- મ્યુનિખ ઓલિમ્પિકમાં ઇઝરાયેલના 11 ખેલાડીઓની હત્યા કરનારા આતંકવાદીઓને શોધીને માર્યા હતા
- ફ્રાન્સના હાઇજેક કરાયેલા વિમાનને યુગાન્ડામાં મુક્ત કરાવ્યું હતું, જેમાં નેતન્યાહૂના ભાઈનું મૃત્યુ થયું હતું
- મોસાદે અમેરિકા માટે ઈરાનમાં ઘૂસીને અલ-કાયદાના બીજા નંબરના આતંકી અલ મસરીની હત્યા કરી હતી
હમાસની રાજકીય શાખાના પ્રમુખ ઇસ્માઇલ હાનિયાની બુધવારે સવારે ઈરાનમાં હત્યા કરી દેવામાં આવી. ઈરાનના અર્ધલશ્કરી દળ ઈરાન રિવોલ્યૂશનરી ગાર્ડસ કોર (IRGC)એ આ હત્યાની પુષ્ટિ કરી છે. ઈરાનનું કહેવું છે કે તહેરાન ખાતે આવેલા ઘરે હાનિયાની હત્યા કરવામાં આવી છે.
હુમલામાં હાનિયાની સાથે તેના એક બોડીગાર્ડનું પણ મૃત્યુ થયું છે. ઈરાનમાં થયેલી આ હત્યાની જવાબદારી હજુ સુધી કોઈ દેશ કે જાસૂસી સંસ્થાએ નથી લીધી. જોકે, આશંકા એવી છે કે ઇઝરાયેલી જાસૂસી સંસ્થા મોસાદે આ હુમલા કર્યો હશે. ઇઝરાયેલ-હમાસ વચ્ચે ગયા વર્ષના ઓક્ટોબરથી શરૂ થયેલા યુદ્ધ બાદ ઇઝરાયેલી સરકારે હુમલાનો બદલો લેવાની અને તેના જવાબદારોનો ખાતમો કરવાની ચેતવણી પણ આપી હતી. ઉલ્લેખનીય છે કે, પોતાના નાગરિકોની હત્યાનો બદલો લેવાનો ઇઝરાયેલનો લાંબો ઇતિહાસ રહ્યો છે, ભલેને તે પછી, 1972માં મ્યુનિખ ઓલિમ્પિકમાં ઇઝરાયેલી ખેલાડીઓની હત્યા કરનારા આતંકવાદીઓને શોધીને મારવાનો હોય કે ડ્રોન હુમલામાં દુશ્મન દેશોના મોટા રાજકીય અને સૈન્ય ચહેરાને ખતમ કરવાનો હોય – દુશ્મનો પર કાર્યવાહી કરવાનો ઇઝરાયેલનો જૂનો રેકોર્ડ રહ્યો છે. અને, તેનાં આ મિશનોને પાર પાડવામાં તેની જાસૂસી સંસ્થા મોસાદ સૌથી આગળ રહી છે.
પોતાના નાગરિકોની હત્યાનો બદલો લેવાનો ઇઝરાયેલનો લાંબો ઇતિહાસ
1. 1972નું ઓપરેશન રેથ ઓફ ગોડ
દુશ્મન દેશોની જમીન પર જ દુશ્મનોને ખતમ કરવાનો ઇતિહાસ તેની આઝાદી બાદથી શરૂ થયો હતો. જોકે, તેના મોટા ભાગના હુમલા ગુપ્ત રહ્યા છે. ઇઝરાયેલે પોતાના દુશ્મનોને ખતમ કરવાની પહેલી ખુલ્લેઆમ જાહેરાત 1970ના દાયકામાં કરી હતી, જ્યારે મ્યુનિખ ઓલિમ્પિક દરમિયાન કેટલાક પેલેસ્ટિનિયન આતંકવાદીઓએ જર્મનીમાં જ 11 ઇઝરાયેલી ખેલાડીઓને મારી નાખ્યા હતા. આ ઘટના બાદ જાસૂસી સંસ્થા મોસાદે બદલો લેવા માટે ઓપરેશન રોથ ઓફ ગોડ શરૂ કર્યું હતું. આ અભિયાન હેઠળ ઇઝરાયેલે મ્યુનિખ હુમલા પાછળ રહેલા બ્લેક સપ્ટેમ્બર સંગઠનના એકેએક સભ્યને શોધીને માર્યા હતા. ચોંકાવનારી વાત એ છે કે ઇઝરાયેલે આ દરમિયાન પોતાનાથી ઘણા મોટા અને ખતરનાક શસ્ત્રદળને નિશાન બનાવ્યું હતું. દુનિયામાં આજે પણ મોસાદના આ અભિયાનની ચર્ચા થાય છે.
2. 1976નું ઓપરેશન થંડરબોલ્ટ
1976માં અરબના આતંકવાદીઓ દ્વારા ફ્રાન્સનું વિમાન હાઈજેક કરાયું હતું, જેમાં ઇઝરાયેલના 94 નાગરિકો હતા. મોસાદે આ વિમાનને યુગાન્ડામાંથી મુક્ત કરાવ્યું હતું. આ ઓપરેશન ઘણું ચર્ચામાં રહ્યું હતું. આ ઓપરેશનમાં ઇઝરાયેલી વડાપ્રધાન બેન્ઝામિન નેતન્યાહૂના ભાઈ યોનાતન નેતન્યાહૂનું મૃત્યુ થયું હતું.
3. મિગ-21ને ઇઝરાયેલ લવાયું
1960ના દાયકામાં સોવિયત સંઘ રશિયાનું મિગ-29 સૌથી આધુનિક વિમાન મનાતું હતું. તેને મેળવવામાં અમેરિકાની સીઆઇએ પણ નિષ્ફળ રહી હતી. પણ મોસાદની એક મહિલા એજન્ટે 1964માં રશિયન મિગ-29 મેળવી લીધું હતું. જોકે, 1962માં આ મિશનમાં એક મોસાદ એજન્ટ પકડાઈ ગયો હતો, જેને બાદમાં ફાંસી અપાઈ હતી.
4. 1960માં આર્જેન્ટિનામાં સિક્રેટ મિશન
મોસાદે 1960માં આર્જેન્ટિનામાં એક સિક્રેટ મિશન પાર પાડયું હતું, જેમાં નાઝી યુદ્ધ ગુનેગાર એડોલ્ફ એકમેનનું અપહરણ કરીને ઇઝરાયેલ લઈ અવાયો હતો. તેના પર કેસ ચલાવીને તેને સજા કરવામાં આવી હતી. આ મિશનને પાંચ એજન્ટોએ પાર પાડયું હતું.
5. ઈરાની પરમાણુ વિજ્ઞાનીની હત્યા કરી
નવેમ્બર 2020માં ઈરાનના સૈન્ય પરમાણુ કાર્યક્રમના ચીફ વૈજ્ઞાનિક બ્રિગેડિયર જનરલ મોહસિન ફખરીજાહેદની હત્યા કરી દેવામાં આવી હતી. જોકે, મોસાદે ત્યારે આ હત્યાની જવાબદારી નહોતી લીધી પણ જૂન 2021માં મોસાદના વડાએ આ બાબતે મહત્ત્વના ખુલાસા કર્યા હતા.
6. વિદેશોમાં કરેલાં અન્ય ઓપરેશનો
મોસાદે અમેરિકા માટે ઈરાનમાં ઘૂસીને અલ-કાયદાના બીજા નંબરના ગણાતા આતંકવાદી અલ મસરીની હત્યા કરી હતી. ત્યાર બાદ ઈરાનમાં ઘૂસીને આતંકવાદી અબુ મોહમ્મદની પણ હત્યા કરી. પેલેસ્ટાઇનના નેતા યાસર અરાફતનો જમણો હાથ ગણાતા ખલીલ અલ બજીર ઉર્ફે અબુજિહાદને ટયૂનિશિયામાં ટૂરિસ્ટ બનીને ગયેલા મોસાદના એજન્ટે પરિવાર સામે જ 70 ગોળીઓ ધરબી દીધી હતી. પોતાના જ દેશના પરમાણુ કાર્યક્રમની માહિતી લીક કરનારા વિદ્રોહી વૈજ્ઞાનિક વનુનુને પકડવા માટે મોસાદે કાતિલ સુંદરીઓનો ઉપયોગ કર્યો હતો, જે તેને પ્રેમજાળમાં ફસાવીને ઇઝરાયેલ પાછો લઈ આવી હતી.
