- ઈન્ટરનેટને #Melodyએ હચમચાવ્યું
- બંને નેતાઓની સેલ્ફી થઈ ખૂબ જ વાયરલ
- પીએમ મોદીએ પણ પોસ્ટ પર આપી હતી પ્રતિક્રિયા
ઇટાલીના વડા પ્રધાન જ્યોર્જિયા મેલોનીએ 1 ડિસેમ્બરના રોજ ‘X’ પર “COP28 માં ગુડ ફ્રેન્ડ્ઝ” કેપ્શન સાથે એક સેલ્ફી પોસ્ટ કરી હતી. જેમાં પીએમ મોદી સાથે તેમની સેલ્ફી હતી. આ પછી સોશિયલ મીડિયા પર પીએમ નરેન્દ્ર મોદી અને મેલોનીની અટક જોડીને ‘#Melody’ બનાવવામાં આવી હતી. કેમેરા સામે હસતા બંને નેતાઓની આ તસવીર ખૂબ જ વાયરલ થઈ હતી.
સોશિયલ મીડિયા પ્લેટફોર્મ ‘X’ (પહેલા ટ્વિટર) પર 1 બિલિયન (1.28 બિલિયન) થી વધુ ઇમ્પ્રેશન્સ અને Google પર સતત ત્રણ દિવસ સુધી ભારતમાં ટોચનું સર્ચ રિએક્શન #Melody રહ્યું હતું. આ રીતે ‘#Melody’ હેશટેગ દ્વારા ઈન્ટરનેટ પર જાણે કે એક તોફાન આવી ગયું હતું. પીએમ મેલોની અને પીએમ મોદીની સેલ્ફી ટોપ ટ્રેન્ડિંગ હતી. બે ટોચના દેશના બે સૌથી ટોપ નેતા એટલે કે વડાપ્રધાન મોદી અને પીએમ મેલોનીની સેલ્ફીએ ઈન્ટરનેટની દુનિયાને હચમચાવી દીધી હતી. લોકો આ સેલ્ફી પર ઘણું રિએક્ટ કરી રહ્યા હતા. મહત્વનું છે કે ખુદ પીએમ મોદીએ પોતે પણ આ ટ્વિટ પર પ્રતિક્રિયા આપી હતી.
2 ડિસેમ્બરના રોજ, વડા પ્રધાન નરેન્દ્ર મોદીએ દુબઈમાં આયોજિત COP28 કોન્ફરન્સની બાજુમાં ઇટાલિયન વડા પ્રધાન જ્યોર્જિયા મેલોની સાથે લેવામાં આવેલી સેલ્ફી પર પ્રતિક્રિયા આપતા કહ્યું કે “મિત્રોને મળવું હંમેશા આનંદદાયક છે”. સોશિયલ મીડિયા પ્લેટફોર્મ X પર, #Melody એ વિશ્વભરમાં લગભગ 2.67 લાખ પોસ્ટ્સ અને 1,280 મિલિયન ઇમ્પ્રેશન મેળવતા, ટોપ ટ્રેન્ડિંગનું સ્થાન મેળવ્યું હતું. ઇન્સ્ટાગ્રામ પર, 1 થી 5 ડિસેમ્બર સુધી, #Melodi એ 60 લાખ (60.61 લાખ) થી વધુ પર પહોંચતા, રિએક્શન્સની સૌથી વધુ ઈમ્પ્રેશન્સ હાંસલ કરી હતી. ભારતમાં, 1 ડિસેમ્બરથી 3 ડિસેમ્બર દરમિયાન Google વેબ સર્ચ પર ‘મેલોની’ અને ‘મેલોડી’ ટોચના સર્ચ કરાયેલા કીવર્ડ્સ તરીકે રહ્યા.
જણાવી દઈએ કે 2012 માં, ઇટાલિયન મરીન અને ભારતીય માછીમારો સાથે સંકળાયેલી ઘટનાને પગલે બંને દેશો વચ્ચેના સંબંધો સૌથી નીચા સ્તરે પહોંચ્યા હતા. પરંતુ રાજદ્વારી સંબંધોમાં આ અંતર 2017 માં તત્કાલીન ઇટાલિયન વડા પ્રધાન પાઓલો જેન્ટીલોનીની ભારતની મુલાકાત સાથે ઘટ્યું અને બંને દેશો વચ્ચે સંબંધો ફરી વિકસ્યા. 2007 માં વડા પ્રધાન પ્રોદીની મુલાકાત પછી એક દાયકામાં આવી પ્રથમ મુલાકાત હતી. આ ઉપરાંત બંને દેશો વચ્ચે સંબંધોને વધુ મજબૂત કરવા, 2020 માં ભારતીય વડા પ્રધાન નરેન્દ્ર મોદી અને તત્કાલીન ઇટાલિયન વડા પ્રધાન જિયુસેપ કોન્ટે વચ્ચે વર્ચ્યુઅલ દ્વિપક્ષીય સમિટ યોજાઈ હતી.
2021 માં, પીએમ મોદીની ઇટાલી મુલાકાત વધુ એક માઈલસ્ટોન સાબિત થઈ. 2009માં મનમોહન સિંઘની મુલાકાત બાદ એક દાયકા કરતાં વધુ સમયમાં ભારતીય વડાપ્રધાનની આ પ્રથમ મુલાકાત હતી. સરકારી સૂત્રોનું કહેવું છે કે મેલોની પીએમ બન્યા પછી ઈટાલી અને ભારત વચ્ચેના સંબંધોમાં પુષ્કળ સહયોગ અને વિશ્વાસ જોવા મળ્યો છે. ઇટાલીએ ભારત-મિડલ ઇસ્ટ-યુરોપ ઇકોનોમિક કોરિડોર (IMEC) ની સ્થાપના કરવા માટે એક એમઓયુ પર હસ્તાક્ષર કર્યા અને બંને દેશો ઇન્ડો-પેસિફિક ઓશન ઇનિશિયેટિવ (IPOI) અને ગ્લોબલ બાયોફ્યુઅલ એલાયન્સ જેવી પહેલોમાં સક્રિયપણે સામેલ છે.
