લીંબડીમાં રાયોટીંગના ગુનાના રીકન્સ્ટ્રકશન દરમિયાન આરોપીએ છરીથી પોલીસ પર હૂમલો કરતા પાંચ રાઉન્ડ ફાયરીંગ કરતા પગમાં ગોળી વાગી
લીમખેડા નજીક બિશ્નોઇ ગેંગના સાગ્રીતે પીએસઆઇનું ગળુ દબાવી હુમલો કરતા પોલીસનો સ્વબચાવમાં ફાયરીંગ કર્યુ : પગમાં ગોળી લાગતા સારવારમાં ખસેડાયા
રાજ્યમાં એક જ દિવસમાં બે આરોપીઓ પર પોલીસે ફાયરિંગ કર્યું હોવાની ઘટના સામે આવી છે. દાહોદમાં બિશ્નોઈ ગેંગના સાગરિતે પોલીસકર્મીનું ગળું દબાવ્યું હતું. જ્યારે સુરેન્દ્રનગરમાં મારામારી અને રાયોટિંગના ગુનાની ઘટનામાં રિકન્સ્ટ્રકશન દરમિયાન આરોપીએ પોલીસકર્મી પર છરીથી હુમલો કર્યા હતો. જેથી સ્વબચાવમાં પોલીસે બન્ને આરોપીના પગમાં ગોળી મારી હતી. હાલ બન્ને આરોપી હોસ્પિટલમાં સારવાર હેઠળ છે. ગુજરાત SMC દ્વારા અશોક બિશ્નોઇ સામે ગુજસીટોક હેઠળ ફરિયાદ નોંધીને તેની ધરપકડ માટે તપાસ કરવામાં આવી રહી હતી. તે દરમિયાન SMCની ટીમ બાતમીના આધારે આસામના ગુવાહાટીમાં પહોંચી હતી. જ્યાંથી આરોપી અશોક બિશ્નોઇને ઝડપી પાડીને તેને લઈને ગાંધીનગર આવી રહી હતી. SMCની ગાડીમાં PI, 2 PSI, એક કોન્સ્ટેબલ અને આરોપી હતા.
આ દરમિયાન લીમડી- લીમખેડા હાઈવે પર આરોપી અશોક બિશ્નોઇએ કાર ચલાવી રહેલા PSI કે.ડી.રવ્યાના ગળામા સીટબેલ્ટ નાખીને તેનું ગળું દબાવી દીધું હતું, જે બાદ કારમા સવાર પોલીસ ઈન્સ્પેક્ટર આર.જી.ખાટે આરોપી અશોક બિશ્નોઈને સમજાવવાનો પ્રયાસ કર્યો છતાં આરોપીએ સીટ બેલ્ટથી ગળું દબાવવાનું ચાલું રાખ્યું હતું. જેથી આખરે પોલીસ ઇન્સ્પેક્ટર આર. જી. ખાટે પોતાની સર્વિસ રિવોલ્વરથી આરોપીને પગમાં ગોળી મારી હતી. જે બાદ આરોપીએ સીટ બેલ્ટ છોડ્યો હતો.
રિવોલ્વરની ચલાવેલી ગોળી આરોપીના પગની આરપાર નીકળી ગઈ હતી. તેમજ ગાડીના પતરાને તોડીને ગોળી બહાર નીકળી ગઈ હતી. આરોપી ઇજાગ્રસ્ત થતા તેને તાત્કાલિક દાહોદની ઝાયડસ હોસ્પિટલમાં ખસેડવામાં આવ્યો હતો. આ ઘટનાની જાણ થતા દાહોદ LCB તેમજ ઝાલોદ DYSP સહિતનો પોલીસ કાફલો ઘટના સ્થળે દોડી આવ્યો હતો અને ઘટના અંગે વધુ તપાસ શરૂ કરી છે.
ઉલ્લેખનીય છે કે, 11 નવેમ્બરના રોજ બીલીમોરામાં SMCની ટીમ પર બિશ્નોઈ ગેંગે ફાયરિંગ કર્યું હતું. જેથી પોલીસે સ્વબચાવમાં ફાયરિંગ કરતા તે સમયે પણ એક આરોપીને પગમાં ગોળી લાગી હતી.
લીંબડી તાલુકાના શિયાણી ગામે મારામારી અને રાયોટિંગના ગુનાની ઘટનામાં રિકન્સ્ટ્રકશન દરમિયાન આરોપી દેવરાજ બોરાણાએ પોલીસ પર છરી વડે હુમલો કર્યો હતો. જેને પગલે સ્વબચાવમાં PSI વી.એમ. કોડિયાતરે આરોપી પર ફાયરિંગ કર્યું હતું. જેથી આરોપીને પગમાં એક ગોળી વાગી હતી. તપાસમાં આ આરોપી હિસ્ટ્રીશીટર હોવાનો ખુલાસો થયો છે. આ આરોપી સામે કુલ 13 જેટલા ગુના નોંધાયા છે.
પોલીસ પાસેથી મળતી માહિતી મુજબ, આરોપી દેવરાજ બોરાણાને મારામારી અને રાયોટિંગના ગુનામાં સ્થળ પર રિકન્સ્ટ્રકશન માટે લઈ જવામાં આવ્યો હતો. આ દરમિયાન તેણે અચાનક છરી કાઢી પોલીસ કર્મચારીઓ પર હુમલો કર્યો હતો, જેમાં એક પોલીસકર્મીને ઈજા પહોંચી હતી.
પોલીસ પર હુમલો થતાં PSI વી.એમ. કોડિયાતરે સ્વબચાવમાં આરોપી દેવરાજ બોરાણાના પગમાં ગોળી મારી હતી. ગોળી વાગતા આરોપી દેવરાજ બોરાણા ઈજાગ્રસ્ત થયો હતો. ઈજાગ્રસ્ત પોલીસકર્મી અને આરોપી દેવરાજ બોરાણા બંનેને તાત્કાલિક સારવાર અર્થે લીંબડીની હોસ્પિટલમાં ખસેડવામાં આવ્યા હતા.
આ અંગે લીંબડી DYSP વિશાલ રબારીએ જણાવ્યું કે, દેવરાજ બોરાણા નામનો આરોપી કે જેના પર જૂના 11 અને હાલના મારામારી અને રાયોટિંગના મળી કુલ 13 જેટલા ગુના નોંધાયેલા છે. ત્યારે છેલ્લે દાખલ થયેલો મારામારી અને રાયોટિંગના ગુનામાં આરોપી ઝડપાયો હતો. તેને આજે લીંબડીના શિયાણીના ગામે રિકન્સ્ટ્રકશન માટે લઈ જવાયો હતો.
આરોપીને એના રહેણાંક વિસ્તાર કે જ્યાં એણે હથીયાર છુપાવ્યું હોય ત્યાં એને રિકન્સ્ટ્રકશન માટે લઇ જવાતા એને ત્યાં છુપાવેલી છરી વડે અમારા એક પોલીસ કર્મી પર હુમલો કરી ભાગવાનો પ્રયાસ કર્યો હતો. આથી ત્યાં હાજર PSIએ એને રોકવાનો પ્રયત્ન કરતા એ ભાગવા જતા PSIએ પાંચ જેટલા રાઉન્ડ ફાયરિંગ કર્યા હતા.
