વર્લ્ડ-કપના દિવસોને ધ્યાનમાં રાખીને 15થી વધારે ખેલાડીઓની મંજૂરી મળવી જોઈએ : કમિન્સ

• બે મહિનાનો ગાળો ધ્યાનમાં રાખીને પ્લેઇંગ ઇલેવનમાં ફેરફાર કરવો પડે છે
• ઓસ્ટ્રેલિયાને ગ્લેન મેક્સવેલ તથા ઓપનર મિચેલ માર્શની સેવાઓ મળશે નહીં
  
• ઈજાઓની સ્થિતિમાં તમે બીજી ટીમ પાસેથી ખેલાડી લઈ શકતા નથી
  

ઇંગ્લેન્ડ સામે ઓસ્ટ્રેલિયાને પોતાના અનુભવી ઓલરાઉન્ડર ગ્લેન મેક્સવેલ તથા ઓપનર મિચેલ માર્શની સેવાઓ મળશે નહીં અને સુકાની પેટ કમિન્સે શનિવારે અમદાવાદમાં રમાનારી વર્લ્ડ કપની મેચ પહેલાં જણાવ્યું હતું કે વર્લ્ડ કપની લાંબા ગાળાને ધ્યાનમાં રાખીને ટીમમાં 15 કરતાં વધારે ખેલાડીઓ રાખવાની મંજૂરી આપવી જોઈએ. આ બે મહિનાની ટૂર્નામેન્ટ છે અને તમે ન્યૂઝીલેન્ડની જે સ્થિતિ થઈ છે તેમાંથી પસાર થવા માગતા નથી. તેમના કેટલાક ચાવીરૂપ ખેલાડીઓ અનફિટ થયા છે પરંતુ સારા નસીબે તેઓ કેન વિલિયમ્સનને ટીમમાં રાખી શક્યા છે પરંતુ જો અચાનકથી તમારે વિલિયમ્સન જેવા ખેલાડીને બહાર રાખવા પડે તો તે બાબત ક્રિકેટ તથા વર્લ્ડ કપ માટે સારો સંકેત રહેતો નથી.

કમિન્સે જણાવ્યું હતું કે મારા મતે ટીમને જેટલી જરૂર હોય તેટલા ખેલાડીઓ રાખી શકવા જોઈએ અને તેમાંથી તમે વિકલ્પને પસંદ કરી શકો છે. ઈજાઓની સ્થિતિમાં તમે બીજી ટીમ પાસેથી ખેલાડી લઈ શકતા નથી. મેક્સવેલ અને માર્શની ગેરહાજરીના સંદર્ભમાં કમિન્સે ઉમેર્યું હતું કે અમારી ટીમ સેમિફાઇનલમાં સ્થાન નિશ્ચિત કરવા માટે સંઘર્ષ કરી રહી છે ત્યારે આ આદર્શ સ્થિતિ નથી. બંને ખેલાડી અલગ અલગ સમયે ટૂર્નામેન્ટમાં મેચવિનર બન્યા છે. ટૂર્નામેન્ટ શરૂ થાય તે પહેલાંથી અમે જાણતા હતા કે અમારે પૂરા 15 ખેલાડીઓની જરૂર પડશે. અમારી પાસે પ્લેઇંગ ઇલેવનના વિકલ્પ થોડાક સીમિત થયા છે.

અમે સતત બે મેચમાં એક સરખી પ્લેઇંગ ઇલેવન મેદાનમાં ઉતારી હોય તે અંગે હું ચોક્કસ નથી તેમ જણાવીને કમિન્સે ઉમેર્યું હતું કે બે મહિનાની ટૂર્નામેન્ટ દરમિયાન તમારે ઈજાઓ તથા પસંદગીના કારણે કેટલાક ખેલાડીઓને બહાર બેસાડીને પ્લેઇંગ ઇલેવનમાં ફેરફાર કરવા પડે છે. માર્શની તુલનામાં મેક્સવેલ જલદીથી મેદાનમાં ઊતરશે. મેક્સવેલ અફઘાનિસ્તાન સામેની મેચમાં રમી શકે છે. તેણે ગુરુવારે ટીમ સાથે સારી ટ્રેનિંગ કરી હતી અને તે માત્ર એક જ મેચ ગુમાવી શકે છે. માર્શ અંગે અમારે રાહ જોવી પડે તેમ છે પરંતુ આશા છે કે તે જલદીથી પુનરાગમન કરશે.