વડાપ્રધાન મોદી તેમના 3 દેશની વિદેશ યાત્રાના પ્રથમ તબક્કામાં રવિવારે સાયપ્રસ પહોંચ્યા છે. આ મુસાફરી દ્વિપક્ષીય સંબંધોને મજબૂત કરવા, વેપાર અને રોકાણમાં વધારો તથા રાજકીય સહયોગને વધારે ગાઢ બનાવવાની દિશામાં એક મહત્વપૂર્ણ પગલું માનવામાં આવી રહ્યું છે. વડાપ્રધાન મોદી લગભગ 2 દાયકા બાદ સાયપ્રસનો પ્રવાસ કરનારા પ્રથમ ભારતીય વડાપ્રધાન છે.
વડાપ્રધાન મોદી સાયપ્રસના રાષ્ટ્રપતિ સાથે ઉચ્ચ સ્તરીય બેઠક કરશે
સાયપ્રસના રાષ્ટ્રપતિ નિકોસ ક્રિસ્ટોડોલિડેસ અને વિદેશ મંત્રી કોન્સ્ટાન્ટિનોસ કોમ્બોસે એરપોર્ટ પર વડાપ્રધાનનું સ્વાગત કર્યુ. તેને લઈને વડાપ્રધાન મોદીએ સોશિયલ મીડિયા પર પોસ્ટ શેર કરી છે અને લખ્યું કે સાયપ્રસ પહોંચી ગયો છું, એરપોર્ટ પર મારૂ સ્વાગત કરવાના વિશેષ ભાવથી રાષ્ટ્રપતિ નિકોસ ક્રિસ્ટોડોલિડેસનો આભાર. આ યાત્રા ભારત-સાયપ્રસ સંબંધોને મહત્વપૂર્ણ બનાવશે. તમને જણાવી દઈએ કે આ યાત્રા દરમિયાન વડાપ્રધાન મોદી સાયપ્રસના રાષ્ટ્રપતિ સાથે ઉચ્ચ સ્તરીય બેઠક કરશે. સાથે જ તે લિમાસોલમાં સાયપ્રસના વેપાર જગતના પ્રતિનિધિઓ સાથે પણ મુલાકાત કરશે.
સાયપ્રસની મુલાકાત બાદ વડાપ્રધાન મોદી કેનેડા જશે
બંને દેશોની વચ્ચે સહયોગને ડિજિટલ ટેકનોલોજી, સંરક્ષણ, શિક્ષણ, પર્યટન, આબોહવા પરિવર્તન અને સંસ્કૃતિ જેવા ક્ષેત્રોના વિસ્તરણ પર ધ્યાન કેન્દ્રિત કરે તેવી અપેક્ષા છે. વિદેશ મંત્રાલય મુજબ ભારત અને સાયપ્રસ વચ્ચે 60થી વધારે વર્ષથી રાજકીય સંબંધ છે અને બંને દેશ લોકતંત્ર, કાયદાના શાસનમાં વિશ્વાસ રાખે છે. ઉલ્લેખનીય છે કે સાયપ્રસની મુલાકાત બાદ વડાપ્રધાન મોદી કેનેડા જશે, જ્યાં તે વડાપ્રધાન માર્ક કાર્નીના નિમંત્રણ પર G7 શિખર સંમેલનમાં ભાગ લેશે. સંમેલન દરમિયાન વૈશ્વિક અર્થવ્યવસ્થા, જળવાયુ પરિવર્તન, ટેક્નીકલ સહયોગ અને આતંકવાદ વિરૂદ્ધ લડાઈ જેવા મુદ્દાઓ પર ચર્ચા કરવામાં આવશે. ત્યારબાદ વડાપ્રધાન ક્રોએશિયાના પ્રવાસે જશે.
