રાજકોટમાં ૨૨મી ફેબ્રુઆરીથી ઓપન ગુજરાત ડે-નાઇટ ફૂટબોલ ટુર્નામેન્ટ

સિટી પોલીસ અને જયોતિ સીએનસીનું આયોજન

રાજકોટમાં ૨૨મી ફેબ્રુઆરીથી ઓપન ગુજરાત ડે-નાઇટ ફૂટબોલ ટુર્નામેન્ટ

ટુર્નામેન્ટમાં સમગ્ર ગુજરાતમાંથી ૨૪ ટીમો ભાગ લેશે

અગ્ર ગુજરાત, રાજકોટ

રાજકોટ સિટી પોલીસ અને એહસાસ ટ્રસ્ટ દ્વારા રાજકોટની કંપની જ્યોતિ સી.એન.સી.ના સહયોગથી ૧૪મી ઓપન ગુજરાત ફૂટબોલ ડે એન્ડ નાઈટ ટુર્નામેન્ટનું આયોજન તા. ૨૨ ફેબ્રુઆરીથી ૧ માર્ચ ૨૦૨૬ દરમ્યાન રેસકોર્સ રીંગ રોડ સ્થિત આર.એમ.સી. ફૂટબોલ ગ્રાઉન્ડ ખાતે કરવામાં આવી રહ્યું છે.

આ ટુર્નામેન્ટના મુખ્ય દાતા જ્યોતિ સી.એન.સી. ઓટોમેશન લિમિટેડના સી.એસ.આર. હેડ તથા એહસાસ ટ્રસ્ટના લાઈફ પ્રેસિડન્ટ કૌશિકભાઈ સોલંકી દ્વારા જણાવ્યા મુજબ, છેલ્લા ૧૪ વર્ષથી નિયમિતપણે યોજાતી રાજકોટ સીટી પોલીસ અને જ્યોતિ સી.એન.સી. ચેલેન્જ કપ ૨૦૨૬ ફૂટબોલ ટુર્નામેન્ટ ગુજરાત ફૂટબોલ એસોસિએશન તથા રાજકોટ ફૂટબોલ એસોસિએશનની માન્યતા પ્રાપ્ત ટુર્નામેન્ટ છે. આ ડે એન્ડ નાઈટ ટુર્નામેન્ટમાં ગુજરાતભરમાંથી કુલ ૨૪ ટીમો ભાગ લેશે. ભાગ લેનાર તમામ ખેલાડીઓ માટે આયોજકો દ્વારા નિઃશુલ્ક રહેવાની સુવિધા ઉપલબ્ધ કરાવવામાં આવી છે. ઉપરાંત દર્શકો માટે રેસકોર્સ ફૂટબોલ ગ્રાઉન્ડ ખાતે લાઈટિંગ અને બેઠક વ્યવસ્થા પણ સુચારુ રીતે કરવામાં આવી છે. ટુર્નામેન્ટમાં ગુજરાત ફૂટબોલ એસોસિએશન દ્વારા માન્યતા પ્રાપ્ત રેફરીઓ ફરજ નિભાવશે તેમજ અનુભવી અને પૂર્વ રમતવીરો દ્વારા મેચનું સંચાલન કરવામાં આવશે.

આ સ્પર્ધામાં વિજેતા ચેમ્પિયન ટીમને રૂ.૧,૦૧,૦૦૦ રોકડ ઇનામ, રનર્સ-અપ ટીમને રૂ.૫૧,૦૦૦ તથા ત્રીજા અને ચોથા ક્રમે આવનાર ટીમને રૂ.૭,૦૦૦-રૂ.૭,૦૦૦ અને મેન ઓફ ધ મેચ ને ૧૧,૫૦૦ નું ઇનામ આપવામાં આવશે. ઉપરાંત દરેક મેચમાં શ્રેષ્ઠ પ્રદર્શન કરનાર ખેલાડી વિવિધ શ્રેણી મુજબ બેસ્ટ પ્લેયર, બેસ્ટ ગોલકીપર, બેસ્ટ ડિફેન્ડર, બેસ્ટ મિડફિલ્ડર, બેસ્ટ ફોરવર્ડ અને હાઈએસ્ટ સ્કોરર માટે રૂ.૩,૦૦૦- ૩,૦૦૦ રોકડ ઇનામ સાથે ટ્રોફી એનાયત કરવામાં આવશે. ગત વર્ષોની જેમ આ વર્ષે પણ જ્યોતિ સી.એન.સી. ઓટોમેશન લિમિટેડ મુખ્ય સ્પોન્સર તરીકે જોડાઈ છે, જ્યારે સહ-સ્પોન્સર તરીકે ઓમનીટેક એન્જિનિયરિંગ પ્રા. લી.નો સહયોગ મળ્યો છે. ઉપરાંત રોલેક્સ રીંગ્સ, પેલિકન ઇન્ડસ્ટ્રીઝ, ઓરબિટ બેરિંગ્સ ઇન્ડિયા પ્રા.લી., AVR (વિક્રમ) વાલ્વસ પ્રા. લી. સહિત અન્ય કંપનીઓ તરફથી ઉદાર આર્થિક સહયોગ પ્રાપ્ત થયો છે. તદુપરાંત આ આયોજનમાં રવિ ટેકનોફોર્જ પ્રા. લી. શાપર, એન્જલ પંપ્સ પ્રા. લી મેટોડા અને મીરા કાસ્ટીંગ લોઠડાનો સહયોગ પ્રાપ્ત થયો છે.

આ સમગ્ર ફૂટબોલ ટુર્નામેન્ટના સફળ આયોજન માટે ક્રાઈમ બ્રાન્ચના ડી.સી.પી. જગદિશ બાંગરવા, જ્યોતિ સી.એન.સી.ના વિક્રમસિંહ રાણા,  કૌશિકભાઈ સોલંકી, રાજકોટ ફૂટબોલ એસોસિએશનના બી. કે. જાડેજા તથા રોહિતભાઈ બુંદેલા, અહેસાસ ટ્રસ્ટના નિશ્ચલભાઈ સંઘવી, કૂ. કિન્નરીબેન પટેલ તેમજ ડિસોઝા સાહેબ, રાજુભાઈ અને જયેશભાઈ કનોજીયાના માર્ગદર્શન હેઠળ પોલીસ વિભાગ, એહસાસ ટ્રસ્ટની ટીમ જહેમત ઉઠાવી રહી છે.