ક્રિકેટના કિંગનો મહારેકોર્ડ, સચિનની સામે વાનખેડેમાં વિરાટની 50મી સદી

• વિરાટ કોહલીએ ODI ફોર્મેટમાં 50 સદી ફટકારી
  
• વિરાટ કોહલીએ આંતરરાષ્ટ્રીય ક્રિકેટમાં 80 સદી ફટકારી
  
• કોહલીએ વર્લ્ડકપમાં એક સિઝનમાં બનાવ્યા સૌથી વધુ રન

વિરાટ કોહલીએ મુંબઈના વાનખેડે સ્ટેડિયમમાં ઐતિહાસિક ઇનિંગ રમી હતી અને વર્લ્ડકપ 2023ની સેમિફાઇનલમાં ન્યૂઝીલેન્ડ સામે સદી ફટકારી હતી. આ સદી સાથે કિંગ કોહલીએ સચિન તેંડુલકરનો વનડેમાં સૌથી વધુ સદી ફટકારવાનો રેકોર્ડ તોડી નાખ્યો હતો. કોહલીએ 106 બોલમાં 8 ચોગ્ગા અને 1 છગ્ગાની મદદથી પોતાની સદી પૂરી કરી હતી. કોહલીની આ 50મી ODI સદી હતી અને તે ODI ફોર્મેટમાં 50 સદી ફટકારનાર પ્રથમ બેટ્સમેન બન્યો હતો.

ODI ફોર્મેટમાં 50 સદી ફટકારી

પૂર્વ ભારતીય દિગ્ગજ સચિન તેંડુલકરે પોતાની કારકિર્દીમાં 49 ODI સદી ફટકારી હતી, પરંતુ હવે કોહલીએ આ દિગ્ગજનો રેકોર્ડ તોડી નાખ્યો છે. દિગ્ગજ તેંડુલકરે પોતાની કારકિર્દીમાં 463 ODI મેચ રમી હતી. કિંગ કોહલી તેની 291મી ODI મેચ રમી રહ્યો છે. આ સિવાય કોહલીએ વર્લ્ડ કપની એક જ આવૃત્તિમાં સૌથી વધુ રન બનાવવાનો રેકોર્ડ પણ બનાવ્યો હતો. આ મામલે પણ કોહલીએ સચિન તેંડુલકરને પાછળ છોડ્યા હતા.

વર્લ્ડકપમાં સૌથી વધુ રન

કોહલી પહેલા સચિન તેંડુલકરે વર્લ્ડ કપની એક આવૃત્તિમાં સૌથી વધુ રન બનાવ્યા હતા. સચિને 2003ના વર્લ્ડ કપમાં 673 રન બનાવ્યા હતા. પરંતુ હવે આ રેકોર્ડમાં કોહલીનું નામ પણ લખાઈ ગયું છે. વર્લ્ડ કપના 48 વર્ષ જૂના ઈતિહાસમાં કોહલી એક જ એડિશનમાં સૌથી વધુ રન બનાવનાર બેટ્સમેન બની ગયો છે.

સૌથી વધુ આંતરરાષ્ટ્રીય સદી ફટકારનાર બીજા બેટ્સમેન

ઉલ્લેખનીય છે કે આંતરરાષ્ટ્રીય ક્રિકેટમાં સૌથી વધુ સદી ફટકારનાર કોહલી બીજો બેટ્સમેન છે. તેની 50મી ODI સદી દ્વારા, કોહલીએ આંતરરાષ્ટ્રીય ક્રિકેટમાં તેની 80મી સદી ફટકારી હતી. વનડેમાં 50 સદી ઉપરાંત કોહલીએ ટેસ્ટ ક્રિકેટમાં 29 સદી અને T20 ઈન્ટરનેશનલમાં 1 સદી ફટકારી છે. આંતરરાષ્ટ્રીય ક્રિકેટમાં સૌથી વધુ સદી ફટકારવાનો રેકોર્ડ ભૂતપૂર્વ ભારતીય દિગ્ગજ સચિન તેંડુલકરના નામે છે, જેણે પોતાની કારકિર્દીમાં 100 સદી ફટકારી હતી.