જેમના માટે ચાર-ચાર વખત હરાજી નિષ્ફળ ગઇ એ નિયમનો ખુદ તંત્રની મીઠી નજર હેઠળ ભંગ
સરકારી નિયમો માત્ર કહેવા પુરતા જ હોય છે, દેખાડવા જુદા હોય છે અને ચાવવાના જુદા હોય છે પછી ગમે તેવો ટીઆરપી કાંડ બને, બધુ લોલંલોલ જ ચાલ્યુ આવે છે અને હજુ પણ ભવિષ્યમાં લોલંલોલ જ ચાલશે અને જનતાના જીવ ઉપર કાયમ જોખમ રહેવાનું છે. રાજકોટમાં યોજાનાર લોકમેળામાં આવુ જ કંઇ થયુ છે. રાઇડસ માટે સરકારની નવી એસ.ઓ.પી.ને લઇને દિવસો સુધી વિવાદ ચાલ્યો, ચાર-ચાર વખત હરાજી નિષ્ફળ રહી એ નવા નિયમ મુજબ ફાઉન્ડેશન કર્યા વગર જ રાઇડસના જોખમી માચડાં ઉભા થઇ રહ્યા હોવાનો વિવાદ સર્જાયો છે.
રાજકોટમાં ટીઆરપી ગેમ ઝોન અગ્નિકાંડના પગલે સાવચેતીના પગલા રૂપે રાજય સરકાર દ્વારા લોકમેળાના રાઈડ સંચાલકો માટે ખાસ એસઓપી (ગાઈડલાઈન) બનાવી છે. આ એસઓપીના આકરા નિયમો સામે લોકમેળાના રાઈડ સંચાલકો અને કલેકટર તંત્ર વચ્ચે લાંબા સમય સુધી મડાગાંઠ ચાલી, ચાર-ચાર વખત હરાજી નિષ્ફળ રહી. ન તો તંત્ર ઝૂક્યુ કે ન તો કલેકટર તંત્ર ઝૂક્યુ.
આ ત્રણ મુદ્દાને લઇને મડાગાંઠ ન ઉકેલાઇ. જેમા (૧) નવા એસઓપી મુજબ ફજેતફાળકાના પાયા નાખવા માટે નવા નિયમમ મુજબ ચોક્કસ ઉંડાઇ સુધી સિમેન્ટ-ક્રોંકીટનું ફાઉન્ડેશન કરવુ ફરજિયાત છે. રાઇડસ સંચાલકોનો વિરોધ એવો હતો કે, પરમેનેન્ટ રાઇડસ હોય ત્યા આ પ્રકારનું ફાઉન્ડેશન પોંસાય પાંચ-છ દિવસ માટે આ પ્રકારે ફાઉન્ડેશન કરવા પાછળ દોઢથી પોણા બે લાખનો વધારાનો ખર્ચ થાય. જ્યારે બીજો વિરોધ એન.ડી.પી. સર્ટિફિકેટને લઇને હતો. રાઇડસના ટેકનીકલ અને ફીજીબલ ક્લીયરન્સ માટે સરકાર નિયુક્ત એજન્સી દ્વારા સર્ટીફિકેટ આપવામા આવે છે. આ સર્ટિફિકેટ માટે વધારાના રૂ.૮૦ હજાર આસપાસ ખર્ચ આવી શકે છે. જેની સામે રાઇડસ સંચાલકોનો વિરોધ હતો. આ ઉપરાંત ત્રીજો વિરોધ સોઇલ રિપોર્ટને લઇને હતો. જે જગ્યાએ ફજેતફાળકા કે અન્ય હેવી રાઇડસ નાખની હોય ત્યા જમીનની મજબૂતા માટે સોલ્ડ રિપોર્ટ કઢાવવાની જવાબદારી રાઇડસ સંચાલકો ઉપર ઢોળી દેવામા આ ખર્ચ કરવા સામે પણ વેપારીઓએ નનૈયો ભણી દીધો હતો. તંત્ર અને વર્ષોથી લોકમેળામાં રાઇડસ માટે આવતા વેપારીઓ વચ્ચે મડાગાંઠ ન ઉકેલાતા અંતે ખાનગી મેળા યોજના એક ગ્રુપને રાઇડસ માટેનો કોન્ટ્રાક્ટ આપી દેવાયો છે. હાલ મેળાની પુર્વ તૈયારી શરૂ થઇ ગઇ છે. મેદાનમાં રાઇડસ ઉભી થઇ રહી છે. જેમા સરકારની નવી એસ.ઓ.પી. મુજબના એક પણ નિયમનું પાલન થતુ નથી. સોઇલ ટેસ્ટ કર્યા વગર માચડા તો ઉભા થઇ જ રહ્યા છે પણ જેના કારણોસર ચાર-ચાર વખત હરાજી નિષ્ફળ રહી એ નવા નિયમ મુજબના ફાઉન્ડેશન વગર જ મોચના માચડાં ઉભા થઇ રહ્યા છે. જે રીતે રાઇડસ ઉભી થઇ રહી છે એ જોતા ટીઆરપી કાંડ-૨ થઇ શકે તેવુ મોકળુ મેદાન અપાઇ રહ્યુ છે એવુ કહીએ તો પણ અતિ શયોક્તિ નથી.
ફાઉન્ડેશન કરવાનું તો દૂર, લાકડાના પટ્ટા ઉપર નટ-બોલ્ટ મારીને ઉભા થતાં માચડાં
રાઇડસના પાયા નવા નિયમ મુજબની ઉંડાઇના ફાઉન્ડેશન કરી તેમા સિમેન્ટ-કોંક્રીટની ભરતી કરવાનું ફરજિયાત છે. આ પ્રકારના ફાઉન્ડેશનની વાત તો દૂરની રહી લાકડાના પટ્ટા મુકી તેના ઉપર નટ-બોલ્ટ ફીટ કરીને તોતીંગ ઉંચાઇના રાઇડસના સ્ટ્રક્ચર ઉભા થઇ રહ્યા છે. નટ-બોલ્ટ ઉપરના પાયા સાથે ઉભી થતી આવી રાઇડસ શું ઝીંક ઝીલી શકે? એવા સવાલ ઉઠાવી રહ્યા છે.
સોલડ ટેસ્ટ રિપોર્ટ આવ્યા વગર જ રાઇડસ ફીટ કરવાનું કામ ચાલુ
સોઇલ ટેસ્ટ એટલે જે જગ્યાએ રાઇડસ નાખવાની છે તેની જમીનની મજબૂત કેવી છે. તેના માટેના ટેસ્ટ તો રાઇડસ સંચાલકે કરાવ્યો છે પરંતુ હજુ સુધી તેનો રિપોર્ટ આવ્યો નથી. એ પહેલા તો લોખંડના તોતીંગ માચડાં પણ ઉભા થઇ ગયા છે. રાઇડસના કોન્ટ્રાક્ટરે એવી દલિલ કરી છે કે, રેસકોર્સની આ જમીનનું ભૂ-સ્તર મજબૂત જ છે. સોઇલ ટેસ્ટ રિપોર્ટ પાસ જઇ જ જવાનો છે. બે દિવસમાં રિપોર્ટ આવી જશે.
પ્રાઇવેટ મેળાના સંચાલક રાજકીય આગેવાનને પાછલા બારણે બખ્ખા?
જે ધંધાર્થી વર્ષોથી રાજકોટના લોકમેળામાં રાઇડસ નાખે છે તે નવા એસ.ઓ.પી.માં ફાઉન્ડેશન સહિત વધારાનો બે થી અઢી લાખનો ખર્ચ થતો હોવાનો વિરોધ કરીને આ વખતે ભાગ જ ન લીધો. અહીં માત્ર લાકડાના પટ્ટા ઉપર નટ-બોલ્ટ ફીટ કરીને તૈયાર થતી રાઇડસના કોન્ટ્રાક્ટર રાજકીય આગેવાન હોય પાછલા બારણે તેને નવા એસ.ઓ.પી. એક રાઇડસ દીઠ રૂ.બે થી અઢી લાખનો ખર્ચ કરવો ન પડે એ માટે સ્થાનિક પ્રશાસને પાછલા બારણે આંખ આડા કાન કરી લીધાની પ્રબળ આશંકા જાય છે.
