ભારતે પાકિસ્તાનના આતંકી ઠેકાણાઓ પર કરેલા હુમલા બાદ પાકિસ્તાને જમ્મુ અને કાશ્મીરમાં નિયંત્રણ રેખા નજીકના આગળના વિસ્તારોમાં ભારે ગોળીબાર કર્યો છે. આ હુમલામાં 4 બાળકો સહિત 10થી વધુ લોકોના મોત થયા છે. જ્યારે 40થી વધુ લોકો ઘાયલ થયા હોવાની જાણકારી મળી રહી છે. મળતી માહિતી મુજબ, ભારતના મિસાઈલ હુમલા બાદ પાકિસ્તાની સેનાએ બુધવારે મોડી રાત્રે LoC નજીકના આગળના વિસ્તારોમાં તરત જ જવાબી કાર્યવાહી શરૂ કરી દીધી. આ દરમિયાન પાકિસ્તાની સેનાએ મોર્ટાર પણ છોડ્યા છે.
જોકે, ભારતીય સેનાએ ગોળીબારનો યોગ્ય જવાબ આપ્યો છે. ભારતીય સેનાની કાર્યવાહીમાં દુશ્મન પક્ષના ઘણા લોકો પણ માર્યા ગયા છે. આ સમય દરમિયાન, ભારતે પાકિસ્તાનની ઘણી ચોકીઓનો પણ નાશ કર્યો છે. પાકિસ્તાને પૂંછમાં નિયંત્રણ રેખાના તમામ વિસ્તારોમાંથી ગોળીબાર કર્યો. આ ઉપરાંત, રાજૌરી અને કુપવાડાના ઉરી, કરનાહ અને તંગધાર સેક્ટરના આગળના વિસ્તારોમાં પણ ગોળીબાર કરવામાં આવ્યો છે.
13 લોકોના થયા મોત
રાત્રે લગભગ 2 વાગ્યે સમગ્ર સરહદી વિસ્તારોમાં આ ગોળીબાર શરૂ થયો. અંધાધૂંધ ગોળીબારને કારણે ઘણા ઘરોને નુકસાન થયું છે, વાહનો બળી ગયા અને દુકાનોને નુકસાન થયું છે. અધિકારીએ જણાવ્યું હતું કે પાકિસ્તાન દ્વારા ભારે તોપખાના અને મોર્ટારનો ઉપયોગ કરવામાં આવ્યો હતો. માનકોટ, મેંધાર, થાંડી કાસી અને પૂંછ શહેરના ડઝનબંધ આગળના ગામડાઓ અને ગીચ વસ્તીવાળા વિસ્તારોને નિશાન બનાવવામાં આવ્યા હતા. પાકિસ્તાનના ગોળીબારમાં જીવ ગુમાવનારા ભારતીયોમાં 13 લોકોનો સમાવેશ થાય છે.
સેનાના અધિકારીઓએ જણાવ્યું હતું કે અત્યાર સુધીમાં 12 લોકોના નામ જાહેર કરવામાં આવ્યા છે, જ્યારે એકનું કોઈ ઠેકાણું હજુ સુધી જાણી શકાયું નથી. અધિકારીઓએ જણાવ્યું હતું કે બારામુલ્લાના ઉરી સેક્ટરમાં સરહદ પારથી થયેલા ગોળીબારમાં 5 સગીર બાળકો સહિત 10 લોકો ઘાયલ થયા હતા, જ્યારે રાજૌરીમાં ત્રણ અન્ય લોકો ઘાયલ થયા હતા.
ભારતે પહેલગામનો લીધો બદલો
પહેલગામ આતંકવાદી હુમલાનો બદલો લેવા માટે ભારતે 7 મેની રાત્રે ઓપરેશન સિંદૂર શરૂ કર્યું અને પાકિસ્તાન પર હુમલો કર્યો હતો. આ હુમલામાં 100થી વધુ આતંકવાદીઓ માર્યા ગયા છે. ભારતે પાકિસ્તાનમાં લગભગ 9 ઠેકાણાઓ પર હુમલો કર્યો. 25 મિનિટ ચાલેલા આ ઓપરેશનમાં પાકિસ્તાન અને પીઓકેમાં અનેક આતંકવાદી ઠેકાણાઓનો નાશ કરવામાં આવ્યો છે.
