જૂનાગઢમાં ઉશ્કેરણીજનક ભાષણ કરનાર મુફતીની થશે તપાસ

ટેરર ફંડ સહિતના પાસા તપાસમાં આવશે : ધરપકડ બાદ રિમાન્ડની તજવીજ

જૂનાગઢમાં એક ધાર્મિક કાર્યક્રમમાં આવેલા મુંબઇના મૌલાના મુફતી સલમાનએ ઉશ્કેરણી જનક ભાષણ કર્યુ હતું. આ અનુસંધાને ગુજરાત એટીએસ હરકતમાં આવી હતી અને તેની મુંબઇમાં ભારે વિરોધ વચ્ચે ધરપકડ કરી જૂનાગઢ લઇ આવવામાં આવેલ છે. મુફતી વિદેશમાંથી પણ ફંડ મેળવતો હોવાની શકયતા છે. તમામ પાસાઓ તપાસી એજન્સી તેના રિમાન્ડ મેળવી પુછપરછ હાથ ધરશે.

મુંબઇના મૌલાના મુફતી સલમાન અઝહરીની સભા 3૧મી જાન્યુઆરીએ કચ્છના સામખીયારી ઉપરાંત જુનાગઢ ખાતે યોજવામાં આવી હતી. જુનાગઢ ખાતે મુસ્લિમ સમાજના વ્યસન મુકિત માટેના કાર્યક્રમમાં વકતા મુંબઇના મૌલાના મુફતી સલમાન અઝહરીએ વજકતવ્ય દરમિયાન ઉપસ્થિત ટોળાને ઉશકેરવાના પ્રયાસ કર્યા હતા. તેમના ભડકાઉ ભાષણના કેટલાક અંશો વાયરલ થયા હતા. વીડિયો વાયરલ થતાં જ જૂનાગઢ પોલીસે હરકતમાં આવી કાર્યક્રમના બે આયોજકોના નિવેદનો નોંધ્યા હતા. ગુનો નોંધ્યા પછી જુનાગઢ પોલીસે ગુજરાત એટીએસની મદદ લીધી હતી. ગુજરાત અને મહારાષ્ટ્ર એટીએસ તથા સ્થાનિક પોલીસની મદદથી લોકોના ટોળા એકત્ર થવા છતાં મુફતી સલમાન અઝહરીની ઘાટકોપર અટક કરી ગુજરાત લાવી ધરપકડ કરવામાં આવી હતી. મુફતી અઝહરીને ગઇકાલે એટીએસએ કોર્ટમાં રજુ કર્યા હતાં.

જુનાગઢમાં ભડકાઉ ભાષણ કરાયું તે પહેલા મુફતી અઝહરીનો કાર્યક્રમ તા.3૧ના સવારે સરહદી જિલ્લા કચ્છના સામખીયારી ખાતે યોજાયો હતો. કચ્છ આઇબી ઊંડઘી રહી હોય તેમ જુનાગઢમાં ફરિયાદ નોંધાયા બાદ સામખીયારીમાં ભાષણ અંગે તપાસ આરંભાઇ છે. પૂર્વ કચ્છ પોલીસ વડા સાગર બાગમારે જણાવ્યું કે ભાષણના વીડિયોને ચકાસવામાં આવી રહ્યો છે અને વાંધાજનક જણાશે તો કાયદાનુસાર કાર્યવાહી કરાશે. બીજી તરફ ગુજરાત એટીએસએ હવે મુંબઇના મુફતીને ગુજરાતમાં ફન્ડીંગ અને આર્થિક વ્યવહારો અંગે પણ તપાસ કરાશે. મુફતી અઝહરીની ધરપકડ બાદ સોશિયલ મીડિયા પર પણ પોલીસ અને એજન્સીઓ નજર રાખી હતી.