અમેરિકાના રાષ્ટ્રપતિ ડોનાલ્ડ ટ્રમ્પ હાલમાં સાઉદી અરેબિયા, કતાર અને યુએઈના પ્રવાસ પર છે. જ્યાં સાઉદી અરેબિયાએ અમેરિકન રાષ્ટ્રપતિ સાથે 142 બિલિયન ડોલરના અત્યાર સુધીના સૌથી મોટા સંરક્ષણ કરાર પર હસ્તાક્ષર કર્યા છે. આ દરમિયાન સાઉદી અરેબિયાએ અમેરિકામાં આર્ટિફિશિયલ ઈન્ટેલિજન્સ અને ટેક ક્ષેત્રમાં $600 બિલિયનનું રોકાણ કરવાનું પણ વચન આપ્યું છે.
દોહામાં મુકેશ અંબાણી અને ડોનાલ્ડ ટ્રમ્પે કરી મુલાકાત
ત્યારે અમેરિકી રાષ્ટ્રપતિ ડોનાલ્ડ ટ્રમ્પ કતારની રાજધાની દોહા પહોંચ્યા, જ્યાં તેમણે કતાર અને અમેરિકા વચ્ચે અનેક કરાર પર હસ્તાક્ષર કર્યા છે. આ દરમિયાન, ભારતના સૌથી મોટા ઉદ્યોગપતિ અને રિલાયન્સ ઈન્ડસ્ટ્રીઝના ચેરમેન મુકેશ અંબાણીએ દોહામાં યુએસ રાષ્ટ્રપતિ ટ્રમ્પ સાથે મુલાકાત કરી છે. તમને જણાવી દઈએ કે રિલાયન્સ ઈન્ડસ્ટ્રીઝ કતાર સાથે ક્રૂડ ઓઈલનો વેપાર કરે છે.
QIA રિલાયન્સ રિટેલમાં કર્યુ છે રોકાણ
રિલાયન્સ ઈન્ડસ્ટ્રીઝ દ્વારા એક નિયમનકારી ફાઈલિંગમાં કહેવામાં આવ્યું હતું કે કતાર ઈન્વેસ્ટમેન્ટ ઓથોરિટીએ રિલાયન્સ રિટેલ વેન્ચર્સ લિમિટેડમાં 1 ટકા હિસ્સા માટે રૂ. 8,278 કરોડનું રોકાણ કર્યું છે. આ રોકાણ માટે રિલાયન્સ રિટેલ દ્વારા QIAને 6.86 કરોડ ઈક્વિટી શેર ફાળવવામાં આવ્યા છે. આ રીતે, QIAએ રિલાયન્સ રિટેલ વેન્ચર્સ લિમિટેડમાં 0.99 ટકા હિસ્સો હસ્તગત કર્યો છે.
મુકેશ અંબાણીએ AGMમાં કહી હતી આ વાત
ઉલ્લેખનીય છે કે ગયા મહિને યોજાયેલી રિલાયન્સ ઈન્ડસ્ટ્રીઝની AGM બેઠકમાં મુકેશ અંબાણીએ કહ્યું હતું કે મુખ્ય વૈશ્વિક વ્યૂહાત્મક અને નાણાકીય રોકાણકારોએ રિલાયન્સ રિટેલમાં મોટો રસ દાખવ્યો છે. શેરધારકોને સંબોધતા તેમણે કહ્યું હતું કે જો RRVL સ્ટોક એક્સચેન્જમાં લિસ્ટેડ થાય છે તો તે વર્તમાન મૂલ્યાંકનના આધારે દેશની ટોચની 4 લિસ્ટેડ કંપનીઓમાંની એક હશે. મુકેશ અંબાણીએ કહ્યું કે રિલાયન્સ રિટેલનું મૂલ્યાંકન ત્રણ વર્ષથી ઓછા સમયમાં બમણું થઈ ગયું છે.
