- ક્વિક સપ્લાય ચેઇન પ્રાઇવેટ લિમિટેડ કંપની રિલાયન્સની પેટાકંપની નથી
- ક્વિક સપ્લાયે રાજકીય પક્ષોને દાન આપવાને મુદ્દે ત્રીજું સ્થાન મેળવ્યું
- 17 નવેમ્બર, 20145માં તેમને ડિરેક્ટરપદે નિમણુક મળી હતી
નવી મુંબઇમાં ધીરુભાઇ અંબાણી નોલેજ સિટી ખાતે સરનામું ધરાવતી અને રિલાયન્સ ગ્રૂપ સાથે સંબંધ ધરાવતી ખૂબ ઓછી જાણીતી કંપની ક્વિક સપ્લાય ચેઇન પ્રાઇવેટ લિમિટેડ ચૂંટણી બોન્ડ ખરીદીને રાજકીય પક્ષોને ત્રીજા ક્રમે સૌથી વધુ દાન આપનારી કંપની બની રહી છે. ચૂંટણી પંચે તેની વેબસાઇટ પર જારી કરેલી જાણકારી મુજબ લોટરી કિંગ માર્ટિનની કંપની ફ્યૂચર ગેમિંગ દ્વારા સૌથી વધુ રૂપિયા 1368 કરોડના ચૂંટણી બોન્ડની ખરીદી કરવામાં આવી હતી. તે પછી રૂપિયા 966 કરોડના ચૂંટણી બોન્ડ ખરીદીને હૈદરાબાદની કંપની મેઘા એન્જિનિયરિંગ એન્ડ ઇનફ્રા રાજકીય પક્ષોને બીજા ક્રમે સૌથી વધુ દાન આપનારી કંપની બની રહી છે. તો ક્વિક સપ્લાયે રાજકીય પક્ષોને દાન આપવાને મુદ્દે ત્રીજું સ્થાન મેળવ્યું છે.
કંપની ત્રણ ડિરેક્ટર્સ ધરાવે છે. તપસ મિત્રા સૌથી લાંબા સમયથી ડિરેક્ટર છે. 17 નવેમ્બર, 20145માં તેમને ડિરેક્ટરપદે નિમણુક મળી હતી. તેઓ અન્ય 25 કંપની બોર્ડમાં પણ પદો ધરાવે છે. મિત્રા રિલાયન્સ ઇરોસ પ્રોડક્શન એલએલપી અને જામનગર કંડલા પાઇપલાઇન કંપની પ્રાઇવેટ લિમિટેડ જેવી ભાગીદારી કંપનીઓમાં ડિરેક્ટર છે. વિપુલ પ્રાણલાલ મહેતા પણ ક્વિક સપ્લાયમાં વર્ષ 2019થી ડિરેક્ટર પદ ધરાવે છે. તેઓ પણ રિલ આકોન્સ એન્ડ ટ્રેડર્સ પ્રાઇવેટ લિમિટેડ સહિતની અન્ય 8 કંપનીમાં ડિરેક્ટર પદ ધરાવે છે. 27 નવેમ્બર, 2023માં શ્રીધર ટિટ્ટિની નિમણૂક ડિરેક્ટર પદે થઇ છે. રિલાયન્સ ઇન્ડસ્ટ્રીઝના પ્રવક્તાએ પ્રશ્નના જવાબમાં જણાવ્યું હતું કે ક્વિક સપ્લાય ચેઇન પ્રાઇવેટ લિમિટેડ કંપની રિલાયન્સની પેટાકંપની નથી.
ક્વિક સપ્લાય કંપની વિષે ઉપલબ્ધ જાહેર જાણકારી મુજબ તે કંપની વેરહાઉસ અને સ્ટોરેજ યુનિટ ઊભા કરવાની કામગીરી કરે છે. રૂપિયા 130.99 કરોડની શેર મૂડી સાથે 9 નવેમ્બર, 2000ના રોજ તે અનલિસ્ટેડ કંપની અસ્તિત્વમાં આવી હતી. તે રૂપિયા 129.99 કરોડ પેઇડ કેપિટલ ધરાવે છે. કંપનીએ વર્ષ 2022-23માં રૂપિયા 500 કરોડની આવક રળી હતી, પરંતુ નફા વિષે જાણકારી ઉપલબ્ધ નથી. કંપનીએ વર્ષ 2021-22માં રૂપિયા 360 કરોડના ચૂંટણી બોન્ડ ખરીદ્યા હતા. તે વર્ષમાં કંપનીનો કુલ નફો રૂપિયા 21.72 હતો. વર્ષ 2023-245માં કંપનીએ રાજકીય પક્ષોને દાન આપવા વધુ રૂપિયા 50 કરોડના ચૂંટણી બોન્ડ ખરીદ્યા હતા.
