નેધરલેન્ડના એસેન શહેરમાં સ્થિત ઐતિહાસિક ડ્રેન્ટ્સ મ્યુઝિયમમાં થયેલી ચોરીની ઘટના બિલકુલ બોલિવૂડ ફિલ્મ ‘ધૂમ-2’ની વાર્તા જેવી લાગે છે. ચોરોએ વિસ્ફોટનો ઉપયોગ કરીને મ્યુઝિયમમાં પ્રવેશવાનો રસ્તો બનાવ્યો અને શનિવારે સવારે ચોરીને અંજામ આપ્યો. ચોરી દરમિયાન સેંકડો વર્ષ જૂની કિંમતી ચીજવસ્તુઓ ગુમ થઈ ગઈ હતી. તે સમયે આ મ્યુઝિયમમાં ‘ડેસિયા – એમ્પાયર ઓફ ગોલ્ડ એન્ડ સિલ્વર’ નામનું એક પ્રદર્શન ચાલી રહ્યું હતું, જે પ્રાચીન કલાકૃતિઓના પ્રદર્શન માટે પ્રખ્યાત હતું. આ પ્રદર્શન તેના છેલ્લા સપ્તાહમાં હતું.
2500 વર્ષ જૂનો સોનાનો મુગટ ચોરાઈ ગયો
એસેનના ડ્રેન્ટ્સ મ્યુઝિયમમાં સોના અને ચાંદીથી બનેલા રોમાનિયન જ્વેલરીના ચાલી રહેલા પ્રદર્શનમાં ચોરીની એક મોટી ઘટના પ્રકાશમાં આવી છે. ચોરો કોટોફેનેશિયન સમયગાળાના ત્રણ ડેસિયન સોનાના બંગડી અને ભવ્ય રીતે શણગારેલી હેલ્મેટ લઈ ગયા હતા. આ અમૂલ્ય હેલ્મેટ અંદાજે 2500 વર્ષ જૂનું છે અને તે પ્રદર્શનનું મુખ્ય આકર્ષણ હતું. ડ્રેન્ટ્સ મ્યુઝિયમના ડિરેક્ટર હેરી તુપને આ ઘટના પર શોક વ્યક્ત કર્યો અને કહ્યું કે આપણા 170 વર્ષના ઈતિહાસમાં આ સૌથી મોટી ઘટના છે.
મ્યુઝિયમમાં 600થી વધુ સોના-ચાંદીના ઘરેણા રાખવામાં આવ્યા હતા
ચોરીની આ ઘટના બાદ પોલીસે તાત્કાલિક તપાસ શરૂ કરી છે. એક શંકાસ્પદ વાહનની તપાસ કરવામાં આવી રહી છે અને પોલીસ વિસ્ફોટ અને નજીકના લોકો પાસેથી ઘટના સંબંધિત માહિતી એકઠી કરી રહી છે. આ એક્ઝિબિશનમાં રોમાનિયાના 15થી વધુ મ્યુઝિયમમાંથી લાવેલા 600થી વધુ સોના-ચાંદીના ઘરેણાં પ્રદર્શિત કરવામાં આવ્યા હતા. રોમાનિયાના સંસ્કૃતિ મંત્રાલયે ચોરાયેલી વસ્તુઓને પુનઃપ્રાપ્ત કરવા માટે દરેક સંભવિત પગલાં લેવાનું વચન આપ્યું છે, જે બુકારેસ્ટમાં ડચ મ્યુઝિયમને લોન આપવામાં આવી હતી. વધુમાં, એક રોમાનિયન પ્રતિનિધિમંડળ સ્થળની મુલાકાત લેશે.
પોલીસ ઘટનાની તપાસ કરી રહી છે
પોલીસે ખુલાસો કર્યો કે શનિવારે સવારે 4:15 વાગ્યે ગ્રોલરસ્ટ્રેટ અને મારવિજકસૂર્ડના આંતરછેદ પર કારમાં આગ લાગવાની જાણ થઈ હતી. ઘટનાસ્થળે બળી ગયેલી કારની નજીક કોઈ વ્યક્તિ મળી આવી ન હતી. એવું માનવામાં આવે છે કે કારમાં સવાર લોકો અન્ય વાહનમાં ભાગી ગયા હોઈ શકે છે અને આ ડ્રેન્ટ્સ મ્યુઝિયમની ચોરી સાથે સંબંધિત હોઈ શકે છે. આ મામલાની ગંભીરતાને ધ્યાનમાં લઈને પોલીસ અને ઈન્ટરપોલની ટીમો મળીને આ ચોરીનો ભેદ ઉકેલી રહી છે.
