- પાકિસ્તાનના કાર્યવાહક વડાપ્રધાને કાશ્મીર મુદ્દે ભારત પર નિશાન સાધ્યું
- કાશ્મીર અંગેના અમારા વલણમાં કોઈ ફેરફાર નથી: કાકર
- કાશ્મીર મુદ્દે પાકિસ્તાન ભારત સાથે ત્રણ યુદ્ધ લડી ચુક્યું
પાકિસ્તાનના કાર્યવાહક વડાપ્રધાન અનવારુલ હક કાકરે કહ્યું છે કે તેમનો દેશ કાશ્મીરનો કાયમી ઉકેલ અને સમગ્ર દક્ષિણ એશિયામાં શાંતિ ઈચ્છે છે. ભારત તરફ ઈશારો કરતા કકરે કહ્યું હતું કે અમે શાંતિના પક્ષમાં છીએ પરંતુ કોઈએ શાંતિ માટે પાકિસ્તાનની પ્રતિબદ્ધતાને ઓછી ન આંકવી જોઈએ. શાંતિ માટેની આપણી ઈચ્છાને નબળાઈ અથવા આક્રમકતાનો સામનો કરવાની અનિચ્છા તરીકે અર્થઘટન ન કરવું જોઈએ. કાકરે ભારત સરકાર દ્વારા કાશ્મીરમાંથી કલમ 370 નાબૂદ કરવા અને ભારતીય સુપ્રીમ કોર્ટ દ્વારા તેને સમર્થન આપવા અંગે પણ ખૂબ જ આક્રમક ભાષાનો ઉપયોગ કર્યો છે.
અનવારુલ હક કાકરે PoKના મુઝફ્ફરાબાદમાં કહ્યું હતું કે, પાકિસ્તાન એવો દેશ નથી જે યુદ્ધ ઈચ્છે છે. સાથે જ એ પણ કહી દઈએ કે જો કોઈ એવું વિચારે છે કે આપણે નબળા છીએ કે અચકાઈએ છીએ તો તેણે પોતાની ગેરસમજ દૂર કરવી જોઈએ. PoK પર ભારતના હુમલા અને તેના વિલીનીકરણને લગતા સવાલ પર કાકરે કહ્યું હતું કે, આ જમીની વાસ્તવિકતાથી ઘણી દૂરની બાબતો છે. આવું કામ કોઈ ન કરી શકે તે મૂર્ખામીભર્યું પગલું હશે. આમાં અફવા સિવાય બીજું કંઈ નથી. મુઝફ્ફરાબાદ ગાઝા નથી અને નવી દિલ્હી તેલ અવીવ નથી. કોઈએ આપણા બાળકોને નુકસાન પહોંચાડવાની હિંમત ન કરવી જોઈએ.
કાશ્મીર અંગેના અમારા વલણમાં કોઈ ફેરફાર નથી: કાકર
કાકરે કહ્યું હતું કે કાશ્મીર પર પાકિસ્તાનનું વલણ બદલવાની વાતો સરહદ પારથી ફેલાયેલી અફવાઓ છે. કાશ્મીર મુદ્દે પાકિસ્તાન ભારત સાથે ત્રણ યુદ્ધ લડી ચુક્યું છે. કાશ્મીર અંગે અમારું વલણ બદલાયું નથી. કાશ્મીર પર પાકિસ્તાનનું પોતાનું સૈદ્ધાંતિક વલણ છે જેના પર તે અડગ છે. પીઓકે અને જમ્મુ-કાશ્મીર વચ્ચે કોરિડોર હોવાના પ્રશ્ન પર કાકરે કહ્યું હતું કે ભારતે કાશ્મીરીઓની હિલચાલ પર ઘણા નિયંત્રણો લાદ્યા છે. જ્યારે કાશ્મીર વિવાદ સંપૂર્ણ રીતે ઉકેલાઈ જાય ત્યારે જ કોરિડોરની કોઈપણ શક્યતા શોધી શકાય છે.
ઈઝરાયલી દળોનું આક્રમણ નિંદનીય:કાકર
કાકરે ગાઝામાં હમાસ અને ઈઝરાયલ વચ્ચે ચાલી રહેલી લડાઈ પર કહ્યું હતું કે પેલેસ્ટિનિયનો વિરુદ્ધ ઈઝરાયલી દળોનું આક્રમણ નિંદનીય છે. ગાઝા આપણા હૃદયની નજીક છે અને ઈઝરાયેલે નફરત સિવાય કંઈ કમાવ્યું નથી. કાકરે કહ્યું હતું કે પાકિસ્તાને ગાઝામાં ફિલ્ડ હોસ્પિટલ મોકલવાનો અને માનવતાવાદી સહાય બમણી કરવાનો નિર્ણય લીધો છે. ગાઝામાં તાત્કાલિક યુદ્ધવિરામ અને માનવતાવાદી કોરિડોરની સ્થાપનાની જરૂર છે અને પાકિસ્તાન સતત આ માંગણી કરી રહ્યું છે.
