મુંબઈ સ્થિત નીતા મુકેશ અંબાણી કલ્ચરલ સેન્ટર (NMACC)એ ભારતની કલા, સંસ્કૃતિ અને પરંપરાઓને આંતરરાષ્ટ્રીય સ્તરે પ્રદર્શિત કરવાના ઉદ્દેશ્ય સાથે ન્યુયોર્ક શહેરમાં ‘ઈન્ડિયા વીકેન્ડ’નું આયોજન કરવાની જાહેરાત કરી છે. આ ઐતિહાસિક કાર્યક્રમ 12થી 14 સપ્ટેમ્બર 2025 દરમિયાન અમેરિકાના પ્રખ્યાત લિંકન સેન્ટર ફોર ધ પર્ફોર્મિંગ આર્ટ્સ ખાતે યોજાશે. આ પહેલને ભારતીય સંસ્કૃતિને વૈશ્વિક પ્લેટફોર્મ પર રજૂ કરવાની દિશામાં એક મોટું પગલું માનવામાં આવી રહ્યું છે.
100થી વધુ કલાકારો લેશે ભાગ
આ કાર્યક્રમ 12 સપ્ટેમ્બરે ‘ધ ગ્રેટ ઈન્ડિયન મ્યુઝિકલ: સિવિલાઈઝેશન ટુ નેશન’ ના યુએસ પ્રીમિયર સાથે શરૂ થશે. આ સંગીતમય નાટકનું દિગ્દર્શન પ્રખ્યાત થિયેટર દિગ્દર્શક ફિરોઝ અબ્બાસ ખાન દ્વારા કરવામાં આવ્યું છે અને તેમાં 100થી વધુ કલાકારો ભાગ લેશે. આ ભવ્ય પ્રસ્તુતિમાં સિંધુ ખીણ સભ્યતાથી 1947ની સ્વતંત્રતા સુધીના ભારતના 5000 વર્ષના ઈતિહાસની સફર સંગીત, નૃત્ય, નાટક અને પોશાક પણ દ્વારા દર્શાવવામાં આવશે. આ શોમાં ભારતીય પ્રતિભાઓની સાથે અન્ય આંતરરાષ્ટ્રીય કલાકારોનો પણ સમાવેશ કરવામાં આવશે.
ન્યૂયોર્ક શહેરમાં ‘ઈન્ડિયા વીકેન્ડ’ લાવવાનો આનંદ: નીતા અંબાણી
NMACCના સ્થાપક અને રિલાયન્સ ફાઉન્ડેશનના અધ્યક્ષ નીતા અંબાણીએ જણાવ્યું હતું કે, “અમે પહેલી વાર ન્યૂયોર્ક શહેરમાં ‘ઈન્ડિયા વીકેન્ડ’ લાવવાનો આનંદ અનુભવીએ છીએ. આ કાર્યક્રમ ભારતના કલા, હસ્તકલા, સંગીત, નૃત્ય, ફેશન અને ખોરાકના સમૃદ્ધ સાંસ્કૃતિક વારસાની ઉજવણી છે. અમારો ઉદ્દેશ્ય વિશ્વ સમક્ષ ભારતની મહાનતા દર્શાવવાનો છે.”
આ કાર્યક્રમ વિશ્વને ભારતની વિવિધતા અને સાંસ્કૃતિક વારસાનો પરિચય પણ કરાવશે
આ ત્રણ દિવસીય મહોત્સવમાં સંગીત, થિયેટર, ફેશન શો, ભારતીય ભોજન અને પરંપરાગત હસ્તકલાના ખાસ પ્રદર્શન રજૂ કરવામાં આવશે. આ કાર્યક્રમ ફક્ત ભારતીય મૂળના લોકોને તેમના મૂળ સાથે જોડશે નહીં, પરંતુ સમગ્ર વિશ્વને ભારતની વિવિધતા અને સાંસ્કૃતિક વારસાનો પરિચય પણ કરાવશે. ‘ઈન્ડિયા વીકેન્ડ’ એ ભારતીય સંસ્કૃતિની વૈશ્વિક હાજરીને વધુ મજબૂત બનાવવાનો કાર્યક્રમ હશે, જેના દ્વારા ભારતની કલાત્મકતા અને પરંપરાઓ વિશ્વ મંચ પર વધુ મજબૂત રીતે ઉભરી આવશે.
