સેનેટની ન્યાયિક સમિતિ સમક્ષ ઝુકરબર્ગ સહિત સો.મીડિયા કંપનીઓના માલિક હાજર

• મિસ્ટર ઝુકરબર્ગ, તમારા અને અન્ય કંપનીના હાથ લોહીથી ખરડાયેલા છે
• ઓનલાઇન માધ્યમો પર બાળકોનાં થઇ રહેલાં શોષણ,જાતીય અપરાધોને મુદ્દે સુનાવણી
  
•  ભારતીય સમય મુજબ રાતે સાડા આઠ વાગે સુનાવણી શરૂ થઇ હતી
  

કેપિટલ હિલ ખાતે બુધવારે સેનેટની ન્યાયિક સમિતિ સમક્ષ સોશિયલ મીડિયા પ્લેટફોર્મ કંપનીના માલિકો પૂછપરછ માટે હાજર રહ્યા હતા. સેનેટર લિંડસે ગ્રેહામે સુનાવણીની શરૂઆત કરતાં જણાવ્યું હતું કે, ‘મિસ્ટર ઝુકરબર્ગ, તમે અને અમારી સમક્ષ ઊભેલી બાકીની સોશિયલ મીડિયા કંપનીના હાથ લોહીથી ખરડાયેલા છે.

સેનેટમાં ફેસબુક અને ઇન્સ્ટાગ્રામની માલિકી ધરાવતી કંપની મેટાની સાથોસાથ ટિકટોક, એક્સ, ડિસ્કોર્ડ અને સ્નેપ કંપનીના ટોચના અધિકારીઓ સુનાવણી માટે હાજર રહ્યા હતા. ઓનલાઇન માધ્યમોથી બાળકોના થઇ રહેલા શોષણ, જાતીય અપરાધો અને તેને કારણે બાળકોની કથળી રહેલી મનઃસ્થિતિના મુદ્દે સેનેટની ન્યાયિક બાબતની સમિતિ આ કંપનીઓના ટોચના અધિકારીઓની સુનાવણી કરી રહી છે. ભારતીય સમય મુજબ રાતે સાડા આઠ વાગે સુનાવણી શરૂ થઇ હતી. ઝુકરબર્ગ હોલમાં આવતાં જ આત્મહત્યા કરી ચૂકેલા પોતાના બાળકોની તસવીરો સાથે સેનેટમાં હાજર રહેલા વાલીઓ ચિત્કાર ભર્યું રુદન કરવા લાગ્યા હતા.

ઝુકરબર્ગે દલીલ પછી વાલીઓની માંગી માફી

માર્ક ઝુકરબર્ગે બચાવમાં દલીલ કરી કે સોશિયલ મીડિયાના માધ્યમથી કિશોરવયનાં બાળકોનું માનસિક આરોગ્ય કથળી રહ્યું હોવાનું સાબિત કરી શકે તેવો કોઇ વૈજ્ઞાનિક અભ્યાસ હજી સામે નથી આવ્યો. તેમણે દાવો કર્યો કે મેટા એપ બાળકોના માનસ પર હકારાત્મક પ્રભાવ સર્જે છે. તેને સુરક્ષિત કરવા અને રાતે લોગઓફ કરવાના ફીચર જોડવા કંપનીએ 500 કરોડ ડોલર ખર્ચ કર્યા છે. જોકે સમિતિ સમક્ષ પોતાના બાળકોની વ્યથા ઠાલવી ચુકેલા વાલીઓએ માફી માટે આગ્રહ કરતાં ઝકરબર્ગે વાલીઓની માફી માંગી હતી.