અમેરિકા અને ઉત્તર કોરિયા વચ્ચેના તણાવ વચ્ચે કિમ જોંગ ઉન પોતાની વધતી જતી સૈન્ય ક્ષમતાઓનું પ્રદર્શન કરી રહ્યા છે. ઉત્તર કોરિયાના નેતા કિમ જોંગ ઉનના મિસાઈલો પ્રત્યેના પ્રેમથી દુનિયા વાકેફ છે. પરંતુ, હવે કિમને ડ્રોન પણ પસંદ આવવા લાગ્યા છે. ઉત્તર કોરિયાના નેતા કિમ જોંગ ઉને લક્ષ્યો પર હુમલો કરવા માટે રચાયેલ વિશેષ આત્મઘાતી ડ્રોનનું પ્રદર્શન નિહાળ્યું હતું. ખાસ વાત એ છે કે કિમ જોંગ ઉને હવે એઆઈ ટેક્નોલોજીથી સજ્જ સુસાઈડ ડ્રોન બનાવ્યા છે.
કિમે AI ટેક્નોલોજી પર ભાર મૂક્યો હતો
ઉત્તર કોરિયાના સત્તાવાર અહેવાલ અનુસાર, કિમે કહ્યું કે આધુનિક હથિયારોના વિકાસમાં માનવરહિત ઉપકરણો અને AI ટેક્નોલોજીને ખૂબ મહત્વ આપવું જોઈએ. કિમ જોંગ ઉને નવા અને અદ્યતન જાસૂસી ડ્રોનનું પણ નિરીક્ષણ કર્યું. આ ડ્રોન જમીન અને સમુદ્ર પર દુશ્મનોના લક્ષ્યો અને ગતિવિધિઓને શોધી કાઢવામાં સક્ષમ છે. કિમે કહ્યું કે સૈન્યને આધુનિક બનાવવા માટે આપણે માનવરહિત ઉપકરણો અને AIને પ્રાથમિકતા આપવી જોઈએ.
કિમ એક મોટા ડ્રોન પાસે દેખાયા
ઉત્તર કોરિયા સહિત કેટલાક મીડિયામાં પણ ડ્રોન પર હુમલો કરતા અને ટેન્ક જેવા લક્ષ્યને વિસ્ફોટ કરતા હોય તેવા ફોટા જાહેર કર્યા હતા. કિમ તેના સહાયકો સાથે એક મોટા ડ્રોન પાસે ઊભા જોવા મળે છે. કિમે જાસૂસી, ગુપ્ત માહિતી એકત્ર કરવા, ઈલેક્ટ્રોનિક જામિંગ અને હુમલા માટે નવા વિકસિત સાધનોનું પણ અલગથી નિરીક્ષણ કર્યું હતું. તેમણે કહ્યું કે આ ટેક્નોલોજીઓને ઝડપથી વિકસાવવી અને તેને સેનામાં સામેલ કરવી જરૂરી છે. ઉત્તર કોરિયાના આ પગલાને તેની સૈન્ય તાકાત વધારવાના પ્રયાસનો એક ભાગ માનવામાં આવે છે.
આ પહેલા પણ આત્મઘાતી ડ્રોનનું પરીક્ષણ કરવામાં આવ્યું છે
ઉત્તર કોરિયાએ છેલ્લા કેટલાક સમયથી આત્મઘાતી ડ્રોન સહિત ડ્રોનના વિકાસ પર ભાર મૂક્યો છે. આ પ્રોજેક્ટ છેલ્લા એક વર્ષમાં રશિયા સાથે વધી રહેલી સૈન્ય ભાગીદારીનો એક ભાગ છે. રશિયા અને યુક્રેન વચ્ચે ચાલી રહેલા યુદ્ધમાં ઉત્તર કોરિયાએ પણ પોતાના સૈનિકો મોકલ્યા છે. આ પહેલા ઓગસ્ટ 2024માં પણ કિમે આત્મઘાતી ડ્રોનનું પરીક્ષણ નિહાળ્યું હતું અને કહ્યું હતું કે સેનાને શક્ય તેટલી વહેલી તકે તેમનાથી સજ્જ કરવામાં આવે.
