- આગામી ઓગસ્ટ મહિનામાં પાકિસ્તાન ઈન્ટરનેશનલ એરલાઈન્સની બોલી લાગશે
- પાડોશી દેશમાં મોંઘવારી, સરકારી ખર્ચાઓને પહોંચવા આખરે સરકારે પ્રાઈવેટાઈઝેશનનો માર્ગ કર્યો પસંદ
- નુકસાની વેઠી રહેલી પાકિસ્તાન ઈન્ટરનેશનલ એરલાઈન્સનું ખાનગીકરણ થશે
પાડોશી દેશમાં મોંઘવારી અને સરકારી ખર્ચાઓને લીધે હવે સરકાર ધીમે-ધીમે બધી કંપનીઓનું ખાનગીકરણ કરી રહી છે. આ ક્રમમાં પાકિસ્તાન ઈન્ટરનેશનલ એરલાઇન્સ (PIA)ની લાંબા સમયથી રાહ જોવાતું ખાનગીકરણ ઓગસ્ટ 2024ની શરૂઆતમાં થવાની ધારણા છે. 26 જૂનના રોજ આ ખાનગીકરણ પ્રક્રિયા માટે કુલ છ કંપનીઓની પસંદગી કરવામાં આવી છે અને આ કંપનીઓએ PIA વિશે વિગતવાર માહિતી માંગી છે.
પાકિસ્તાનની આર્થિક સ્થિતિ ખૂબ જ ખરાબ થઈ રહી છે. દેશમાં પેટ્રોલ અને ડીઝલની પણ અછત છે. સરકાર લાંબા સમયથી ખોટમાં ચાલી રહેલી પાકિસ્તાન ઇન્ટરનેશનલ એરલાઇન્સના ખાનગીકરણ પર વિચાર કરી રહી છે. દરમિયાન, પાકિસ્તાન સરકારે એરલાઈન્સના ખાનગીકરણની તારીખ જાહેર કરી છે.
મળતી માહિતી અનુસાર, શોર્ટલિસ્ટેડ કંપનીઓએ રાષ્ટ્રીય એરલાઈનના નાણાકીય મુદ્દાઓની સમીક્ષા કરવા માટે જુલાઈ સુધીનો સમય માંગ્યો છે. દરમિયાન, અધિકારીઓ શોર્ટલિસ્ટેડ કંપનીઓના કન્સોર્ટિયમને જરૂરી માહિતી અને ડેટા પ્રદાન કરી રહ્યા છે.
છ કંપનીઓની ટીમ બિડ કરશે
મળતી વિગતો પ્રમાણે, અત્રે ઉલ્લેખ કરવો યોગ્ય છે કે છ કંપનીઓના કન્સોર્ટિયમે પાકિસ્તાન ઈન્ટરનેશનલ એરલાઇન્સ (પીઆઇએ) ના ખાનગીકરણ માટે પૂર્વ-લાયકાત પ્રાપ્ત કરી છે. વિગતો મુજબ, પ્રી-ક્વોલિફાઈડ કન્સોર્ટિયમમાં સમાવિષ્ટ કંપનીઓ હવે પીઆઈએ માટે બિડિંગ પ્રક્રિયામાં ભાગ લેવા માટે પાત્ર બનશે. ફેડરલ ખાનગીકરણ મંત્રી અલીમ ખાનની અધ્યક્ષતામાં ખાનગીકરણ કમિશન બોર્ડની બેઠક દરમિયાન આ નિર્ણયો લેવામાં આવ્યા હતા.
