પહેલગામ હુમલાની પાકિસ્તાનના શેરબજાર પર અસર જોવા મળી. આજે પાકિસ્તાનના શેરબજારમાં મોટો ઘટાડો નોંધાયો. ભારત અને પાકિસ્તાન વચ્ચે વધતા તણાવ વચ્ચે, પાકિસ્તાની શેરબજાર ક્રેશ થયું છે. કરાચી 100 (KSE) ઇન્ડેક્સ 2.19 ટકા અથવા 2500 પોઈન્ટથી વધુ ઘટ્યો. ભારત તરફથી કાર્યવાહીના ડરને કારણે આ ઘટાડો થયો છે.
પાકિસ્તાનનું માનવું છે કે ભારતીય સેના 36 કલાકની અંદર પાકિસ્તાન વિરુદ્ધ કોઈ મોટી કાર્યવાહી કરી શકે છે. જેના કારણે પાકિસ્તાની રોકાણકારો બજારમાં ભારે વેચવાલી કરી રહ્યા છે અને બજારમાં ભારે ઘટાડો જોવા મળ્યો છે. છેલ્લા કેટલાક દિવસોમાં, કરાચી 100 ઇન્ડેક્સ 120,000 થી ઘટીને 112,338.16 પર આવી ગયો છે.
ઇસ્માઇલ ઇકબાલ સિક્યોરિટીઝના સીઇઓ અહફાઝ મુસ્તફાએ જણાવ્યું હતું કે બજાર મંત્રીઓના નિવેદન પર પ્રતિક્રિયા આપી રહ્યું છે. પાકિસ્તાની મંત્રીઓનું કહેવું છે કે આગામી 24 થી 36 કલાકમાં ભારત તરફથી કાર્યવાહી જોવા મળી શકે છે. આ કારણે, લોકો સલામતીની શોધમાં ભાગી રહ્યા છે અને હાલ પૂરતો સ્ટોક છોડી રહ્યા છે.
