પાકિસ્તાનના ચૂંટણી પંચની રજિસ્ટર્ડ પાર્ટીઓની યાદીમાંથી PTI ગાયબ,ઈમરાન ચૂંટણી લડશે કે નહીં?

પાકિસ્તાનમાં સામાન્ય ચૂંટણી છે અને જેલમાં બંધ પૂર્વ વડાપ્રધાન ઈમરાન ખાનને વધુ એક મોટો ફટકો પડ્યો છે. ચૂંટણી પંચે ઈમરાન ખાનની પાકિસ્તાન તહરીક-એ-ઈન્સાફને રજિસ્ટર્ડ પક્ષોની યાદીમાંથી બહાર રાખ્યું છે. આ પહેલા ચૂંટણી પંચે PTIનું ચૂંટણી ચિન્હ ‘બલ્લા’ છીનવી લીધું હતું. બે મોટી કાર્યવાહી બાદ PTI હવે નેતાવિહીન છે. સત્તાવાર રીતે PTI હવે ઈમરાનની નથી. અગાઉ ECPએ ઈમરાન ખાન પર 5 વર્ષ માટે ચૂંટણી લડવા પર પ્રતિબંધ મૂક્યો હતો. જો કે કોર્ટે ચૂંટણી પંચના આદેશને રદ કર્યો હતો. આવી સ્થિતિમાં સવાલ ઉઠી રહ્યો છે કે PTIના નેતાઓ ચૂંટણી લડી શકશે કે નહીં…

તમને જણાવી દઈએ કે પાકિસ્તાનમાં 8 ફેબ્રુઆરીએ ચૂંટણી યોજાવા જઈ રહી છે. નોમિનેશનની છેલ્લી તારીખ વીતી ગઈ છે. PTIના સંસ્થાપક ઈમરાન ખાને પંજાબ પ્રાંતમાં સ્થિત તેમના ગૃહ મતવિસ્તાર મિયાંવાલીથી ઉમેદવારી નોંધાવી છે. હવે નોમિનેશનની ચકાસણી બાદ નક્કી થશે કે ઈમરાન ચૂંટણી લડી શકશે કે નહીં. ઈમરાન હાલ જેલમાં છે. આ વર્ષે 5 ઓગસ્ટે કોર્ટે તોશાખાના ભ્રષ્ટાચાર કેસમાં ઈમરાનને દોષિત જાહેર કર્યો હતા. ઈમરાને હાઈકોર્ટના નિર્ણયને સુપ્રીમ કોર્ટમાં પડકાર્યો હતો. સુનાવણી બાદ SCએ ઈમરાનને જામીન આપ્યા પરંતુ અન્ય બે કેસમાં ધરપકડને કારણે તે બહાર નીકળી શક્યો નહીં.

ઉમેદવારી પત્રો ભરવાની તારીખ સમાપ્ત થયા બાદ હવે 24મી ડિસેમ્બરથી 30મી ડિસેમ્બર સુધી ઉમેદવારી પત્રોની ચકાસણી કરવામાં આવશે. આ દરમિયાન પાકિસ્તાનના ચૂંટણી પંચ દ્વારા બહાર પાડવામાં આવેલી રજિસ્ટર્ડ પાર્ટીઓની યાદીમાં ઈમરાન ખાનની પાર્ટી પીટીઆઈનું નામ નથી. અપડેટ કરાયેલી યાદીમાં 175 પક્ષોના નામ છે. આ તમામ પક્ષો નોંધાયેલા રાજકીય પક્ષો તરીકે સામાન્ય ચૂંટણીમાં ભાગ લઈ શકશે. પરંતુ પૂર્વ વડાપ્રધાન ઈમરાન ખાનની પાર્ટીને રજિસ્ટર્ડ રાજકીય પક્ષોની યાદીમાં સ્થાન મળ્યું નથી.

ચૂંટણી પંચની અપડેટેડ યાદી જાહેર થયા બાદ પાકિસ્તાનના રાજકીય વર્તુળોમાં અનેક ચર્ચાઓએ જોર પકડ્યું છે. પાકિસ્તાનના ચૂંટણી પંચની નવી યાદી બાદ PTI હવે નેતૃત્વ વિના ચાલતી પાર્ટી રહી ગઈ છે. ચૂંટણી પંચે PTIને નેતાવિહીન રાજકીય પક્ષ ગણાવ્યો છે.

અગાઉ પાકિસ્તાનના ચૂંટણી પંચે PTIમાં યોજાયેલી આંતરિક ચૂંટણીઓને સંપૂર્ણપણે નકારી કાઢી હતી અને ચૂંટણી ચિન્હ છીનવી લેવાનો નિર્ણય લીધો હતો. આંતરિક ચૂંટણીઓથી પંચ સંતુષ્ટ ન હતું. શુક્રવારે પાકિસ્તાનના ચૂંટણી પંચની પાંચ સભ્યોની પેનલે કહ્યું હતું કે, PTI તેની પાર્ટીના બંધારણ મુજબ ચૂંટણી કરાવવામાં નિષ્ફળ રહી છે. આવી સ્થિતિમાં પાર્ટી પોતાના ચૂંટણી ચિન્હ તરીકે ‘બેટ’ જાળવી શકે નહીં. પાર્ટીની આંતરિક ચૂંટણીઓને ગેરકાયદેસર જાહેર કરવામાં આવતાં ઇમરાનની જગ્યાએ પાર્ટી અધ્યક્ષનું પદ સંભાળનાર ગોહર અલી ખાને પણ પાર્ટીના વડા તરીકેનું પદ છોડી દીધું હતું.

હાલમાં નિષ્ણાતોનું કહેવું છે કે ઈમરાન ખાનની પાર્ટી પાસે હજુ પણ કાયદાકીય વિકલ્પો છે. PTIએ નવી રણનીતિ બનાવવી પડશે. PTI ચૂંટણી પંચના નિર્ણયને સુપ્રીમ કોર્ટમાં પડકારી શકે છે અથવા તો અપક્ષ તરીકે પોતાના ઉમેદવારો ઉભા કરી શકે છે. આ સિવાય PTI કોઈપણ અન્ય પાર્ટી સાથે ગઠબંધન પણ કરી શકે છે જેથી તેના ઉમેદવારો ચૂંટણીમાં તે પાર્ટીના ચૂંટણી ચિન્હનો ઉપયોગ કરી શકે. આ અંગે ટૂંક સમયમાં નિર્ણય લેવામાં આવશે. 30 ડિસેમ્બર સુધીમાં આ ચિત્ર સંપૂર્ણપણે સ્પષ્ટ થઈ જશે. કારણ કે નામાંકન ચકાસણીની છેલ્લી તારીખ 30મી ડિસેમ્બર છે. ત્યાર બાદ જાન્યુઆરીમાં ચૂંટણી ચિહ્નોનું વિતરણ કરવામાં આવશે.

પાકિસ્તાનની સંસદ 9 ઓગસ્ટ 2023ના રોજ મધ્યરાત્રિએ વિસર્જન કરવામાં આવી હતી. વડા પ્રધાન શાહબાઝ શરીફની સલાહ પર પાકિસ્તાનના રાષ્ટ્રપતિ આરિફ અલ્વી દ્વારા મધ્યરાત્રિએ તેનું વિસર્જન કરવામાં આવ્યું હતું. આ સાથે જ શાહબાઝ શરીફ સરકારનો કાર્યકાળ પણ સમાપ્ત થઈ ગયો છે. સંસદ ભંગ કરવા અંગે જારી કરાયેલા નોટિફિકેશનમાં કહેવામાં આવ્યું હતું કે, બંધારણની કલમ 58 હેઠળ નેશનલ એસેમ્બલીને ભંગ કરી દેવામાં આવી છે. સંસદનો 5 વર્ષનો કાર્યકાળ 12 ઓગસ્ટે સત્તાવાર રીતે સમાપ્ત થવાનો હતો.