નેતન્યાહુનો એર્દોગનની હિટલરની ટિપ્પણી પર વળતો પ્રહાર, કહ્યું-તુર્કીએ કુર્દ વિરુદ્ધ કર્યો નરસંહાર

• ઇઝરાયેલ અને તુર્કીના વડાઓ વચ્ચે શબ્દોનું યુદ્ધ
  
• ગાઝા પર નેતન્યાહૂની કાર્યવાહી હિટલરથી અલગ નથી:એર્દોગન
• તુર્કીએ કુર્દ વિરૂદ્ધ નરસંહાર શરૂ કર્યો છે:ઈઝરાયેલના PM

હવે તુર્કી પણ ઈઝરાયેલ-હમાસ યુદ્ધમાં ઉતરી ગયું છે. ઇઝરાયેલ અને તુર્કીના વડાઓ વચ્ચે શબ્દોનું યુદ્ધ ફાટી નીકળ્યું છે. ઈઝરાયેલના વડાપ્રધાને તુર્કીના રાષ્ટ્રપતિની હિટલરની ટિપ્પણી પર પ્રતિક્રિયા આપી છે. ઈઝરાયેલના પીએમએ કહ્યું હતું કે તુર્કીએ કુર્દ વિરૂદ્ધ નરસંહાર શરૂ કર્યો છે. પત્રકારોને જેલમાં ધકેલી રહ્યા છે. હાલમાં જ તુર્કીના રાષ્ટ્રપતિ રેસેપ તૈયપ એર્દોગને ઇઝરાયલના પીએમની તુલના હિટલર સાથે કરી હતી જેના પછી બંને નેતાઓ વચ્ચે શબ્દ યુદ્ધ શરૂ થઈ ગયું છે. એર્દોગને કહ્યું હતું કે ગાઝા પર નેતન્યાહૂની કાર્યવાહી હિટલરથી અલગ નથી.

નેતન્યાહુએ વળતો પ્રહાર કર્યો

એર્દોગનની ટિપ્પણીનો જવાબ આપતા ઈઝરાયેલના વડાપ્રધાન બેન્જામિન નેતન્યાહુએ કહ્યું હતું કે એર્દોગને પોતે કુર્દ વિરૂદ્ધ નરસંહાર અભિયાન શરૂ કર્યું છે. પત્રકારોને તેમના જ દેશમાં જેલમાં ધકેલી દેવામાં આવે છે. સરકાર વિરુદ્ધ બોલનારાઓને જેલમાં ધકેલી દેવામાં આવે છે. લોકોને પત્રકારોને ચૂપ કરાવવામાં તેણે વિશ્વ રેકોર્ડ હાંસલ કર્યો છે. પોતાની સેનાના વખાણ કરતા નેતન્યાહુએ કહ્યું હતું કે ઈઝરાયેલની સુરક્ષા દળો વિશ્વની શ્રેષ્ઠ સેના છે જે નૈતિક મૂલ્યોનું પાલન કરે છે. અમારા સૈનિકો હમાસ અને આઈએસઆઈએસ જેવા આતંકવાદી સંગઠનોનો નાશ કરવાનો પ્રયાસ કરી રહ્યા છે. એર્દોગન જે લોકોની પ્રશંસા કરી રહ્યા છે તે માનવતાના દુશ્મન છે.

એર્દોગન ઈઝરાયેલને લઈને વિવાદાસ્પદ ટિપ્પણીઓ કરી ચૂક્યા છે

આ પહેલા એર્દોગને ઈઝરાયેલને આતંકવાદી રાજ્ય જાહેર કર્યું હતું. તેમણે કહ્યું હતું કે ઈઝરાયેલ સરકાર અને ઈઝરાયેલના લોકો એક શહેરને બરબાદ કરવાનો પૂરો પ્રયાસ કરી રહ્યા છે. હું સ્પષ્ટપણે કહું છું કે ઈઝરાયેલ એક આતંકવાદી રાજ્ય છે. તુર્કીના રાષ્ટ્રપતિએ વચન આપ્યું છે કે ગાઝામાં માનવતાની હત્યા અંગે ઇઝરાયલના નેતાઓ અને લશ્કરી અધિકારીઓ આંતરરાષ્ટ્રીય અદાલતોમાં ટ્રાયલનો સામનો કરશે. એર્દોગને એક વખત કહ્યું હતું કે હમાસ આતંકવાદી સંગઠન નથી. તે એક મુજાહિદ્દીન છે જે તેની જમીનની રક્ષા કરે છે.