિદીને મોહમ્મદ આમિરની રાષ્ટ્રીય ટીમમાં વાપસીને લઈને એક પ્રશ્ન પૂછવામાં આવ્યો હતો. જેના પર શાહીન આફ્રિદીએ કહ્યું હતું કે આ અંગે મોહમ્મદ આમિર સાથે વાત કર્યા બાદ તે જાણવાનો પ્રયાસ કરશે કે શું આમિર રાષ્ટ્રીય ટીમમાં વાપસી કરવા માંગે છે.

શાહીન આફ્રિદીએ કહ્યું કે, મેં લગભગ 5 વર્ષથી મોહમ્મદ આમિર સાથે બોલિંગ કરી છે. તેની સાથે બોલિંગ કરવાનો સારો અનુભવ હતો. અમારી જોડી પણ ઘણી અદ્ભુત હતી. જો તે હવે પાકિસ્તાન ક્રિકેટ ટીમમાં પરત ફરવા માંગે છે તો હું તેની સાથે ચોક્કસ વાત કરીશ.

આમિરે પોતાના કમબેક વિશે વાત કરી

આ પહેલા પણ ઘણી વખત મોહમ્મદ આમિરને પાકિસ્તાન ક્રિકેટ ટીમમાં વાપસીને લઈને સવાલો પૂછવામાં આવ્યા છે. આ દરમિયાન મોહમ્મદ આમિરે કહ્યું કે તે હવે આગળ વધી ગયો છે. તેના જીવનમાં અન્ય પ્રાથમિકતાઓ છે અને પાકિસ્તાન ક્રિકેટ ટીમમાં પરત ફરવાની તેની કોઈ યોજના નથી. આવી સ્થિતિમાં શાહીન આફ્રિદી માટે આમિરને મનાવવાનો મોટો પડકાર બની રહેશે. જે બાદ એવું લાગી રહ્યું છે કે મોહમ્મદ આમિરની પાકિસ્તાન ટીમમાં વાપસીની શક્યતાઓ ઘણી ઓછી છે.

મોહમ્મદ આમિરની આંતરરાષ્ટ્રીય કારકિર્દી

મોહમ્મદ આમિરે પાકિસ્તાન ક્રિકેટ ટીમ માટે 36 ટેસ્ટ, 61 ODI અને 50 T20 મેચ રમી છે. આ સમયગાળા દરમિયાન મોહમ્મદ આમિરે પાકિસ્તાન ટીમ માટે ટેસ્ટ ક્રિકેટમાં 119 વિકેટ, વનડે ક્રિકેટમાં 81 વિકેટ અને T20 ક્રિકેટમાં 59 વિકેટ ઝડપી છે. મોહમ્મદ આમિર વિશ્વના શ્રેષ્ઠ બોલરોમાં સામેલ હતો. ટેસ્ટ ક્રિકેટમાં મોહમ્મદ આમીરનું સર્વશ્રેષ્ઠ બોલિંગ પ્રદર્શન 64 રન આપીને 7 વિકેટ હતી. આ સિવાય તેણે ODI ક્રિકેટમાં 30 રનમાં 5 વિકેટ અને T20 ક્રિકેટમાં 13 રનમાં 4 વિકેટ ઝડપી છે.

આમિર પોતાના નિવેદનોને લઈને ચર્ચામાં રહે છે

મોહમ્મદ આમિર અવારનવાર પોતાના નિવેદનોને કારણે ચર્ચામાં રહે છે. ઘણી વખત આમિરે પાકિસ્તાન ક્રિકેટ બોર્ડ અને ટીમ પર સવાલો પણ ઉઠાવ્યા છે. આ સિવાય ઘણી વખત આમિર એમએસ ધોની અને વિરાટ કોહલી જેવા ટીમ ઈન્ડિયાના ખેલાડીઓના વખાણ કરતો જોવા મળ્યો છે.