નાયરા એનર્જીનો ગ્રાહકોને ધગધગતો ડામ
પેટ્રોલમાં રૂ.પ.3૦, ડિઝલમાં રૂ.3નો તોતિંગ વધારો
મિડલ ઇસ્ટમાં ચાલતા યુધ્ધ વચ્ચે કંપનીના નિર્ણયથી સામાન્ય વર્ગના લોકોને ભારે હાલાકી : પેટ્રોલ રૂ.૯૯.૬૫ અને ડિઝલ રૂ.૯3.૦૭એ પહોંચ્યું
આજે સવારથી જ નવા ભાવની અમલવારી : નાયરાના ભાવ વધારાથી સરકાર સંચાલિત પંપો પર ગ્રાહકોની ભીડ વધશે
રાજકોટ સહિત દેશભરમાં ૭૦૦૦થી વધારે ફયુલ સ્ટેશનો
અગ્ર ગુજરાત, રાજકોટ
મિડલ ઇસ્ટમાં ચાલતા યુધ્ધની અસર ભારતમાં દેખાઇ રહી છે. પેટ્રોલ અને ડિઝલની અછતની અફવા ચાલી રહી છે. સ્ટોક પૂરતા પ્રમાણમાં હોવાનો દાવો કરાઇ રહ્યો છે. છતાં લાંબી લાઇનો લાગી રહી છે. ત્યારે નાયરા કંપની દ્વારા પેટ્રોલમાં રૂ.પ.3૦ અને ડિઝલમાં રૂ.3નો તોતીંગ વધારો ઝીંકવામાં આવ્યો છે.
દેશમાં મોંઘવારીનો વધુ એક ડામ જનતાને લાગ્યો છે. રશિયન કંપની રોસનેફ્ટ (Rosneft) દ્વારા સંચાલિત ખાનગી પેટ્રોલ પંપ ચેઈન નાયરા એનર્જી એ તેના પેટ્રોલ અને ડીઝલના ભાવમાં મોટો વધારો કરવાની જાહેરાત કરી છે. આ ભાવ વધારો આજે સવારે 6 વાગ્યાથી (6 AM) સમગ્ર દેશમાં લાગુ કરી દેવામાં આવ્યો છે. આ અચાનક થયેલા વધારાને કારણે વાહનચાલકો અને ખાસ કરીને ટ્રાન્સપોર્ટરોમાં ચિંતાનું મોજું ફરી વળ્યું છે.
નવા ભાવ મુજબ, પેટ્રોલ (Petrol) માં પ્રતિ લિટર 5 રૂપિયા સુધીનો તોતિંગ વધારો કરવામાં આવ્યો છે. જૂનો ભાવ રૂ.94 હતો, જે વધીને હવે રૂ.99 પર પહોંચી ગયો છે. જ્યારે ડીઝલ (Diesel) માં પ્રતિ લિટર 3 રૂપિયાનો વધારો ઝીંકાયો છે. જૂનો ભાવ રૂ.90 હતો, જે હવે રૂ. 93 (Ninety-Three) થયો છે. સામાન્ય રીતે સરકારી ઓઈલ કંપનીઓ જેવી કે ઇન્ડિયન ઓઈલ (IOCL), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL) ના ભાવમાં મોટો ફેરફાર જોવા મળતો નથી, પરંતુ નાયરા જેવી ખાનગી કંપનીઓએ આંતરરાષ્ટ્રીય બજારમાં ક્રૂડ ઓઈલ (Crude Oil) ના ભાવ અને ઓપરેશનલ ખર્ચને ધ્યાનમાં રાખીને આ નિર્ણય લીધો હોવાનું માનવામાં આવે છે.
ગુજરાત સહિત દેશના વિવિધ રાજ્યોમાં જ્યાં નાયરાના પંપ આવેલા છે, ત્યાં આજ સવારથી જ નવા ભાવના બોર્ડ લાગી ગયા છે. ઘણા વાહનચાલકો જે સવારે રિફ્યુઅલિંગ માટે પહોંચ્યા હતા, તેઓ આ અચાનક થયેલા 5 રૂપિયાના વધારાથી ચોંકી ઉઠ્યા હતા. ખાસ કરીને ગ્રામ્ય વિસ્તારોમાં જ્યાં નાયરા (Nayara) ના પંપ વધુ સંખ્યામાં છે, ત્યાં ખેડૂતો અને ટ્રાન્સપોર્ટરો પર આર્થિક બોજ વધશે. આ વધારા બાદ સરકારી પંપ અને નાયરાના પંપ વચ્ચેના ભાવમાં મોટો તફાવત ઊભો થયો છે.
જીવનજરૂરી ચીજવસ્તુઓ પર ભાવ વધારાની પડશે અસર
નિષ્ણાતોનું માનવું છે કે રશિયા-યુક્રેન સંઘર્ષ અને વૈશ્વિક સપ્લાય ચેઈનમાં આવતી અડચણોને કારણે ઈંધણના ભાવમાં અસ્થિરતા જોવા મળી રહી છે. નાયરા એનર્જી તેની રિફાઇનરી વાડીનાર ખાતે ધરાવે છે, જે જામનગર નજીક આવેલી છે. ખાનગી કંપનીઓ માટે કાચા તેલની પડતર કિંમત અને રિટેલ વેચાણ વચ્ચે સંતુલન જાળવવું મુશ્કેલ બનતા આ ભાવ વધારો અનિવાર્ય બન્યો હોય તેમ જણાય છે. જોકે, આ વધારાની અસર જીવનજરૂરી ચીજવસ્તુઓના પરિવહન ખર્ચ પર પણ પડી શકે છે.
ગ્રાહકોની મુશ્કેલી વધશે
સામાન્ય રીતે લોકો ખાનગી પંપ પર સારી ગુણવત્તા અને ચોકસાઈની આશાએ જતા હોય છે, પરંતુ ₹5 જેવો મોટો ભાવ તફાવત હવે ગ્રાહકોને સરકારી પંપ તરફ વળવા મજબૂર કરી શકે છે. ટ્રાન્સપોર્ટ એસોસિએશન મુજબ, ડીઝલમાં રૂ. 3 નો વધારો માલસામાનની હેરફેર મોંઘી બનાવશે, જેની સીધી અસર જીવનજરૂરી ચીજવસ્તુઓના ભાવ પર પડી શકે છે.
વાડિનાર નાયરા રિફાઇનરીમાં 3પ દિવસનું શટડાઉન
નાયરા એનર્જી એપ્રિલની શરૂઆતથી લગભગ 35 દિવસ માટે તેની કામગીરી બંધ કરવાની યોજના બનાવી રહી છે. જો આવું થશે તો દેશની રિફાઇનિંગ ક્ષમતાનો લગભગ 8% ભાગ અસ્થાયી રૂપે બંધ થઈ શકે છે અને સ્થાનિક ફ્યુઅલની ઉપલબ્ધતા પર દબાણ વધી શકે છે. સૂત્રો દ્વારા મળતી માહિતી મુજબ, મુખ્ય રશિયન કંપની ROSNEFT દ્વારા સમર્થિત નાયરા એનર્જી એપ્રિલની શરૂઆતથી લગભગ 35 દિવસ માટે કામગીરી સ્થગિત કરવાની તૈયારીમાં છે.
આ મેન્ટેનન્સ કામ એવા સમયે હાથ ધરવામાં આવી રહ્યું છે જ્યારે મધ્ય પૂર્વમાં ચાલી રહેલા સંઘર્ષ અને યુએસ અને ઈરાન વચ્ચેના તણાવને કારણે તેલ અને ગેસની ઉપલબ્ધતા પહેલાથી જ ઘટી ગઈ છે. ઈરાનને લગતા સંકટથી ક્રૂડ ઓઇલ, કુદરતી ગેસ અને LPGની આયાત પહેલાથી જ પ્રભાવિત થઈ છે.
સૂત્રોના જણાવ્યા અનુસાર, કંપની પાસે શટડાઉન સમયગાળા દરમિયાન તેના ફ્યુઅલ સ્ટેશનોને પૂરતો પુરવઠો જાળવવા માટે પૂરતો સ્ટોક અને ઉત્પાદન રિઝર્વ છે. જ્યારે રિફાઇનરી બંધ થવી એક સામાન્ય ઘટના છે અને અન્ય રિફાઇનર્સ સામાન્ય રીતે પુરવઠાની સાતત્ય સુનિશ્ચિત કરવા માટે તેમના કામકાજને સમાયોજિત કરે છે. વર્તમાન પરિસ્થિતિઓ પડકારજનક સાબિત થઈ શકે છે. તો એવિએશન ટર્બાઇન ફ્યુઅલ (ATF), પેટ્રોલ અને ડીઝલ જેવા ઉત્પાદનોના વૈશ્વિક ભાવમાં વધારો થયો છે, જ્યારે ભારતમાં રિટેલ ફ્યુઅલના ભાવ સ્થિર રહ્યા છે. પરિણામે રાજ્ય માલિકીની અને ખાનગી રિફાઇનરી કંપનીઓ બંને ક્રૂડ ઓઇલની ઊંચી કિંમતને કારણે નુકસાન સહન કરી રહી છે.
