- જયપુરના આલ્બર્ટ હોલમાં શપથગ્રહણ કાર્યક્રમ યોજાશે
- વડા પ્રધાન નરેન્દ્ર મોદી, ગૃહ પ્રધાન અમિત શાહ હાજર રહેશે
- ભાજપના રાષ્ટ્રીય અધ્યક્ષ જેપી નડ્ડા, ભાજપ શાસિત રાજ્યોના મુખ્ય પ્રધાનો ઉપસ્થિત રહેશે
રાજસ્થાનમાં આજે ભજનલાલ શર્મા મુખ્યમંત્રી તરીકે શપથ લેશે. તેમની સાથે બે ડેપ્યુટી સીએમ દિયા કુમારી અને પ્રેમચંદ બૈરવા પણ શપથ લેશે. રાજ્યપાલ કલરાજ મિશ્રા ત્રણેયને શપથ લેવડાવશે. જયપુરના આલ્બર્ટ હોલમાં શપથગ્રહણ કાર્યક્રમ યોજાશે. તેમાં વડા પ્રધાન નરેન્દ્ર મોદી, ગૃહ પ્રધાન અમિત શાહ, ભાજપના રાષ્ટ્રીય અધ્યક્ષ જેપી નડ્ડા, ભાજપ શાસિત રાજ્યોના મુખ્ય પ્રધાનો, નાયબ મુખ્ય પ્રધાનો અને ઘણા કેન્દ્રીય પ્રધાનો સામેલ થશે. શપથ ગ્રહણ સમારોહની તૈયારીઓ પૂર્ણ કરી લેવામાં આવી છે. સુરક્ષાની પણ કડક વ્યવસ્થા કરવામાં આવી છે. આલ્બર્ટ હોલ તરફ જતા તમામ રસ્તાઓને પોસ્ટરો અને બેનરોથી શણગારવામાં આવ્યા છે. દરેક જગ્યાએ ભાજપના નેતાઓના કટઆઉટ દેખાઈ રહ્યા છે.
રાજસ્થાનમાં ભાજપને 115 બેઠકો મળી છે
રાજસ્થાનમાં ભાજપને 115 બેઠકો મળી છે. જ્યારે કોંગ્રેસને 69 બેઠકો મળી હતી. રાજ્યની 200માંથી 199 બેઠકો પર મતદાન થયું હતું. એક બેઠક પર ઉમેદવારના અવસાનને કારણે ચૂંટણી મોકૂફ રાખવામાં આવી હતી. ભજનલાલ પહેલીવાર ધારાસભ્ય બન્યા છે. મંગળવારે પક્ષના કેન્દ્રીય નિરીક્ષકો રાજનાથ સિંહ, સરોજ પાંડે અને વિનોદ તાવડેની હાજરીમાં ભાજપ વિધાનસભ્ય દળની બેઠકમાં તેમને મુખ્ય પ્રધાન-નિયુક્ત જાહેર કરવામાં આવ્યા હતા. વસુંધરા રાજેએ ધારાસભ્ય દળના નેતા તરીકે તેમના નામનો પ્રસ્તાવ મૂક્યો હતો. જ્યારે, દિયા કુમારી વિદ્યાનગરથી ધારાસભ્ય છે. જ્યારે બૈરવા ડુડુ બેઠક પરથી ધારાસભ્ય છે. અજમેર ઉત્તરના ધારાસભ્ય વાસુદેવ દેવનાનીને સ્પીકર બનાવવામાં આવ્યા છે.
કોંગ્રેસને 69 બેઠકો મળી હતી
દિયા કુમારીએ 2019ની લોકસભા ચૂંટણીમાં રાજસમંદથી ચૂંટણી જીતી હતી. તેમણે 5.51 લાખથી વધુ મતોથી ચૂંટણી જીતી હતી. દિયા કુમારી જયપુરના રાજવી પરિવારમાંથી છે. તેમણે 2013માં રાજકારણમાં પ્રવેશ કર્યો હતો. તે બે વખત ધારાસભ્ય અને એક વખત સાંસદ પણ છે. વસુંધરા રાજે, દિયા કુમારી, ગજેન્દ્ર શેખાવત, બાબા બાલકનાથ, રાજવર્ધન રાઠોડ પણ સીએમની રેસમાં હતા. પરંતુ ભાજપ હાઈકમાન્ડે સૌને ચોંકાવી દીધા અને ભજનલાલની પસંદગી કરી.
રાજસ્થાનના ડેપ્યુટી સીએમ-નિયુક્ત ડૉ પ્રેમ ચંદ બૈરવા આજે શપથ ગ્રહણ સમારોહ પહેલા જયપુરના મોતી ડુંગરી ગણેશ મંદિરમાં પ્રાર્થના કરી હતી.
રાજસ્થાનના ડેપ્યુટી સીએમ-નિયુક્ત ડૉ. પ્રેમચંદ બૈરવા કહે છે, “…મને ક્યારેય ટિકિટની અપેક્ષા નહોતી કે આ પદ માટે. પાર્ટી મને જે પણ જવાબદારી આપે છે, તે હું પૂરી ઈમાનદારીથી નિભાવું છું. છેલ્લા પાંચ વર્ષમાં કોંગ્રેસના શાસનમાં , રાજસ્થાન પાછળ ચાલ્યું ગયું છે… તેઓએ રાજસ્થાનના લોકોને છેતર્યા છે…”
