- પથુમ નિસંકાએ અફઘાનિસ્તાન સામે ઐતિહાસિક ઇનિંગ રમી
- વનડેમાં બેવડી સદી ફટકારનાર શ્રીલંકાનો પ્રથમ બેટ્સમેન બન્યો
- ભારતીય કેપ્ટન રોહિત શર્મા આ યાદીમાં ટોપ પર છે
શ્રીલંકાના બેટ્સમેન પથુમ નિસંકાએ અફઘાનિસ્તાન સામેની વનડે સિરીઝની પ્રથમ મેચમાં 210 રનની ઐતિહાસિક ઇનિંગ રમી હતી. આ ઇનિંગમાં નિસંકાએ 139 બોલનો સામનો કર્યો અને 20 ફોર અને 8 સિક્સ ફટકાર્યા હતા. તે વનડેમાં બેવડી સદી ફટકારનાર શ્રીલંકાનો પ્રથમ બેટ્સમેન પણ બન્યો હતો. આ સાથે જ તેણે વનડે મેચની એક ઇનિંગમાં પાંચમો સર્વોચ્ચ સ્કોરર બન્યો. ભારતીય કેપ્ટન રોહિત શર્મા આ યાદીમાં ટોપ પર છે, જેણે 2014માં શ્રીલંકા સામે 264 રન બનાવ્યા હતા. હવે તે એક ODI ઇનિંગ્સમાં શ્રીલંકા માટે સૌથી વધુ રન બનાવનાર બેટ્સમેન બની ગયો છે.
જયસૂર્યાનો 24 વર્ષ જૂનો રેકોર્ડ તોડ્યો
જ્યારે આ પહેલા શ્રીલંકાના કોઈપણ બેટ્સમેનનો સર્વશ્રેષ્ઠ સ્કોર 189 રન હતો જે સનથ જયસૂર્યાએ બનાવ્યો હતો. જયસૂર્યાએ 2000માં ભારત સામે 189 રનની ઇનિંગ રમી હતી. હવે 24 વર્ષ બાદ 2024માં નિસંકાએ અફઘાનિસ્તાન સામે 210 રન બનાવીને ઈતિહાસ રચ્યો હતો. તેણે 2018માં ઝિમ્બાબ્વે સામે 210 રન બનાવનાર પાકિસ્તાનના ફખર ઝમાનની પણ બરાબરી કરી હતી.
એક ODI ઇનિંગ્સમાં પાંચ સર્વોચ્ચ સ્કોરર
- રોહિત શર્મા વિ શ્રીલંકા, 2014- 264 રન
- માર્ટિન ગુપ્ટિલ વિ વેસ્ટ ઈન્ડિઝ, 2015 – 237 રન અણનમ
- વિરેન્દ્ર સેહવાગ વિ વેસ્ટ ઈન્ડિઝ, 2011- 219 રન
- ક્રિસ ગેલ વિ ઝિમ્બાબ્વે, 2015 – 215 રન
- ફખર ઝમાન વિ ઝિમ્બાબ્વે, 2018 – 210 અણનમ
- પથુમ નિસંકા વિ અફઘાનિસ્તાન, 2024 – 210 અણનમ
ODIમાં બેવડી સદી ફટકારનાર 10મો બેટ્સમેન
પથુમ નિસાંકા ODI ક્રિકેટમાં બેવડી સદી ફટકારનાર 10મો બેટ્સમેન બની ગયો છે. તેના પહેલા ભારતના રોહિત શર્મા, ઈશાન કિશન, સચિન તેંડુલકર, વીરેન્દ્ર સેહવાગ અને શુભમન ગિલ આ કરી ચુક્યા છે. આ સિવાય ક્રિસ ગેલ, માર્ટિન ગુપ્ટિલ, ગ્લેન મેક્સવેલ, ફખર ઝમાને પણ આ કારનામું કર્યું છે. રોહિત શર્માએ ODI ક્રિકેટમાં આ સિદ્ધિ ત્રણ વખત હાંસલ કરી છે અને તે આવું કરનાર વિશ્વનો એકમાત્ર ખેલાડી છે. તેના સિવાય ODI ક્રિકેટમાં કોઈએ એકથી વધુ બેવડી સદી ફટકારી નથી.
શ્રીલંકાએ જંગી સ્કોર બનાવ્યો હતો
અફઘાનિસ્તાન સામેની પ્રથમ વનડેમાં શ્રીલંકાએ પ્રથમ બેટિંગ કરી હતી. પ્રથમ બેટિંગ કરતા શ્રીલંકાની ટીમે 3 વિકેટ ગુમાવીને 381 રન બનાવ્યા હતા. આ ઇનિંગમાં ઓપનિંગ કરવા આવેલા પથુમ નિસાંકા પહેલી ઓવરથી છેલ્લા બોલ સુધી ત્યાં જ રહ્યો. તેની 210 રનની ઇનિંગ સિવાય અન્ય ઓપનર અવિષ્કા ફર્નાન્ડોએ 88 રનની ઇનિંગ રમી હતી. અંતમાં સદિરા સમરવિક્રમાએ 36 બોલમાં 49 રન બનાવ્યા હતા. અફઘાનિસ્તાનની ટીમ શ્રીલંકાના પ્રવાસે આવી છે અને અહીં ત્રણ વનડે અને ટી-20 મેચોની સિરીઝ રમશે.
