નોટરીની ૧૪૨ ખાલી જગ્યાઓ પર સત્વરે ‘વેઇટિંગ લિસ્ટ’ જાહેર કરવા માંગ
અગ્ર ગુજરાત, રાજકોટ
ગુજરાત સરકારના કાયદા વિભાગ દ્વારા તાજેતરમાં હાથ ધરવામાં આવેલી ૧૬૬૦ નોટરીઓની નિમણૂંક પ્રક્રિયામાં સર્જાયેલી વિસંગતતાઓ અને બાકી રહેલી ૧૪૨ જગ્યાઓ બાબતે રાજકોટના અગ્રણી એડવોકેટ અને નોટરી પબ્લિક ભરતકુમાર આર. પરમાર દ્વારા મુખ્યમંત્રી ભૂપેન્દ્રભાઈ પટેલને લેખિત રજૂઆત કરવામાં આવી છે.
સરકાર દ્વારા કુલ ૧૬૬૦ જગ્યાઓ જાહેર કરાઈ હતી, જેમાંથી ૧૫૧૮ ઉમેદવારોની નિમણૂંક થઈ ચૂકી છે, પરંતુ ૧૪૨ જગ્યાઓ હજુ પણ વહીવટી કારણોસર ખાલી છે. આ ૧૪૨ જગ્યાઓ ભરવા બાબતે કાયદા વિભાગ દ્વારા કોઈ સત્તાવાર સ્પષ્ટતા કે જાહેરાત કરવામાં ન આવતા લાયક ઉમેદવારોમાં ભારે રોષ અને ચિંતા પ્રવર્તી રહી છે.
અગાઉ ભારત સરકાર દ્વારા થયેલી ૮૫૮૬ નોટરીઓની નિમણૂંકમાં સ્થાન પામેલા અનેક ઉમેદવારોને ગુજરાત સરકાર દ્વારા ફરીથી નિમણૂંક આપવામાં આવી છે. આમ, એક જ ઉમેદવાર પાસે બે હોદ્દા હોવાથી અન્ય લાયક એડવોકેટ્સને અન્યાય થઈ રહ્યો છે. ‘એક વ્યક્તિ, એક હોદ્દો’ ના સિદ્ધાંતને અનુસરીને, બેવડી નિમણૂંકો રદ કરી તાત્કાલિક અસરથી ‘પ્રતીક્ષા યાદી’ (Waiting List) જાહેર કરવામાં આવે તેવી માંગ શ્રી ભરતકુમાર પરમારે કરી છે.
ભરતકુમાર આર. પરમારે મુખ્યમંત્રીને વિનંતી કરી છે કે, રાજ્યના લાયક અને વર્ષોથી પ્રેક્ટિસ કરતા વકીલ મિત્રોના હિતમાં આ ૧૪૨ ખાલી જગ્યાઓ અંગે સત્વરે વહીવટી પ્રક્રિયા પૂર્ણ કરી વેઇટિંગ લિસ્ટ જાહેર કરવામાં આવે. આ બાબતે કાયદાવિભાગને પણ યોગ્ય ભલામણ કરવા રજૂઆત કરવામાં આવી છે.
