સૌરાષ્ટ્રના રેલવે સ્ટેશનો હવે સોલાર વીજળી ઉત્પન્ન કરશે

રાજકોટ, જામનગર, સુરેન્દ્રનગર,ઓખા સહીતના મુખ્ય રેલ્વે સ્ટેશનના છાપરા ઉપર સોલાર પેનલો લગાવી

કેન્દ્ર સરકાર અને રાજય સરકાર દ્વારા કુદરતી સુર્ય પ્રકાશમાથી વિજળી ઉત્પન્ન કરવા માટે વધારેમાં વધારે પ્રોત્સાહન આપવામાં આવી રહ્યું છે ત્યારે રાજકોટ રેલવે ડિવિઝન દ્વારા રાજકોટ, જામનગર, સુરેન્દ્રનગર,ઓખા સહીતના મુખ્ય રેલ્વે સ્ટેશનના છાપરા ઉપર સોલાર પેનલો લગાવી અને વીજળી ઉત્પન્ન કરવામાં આવી રહી છે.

રાજકોટ રેલવે ડિવિઝનમાં આવતાં વિવિધ સ્ટેશન પર સોલાર પાવર પ્લાન્ટ લગાવી પર્યાવરણ સંરક્ષણ મુદ્દે પ્રતિબદ્ધતા દાખવીને એક વર્ષમાં રૂ.27.18 લાખની ઊર્જા બિલમાં બચત કરી છે. રાજકોટ ડિવિઝનલ રેલવે મેનેજર અશ્વનીકુમાર, સિનિયર ડિવિઝનલ ઇલેક્ટ્રિકલ ઇજનેર રજની યાદવ દ્વારા પ્રદૂષણ અટકાવવા અને કાર્બન ઉત્સર્જન ઘટાડવાની દિશામાં કામ શરૂ કર્યું હતું. જે કામગીરી દરમિયાન રાજકોટ ડિવિઝનમાં આવતા વિવિધ 18 રેલવે સ્ટેશન અને રેલવે ઓફિસની 7 બિલ્ડિંગમાં કુલ 519 કિલોવોટ ક્ષમતાના સોલાર પ્લાન્ટ લગાવવામાં આવ્યા હતા. સોલાર પ્લાન્ટથી મોટા-નાના સ્ટેશન પરના લાઇટ, પંખા, કમ્પ્યૂટર, વિસ્તારોમાં સ્ટ્રીટલાઇટ ચલાવવાનું ચાલુ કર્યું હતું.

જેને કારણે ગત વર્ષ એટલે કે 2023-24ના વર્ષમાં આ સૌર પ્લાન્ટસ દ્વારા કુલ 4,54,989 યુનિટ (કિલોવોટ) ગ્રીન એનર્જી ઉત્પન્ન થતાં રાજકોટ રેલવે ડિવિઝનને કુલ રૂ.27.18 લાખની બચત થઇ છે. આમ સોલાર પાવર પ્લાન્ટથી વીજબિલમાં મોટો તફાવત આવતા આગામી દિવસોમાં રાજકોટ ડિવિઝનના નાના સ્ટેશન પર પણ સોલાર પાવર પ્લાન્ટ લગાવી ગ્રીન અને સ્વચ્છ રેલવેની દિશામાં કામગરી કરવામાં આવશે.

આ ઉપરાંત અમૃત ભારત પ્રોજેક્ટ હેઠળ રાજકોટ ડિવિઝનના 15 સ્ટેશન પર વીજળી વિભાગને લગતા કામો હાલ ચાલી રહ્યા છે. જેમાં મુખ્યત્વે પ્રકાશની તીવ્રતા વધારવા, વેઇટિંગ હોલમાં એરકન્ડિશનરની જોગવાઇ, લિફ્ટ જોગવાઇ વગેરેનો સમાવેશ થાય છે. સોલાર પાવર પ્લાન્ટની તમામ કામગીરી પૂર્ણ થયા બાદ તે કાર્યરત થતાં રાજકોટ ડિવિઝનમાં ઊર્જા બિલમાં વધુ બચત થશે.

જ્યારે રાજકોટ રેલવે ડિવિઝન સૂત્રના જણાવ્યા મુજબ, રાજકોટ જંક્શન અને કોઠી કમ્પાઉન્ડમાં આવેલી રેલવેની વિવિધ કચેરીઓમાં પણ સોલાર પ્લાન્ટ લગાડવામાં આવ્યા છે. ત્યારે હેડ ક્વાર્ટર રાજકોટે જ એક વર્ષમાં 2,43,697 કિલોવોટ ઊર્જા ઉત્પન્ન કરી રૂ.12,74,117ની ઊર્જા બિલમાં બચત કરી છે.

સોલર પેનલ લગાવેલ રેલવે સ્ટેશન

18 સ્ટેશનો : જામનગર, લાખાબાવળ, ઓખા, પીપલી, રાજકોટ, ખંડેરી, બજરંગપુરા, કણકોટ, હાપા સ્ટેશન, દિગસર સ્ટેશન, મૂળી રોડ સ્ટેશન, દલડી સ્ટેશન, વાંકાનેર સ્ટેશન, ઘોરાણા સ્ટેશન, વાગડિયા સ્ટેશન, લાખામાચી સ્ટેશન, લુણસરિયા સ્ટેશન, થાન સ્ટેશનનો સમાવેશ થાય છે. જ્યારે ઓફિસ અને સર્વિસ બિલ્ડીંગમાં DRM ઑફિસ બિલ્ડિંગ, જૂની DRM ઑફિસ, રેલવે હોસ્પિટલ રાજકોટ ભાગ 1-2 , એકાઉન્ટ ઑફિસ, હાપા યાર્ડ ઑફિસ, તાલીમ શાળાનો સમાવેશ થાય છે.