- 8થી 10 જાન્યુઆરી વચ્ચે રાજ્યમાં માવઠાની આગાહી
- અરબ સાગરમાં ટ્રફના કારણે વરસાદની આગાહી કરાઈ
- સૌરાષ્ટ્ર અને દક્ષિણ ગુજરાતમાં વરસાદની સંભાવના
રાજ્યમાં કડકડતી ઠંડી વચ્ચે ફરી એકવાર વરસાદની આગાહી કરવામાં આવી છે. માવઠાની આ આગાહીના કારણે ખેડૂતોના જીવ પડીકે બંધાયા છે. ભર શિયાળે માવઠાના કારણે રાજ્યના અનેક ભાગમાં વરસાદની સ્થિતિ જોવા મળી શકે છે. કહેવામાં આવી રહ્યું છે કે અરબ સાગરમાં ટ્રફના કારણે વરસાદ આવશે. તો સાથે જ આ અઠવાડિયે 8-10 તારીખમાં રાજ્યના અનેક ભાગમાં વરસાદ પડશે. હવામાન વિભાગે 8થી 10 જાન્યુઆરી સુધી રાજ્યમાં વરસાદ પડી શકે તેવી આગાહી વ્યક્ત કરી છે. જેના પગલે ખેડૂતોને પાક નુકસાનીનો ડર સતાવી રહ્યો છે.
રાજ્યમાં બેવડી ઋતુનો થશે અનુભવ
હવામાન ખાતા દ્વારા વાતાવરણમાં પલટો આવવાના સંકેતો અપાતા ફરી એકવાર શિયાળાની જમાવટમાં રૂકાવાટ આવશે. હવામાન ખાતા દ્વારા કરાયેલી આગાહી મુજબ સોમવારથી દક્ષિણ ગુજરાત અને સૌરાષ્ટ્રમાં તેમજ મંગળવારથી ઉત્તર ગુજરાતમાં હળવો કમોસમી વરસાદ પડશે. વરસાદી માહોલના કારણે રાજ્યમાં બેવડી ઋતુનો વર્તારો વધશે.
શિયાળુ પાકને નુકસાન થવાની શક્યતાઓ વધી
રાજ્યમાં શિયાળાની શરૂઆત બાદ નિરંતર વાતાવરણમાં પલટો આવતાં શિયાળું પાક પર સતત નુકસાનીનો ભય મંડરાયેલો જ રહ્યો છે. છેલ્લા કેટલાક દિવસથી રાજ્યમાં માંડ ઠંડીનો ચમકારો વધતાં ખેડૂતોમાં ખુશીનો માહોલ શરૂ થયો હતો, ત્યારે હવે ખેડૂતોની ચિંતા વધે એ પ્રકારના હવામાન ખાતા દ્વારા સંકેતો આપવામાં આવ્યાં છે. હવામાન ખાતાની આગાહી મુજબ રવિવારથી જ રાજ્યના વાતાવરણમાં પલટો શરૂ થશે.
ક્યાં ક્યાં પડશે વરસાદ તે પણ જાણો
ઉત્તર ગુજરાતમાં પણ માવઠાની હવામાન વિભાગની આગાહી કરવામાં આવી છે. સૌરાષ્ટ્ર અને દક્ષિણ ગુજરાતમાં વરસાદની સંભાવના જોવા મળી રહી છે. આ સાથે જ 8 જાન્યુઆરીએ દ.ગુજરાતમાં વરસાદની શક્યતા છે. તો સાથે જ આ દિવસે નવસારી, વલસાડ, ડાંગ, દમણમાં કમોસમી વરસાદ જોવા મળશે. સૌરાષ્ટ્રમાં જૂનાગઢ, ગીર સોમનાથ અને દિવમાં વરસાદની શક્યતા છે. 9મી જાન્યુઆરીએ ઉત્તર અને મધ્ય ગુજરાતમાં માવઠાની શક્યતા છે. બનાસકાંઠા, સાબરકાંઠા, અરવલ્લી, મહિસાગરમાં માવઠાની આગાહી કરાઈ છે. તો રાજકોટ, અમરેલી, જૂનાગઢમાં કમોસમી વરસાદની સંભાવના છે.
