આ સિઝનમાં ઇન્ડિયન પ્રીમિયર લીગના પ્લેઓફમાં સ્થાન મેળવવાની રાજસ્થાન રોયલ્સની આશાઓ ખતમ થઈ ગઈ છે. પરંતુ તેમના ફિલ્ડિંગ કોચ દિશાંત યાજ્ઞિકે જણાવ્યું હતું કે મેગા ઓક્શન પહેલા જોસ બટલર અને ટ્રેન્ટ બોલ્ટ જેવા સુપરસ્ટારને રિલીઝ કરવાની ટીકા છતાં તેમની ટીમ યુવાનોને ટેકો આપવાનું ચાલુ રાખશે. રાજસ્થાન રોયલ્સ 11 મેચોમાં ફક્ત છ પોઈન્ટ ધરાવે છે અને પોઈન્ટ ટેબલમાં આઠમાં સ્થાને છે. ગુરુવારે અહીં મુંબઈ ઈન્ડિયન્સે તેમને 100 રનથી હરાવ્યું હતુ.
RRમાં યુવા ખેલાડીઓ
રોયલ્સ પાસે તેમની ટીમમાં ઘણા યુવા ખેલાડીઓ છે. જેમાં 14 વર્ષીય વૈભવ સૂર્યવંશી, સૌથી યુવા IPL સેન્ચુરી કરનાર, અને ઓપનર યશસ્વી જયસ્વાલનો સમાવેશ થાય છે. પરંતુ તેમને ઇંગ્લેન્ડના ભૂતપૂર્વ મર્યાદિત ઓવરના કેપ્ટન બટલર અને ન્યુઝીલેન્ડના ઝડપી બોલર બોલ્ટની ખોટ સાલતી હોય છે. જ્યારે યાજ્ઞિકને ગયા વર્ષની ટીમ અને આ વર્ષની ટીમ વચ્ચેના તફાવત વિશે પૂછવામાં આવ્યું ત્યારે તેમણે કહ્યું, “સ્ટાર ખેલાડીઓ વિશેના તમારા પ્રશ્નમાં એક મોટો મુદ્દો છે. જ્યારે પણ કોઈ નવો ખેલાડી આવે છે. ત્યારે તે સ્ટાર નથી હોતો પરંતુ તેને સ્ટાર બનાવી દેવામાં આવે છે.” મેચ પછી તેમણે પત્રકારોને જણાવ્યું, “ગયા વર્ષે અમારી પાસે જે ખેલાડીઓ હતા, જ્યારે તેઓ ટીમમાં આવ્યા, ત્યારે તેઓ સ્ટાર નહોતા, પરંતુ તેઓ સ્ટાર બની ગયા અને હવે જે ખેલાડીઓ અમારી ટીમમાં છે, અમે તેમને સ્ટાર બનાવીશું. અમે સુપરસ્ટાર ખરીદતા નથી, અમે સુપરસ્ટાર બનાવીએ છીએ અને તે અમારું મુખ્ય લક્ષ્ય છે.” ગયા વર્ષે, રોયલ્સે 14 મેચમાંથી 17 પોઈન્ટ સાથે ટેબલમાં ત્રીજા સ્થાને રહીને પ્લેઓફમાં જગ્યા બનાવી હતી. મુંબઈ ઈન્ડિયન્સ સામે, ઓપનર સૂર્યવંશી પોતાનું ખાતું પણ ખોલી શક્યો ન હતો જ્યારે જયસ્વાલે 13 રન બનાવ્યા હતા. 218 રનનો પીછો કરતી વખતે રોયલ્સ 117 રનમાં ઓલઆઉટ થઈ ગઈ.
સ્ટાર ખેલાડી બનાવવામાં આવે છેઃ દિક્ષાંત યાજ્ઞિક
દિક્ષાંત યાજ્ઞિકે કહ્યું, “વૈભવ સૂર્યવંશીને જુઓ, જ્યારે તે બેટિંગ કરી રહ્યો હતો ત્યારે બધા ખુશ હતા. દર્શકો ખુશ હતા અને અમને વિશ્વાસ છે કે આવનારા સમયમાં આ ખેલાડીઓ સ્ટાર બનશે.” તેમણે કહ્યું, “આનાથી આગળ વિચારવાનો સમય આવી ગયો છે. જ્યારે તમારી પાસે સ્ટાર ખેલાડી ન હોય, ત્યારે તમારે તેને ભૂલીને આગળ વધવું પડશે. અમારી પાસે વૈભવ, યશસ્વી જયસ્વાલ છે. સંજુ સેમસન અમારા કેપ્ટન છે. અમે આ ટીમ સાથે આગળ વધીશું અને અમે જીતીશું.” દરમિયાન, મુંબઈ ઈન્ડિયન્સના ફાસ્ટ બોલર દીપક ચહરે સ્વીકાર્યું કે જસપ્રીત બુમરાહ અને ટ્રેન્ટ બોલ્ટ જેવા વર્લ્ડ ક્લાસ બોલરો સાથે બોલિંગ કરવાથી તેમનું કામ સરળ બને છે. તેમણે કહ્યું, “જ્યારે તમે વિશ્વ કક્ષાના બોલરો સાથે બોલિંગ કરો છો. ત્યારે તમારા માટે કામ સરળ બની જાય છે. આંતરરાષ્ટ્રીય ક્રિકેટ અને IPLમાં સારું પ્રદર્શન કરનારા વિશ્વ કક્ષાના બોલરો સાથે બોલિંગ કરવાથી મને મદદ મળી રહી છે અને જ્યારે તમે એક યુનિટ તરીકે બોલિંગ કરો છો, ત્યારે બીજી ટીમ માટે પણ તે મુશ્કેલ બની જાય છે.”
