- પાકિસ્તાનમાં કુલ 88 સરકારી કંપનીઓ છે જેનું સંચાલન સરકાર કરે છે
- વિશ્વમાં પૈસા માટે ભટકતા પાકિસ્તાને હવે દેશની તમામ સરકારી કંપનીઓ વેચવાનો નિર્ણય લીધો
- પાકિસ્તાન સરકારના નિર્ણયથી ત્યાંના નાગરિકોમાં નારાજગી
ગંભીર આર્થિક સંકટમાંથી પસાર થતા પાડોશી દેશ પાકિસ્તાને તમામ સરકારી કંપનીઓને વેચવાનો નિર્ણય લીધો છે. જેથી પાકિસ્તાનમાં આ નિર્ણયને લઈ ભૂકંપ જેવી સ્થિતિ સર્જાઈ છે. પાકિસ્તાનના લોકો આનાથી ઘણા નારાજ છે. લોકોને લાગે છે કે સરકારી કંપનીઓને વેચી દીધા પછી બધું મોંઘું થઈ જશે. આ મુદ્દાને લઈ એક પાકિસ્તાની યૂ-ટ્યૂબરે લોકો પાસે મંતવ્ય જાણ્યા અને લોકો સાથે વાતચીત કરી હતી.
પાકિસ્તાનના એક યૂ-ટ્યૂબરે એક પાકિસ્તાની વ્યક્તિને પૂછ્યું કે પાકિસ્તાન પોતાની તમામ સરકારી કંપનીઓ વેચી રહ્યું છે. તેના જવાબમાં પાકિસ્તાની વ્યક્તિએ કહ્યું, ‘જ્યારે અમારા ઘરમાં પૈસા નથી, ત્યારે અમે ફક્ત ઘરના વાસણો વેચીએ છીએ. વ્યક્તિએ કહ્યું કે સરકારી કંપનીઓ વેચ્યા પછી સરકારને પૈસા મળશે, પરંતુ જે તેને ખરીદશે તે મનસ્વી રીતે કામ કરશે અને વસ્તુઓના દરમાં વધારો કરશે, જેનો બોજ જનતા પર પડશે.
પાકિસ્તાનના પૈસા વિદેશમાં-પાકિસ્તાની
પાકિસ્તાની વ્યક્તિએ કહ્યું કે અમે સાઉદી તરફ એક બિલિયન ડૉલર માટે હાથ લંબાવી રહ્યા છીએ, જ્યારે પાકિસ્તાનીઓ પાસે સેંકડો બિલિયન ડૉલર વિદેશમાં છે. તે વ્યક્તિએ કહ્યું કે જ્યાં સુધી પાકિસ્તાનના વિદેશમાં જમા થયેલા પૈસા પરત નહીં આવે ત્યાં સુધી પાકિસ્તાનની સ્થિતિ સુધરી શકે નહીં. નવાઝ શરીફ અગાઉના વડાપ્રધાનોને ભિખારી કહેતા હતા અને આજે તેમના ભાઈ જ આખી દુનિયામાંથી માંગણી કરી રહ્યા છે. તે વ્યક્તિએ કહ્યું કે પાકિસ્તાનની પરિસ્થિતિ સુધારવા માટે વિદેશમાં જમા પાકિસ્તાનના પૈસા પાછા લાવવા જોઈએ. જેથી પાકિસ્તાનની વર્તમાન સ્થિતિમાં સુધારો આવે.
પાકિસ્તાનમાં કેટલી સરકારી કંપનીઓ છે?
આમ જોવા જઈએ તો પાકિસ્તાન સરકારે પહેલેથી જ જાહેરાત કરી છે કે દેશની તમામ સરકારી કંપનીઓનું ખાનગીકરણ કરવામાં આવશે. પછી ભલે તે નુકસાનમાં હોય કે નફામાં. શાહબાઝ શરીફે કહ્યું છે કે ‘સરકારનું કામ બિઝનેસ કરવાનું નથી. સરકારનું કામ દેશમાં બિઝનેસ અને રોકાણ માટે સારું વાતાવરણ પૂરું પાડવાનું છે’ મળતી માહિતી અનુસાર, પાકિસ્તાન સરકાર ફક્ત તે જ કંપનીઓને રાખશે. જે વ્યૂહાત્મક રીતે જરૂરી છે. પાકિસ્તાનના નાણા મંત્રાલય અનુસાર, પાકિસ્તાનમાં કુલ 88 સરકારી કંપનીઓ છે.
