રાજકોટ સહિતના સિનેમાઘરોમાં ફરી એક વખત જોવા મળશે મર્ડર મિસ્ટ્રી

રાજકોટ સહિતના સિનેમાઘરોમાં ફરી એક વખત જોવા મળશે મર્ડર મિસ્ટ્રી

બ્રિજેશ બૌધ્ધ અને શાહિદ અલી દ્વારા ડિરેકટ થયેલી ફિલ્મ બ્લેક બર્થ-ડે શુક્રવારે રિલીઝ થશે

આર્જવ ત્રિવેદી, યોગીતા પટેલ, ધ્રુવી સોની સહિતના કલાકારો દર્શકોને જકડી રાખશે

‘અગ્ર ગુજરાત’ની મુલાકાતે આવેલા નિર્માતા અને કલાકારો

અગ્ર ગુજરાત, રાજકોટ

છેલ્લા એક દસકામાં ગુજરાતી સિનેમાએ પોતાની એક અલગ જગ્યા બનાવી છે. ગુજરાતી દર્શકોને માતૃભાષાની ફિલ્મોએ આકર્ષયા છે અને હજુ પણ ગુજરાતી ભાષાની ફિલ્મોને સફળતા મળશે તેવો વિશ્વાસ ‘અગ્ર ગુજરાત’ની મુલાકાતે આવેલા ફિલ્મ બ્લેક બર્થ-ડેના કલાકારોએ વ્યકત કર્યો હતો.

તા.૧3મીને શુક્રવારે રાજકોટ સહિત રાજયભરના સિનેમા ઘરોમાં બ્રિજેશ બૌધ્ધ અને શાહિદ અલી દ્વારા લખાયેલી અને ડિરેકટ કરાયેલી ફિલ્મ બ્લેક બર્થ-ડે રિલીઝ કરવામાં આવશે. આ ફિલ્મમાં મુખ્ય ભૂમિકામાં છેલ્લા દિવસ ફેઇમ આર્જવ ત્રિવેદી મુખ્ય ભૂમિકામાં જોવા મળશે. તેની સાથે યોગીતા પટેલ, ધ્રુવી સોની સહિત પાંચ કિરદારો પર આ ફિલ્મનું નિર્માણ કરવામાં આવ્યું છે.

‘અગ્ર ગુજરાત’ની મુલાકાતે આવેલા ફિલ્મના કલાકાર આર્જવ ત્રિવેદીએ જણાવ્યું હતું કે આ પિકચર મર્ડર મિસ્ત્રી પર બનાવવામાં આવેલું છે. જેમાં પાંચ મિત્રોની કહાનીને દર્શાવવામાં આવી છે. જેમાં મિત્રના જન્મ દિવસ પર એક રહસ્યમય હત્યા થાય છે અને ત્યાંથી આ ફિલ્મની ઓરીજનલ કહાની શરૂ થવાની છે. આ ફિલ્મમાં હાસ્ય, લવસ્ટોરી, સસ્પેન્સ સહિતના ટ્રાયએંગલનો સમન્વય જોવા મળી રહ્યો છે. જે દર્શકોને પીકચરના અંત સુધી ખુરશી પર જકડી રાખશે.

વધુમાં જણાવ્યું હતું કે આ પિકચરમાં નિખીલ નામના યુવાનનું પાત્ર ભજવવામાં આવ્યું છે. આ પાત્ર ફિલ્મના કિરદારમાં મહત્વનું માનવામાં આવે છે. જો કે દરેક પાત્ર ફિલ્મમાં મહત્વના છે. પરંતુ નિખીલના પાત્રને મજબૂત રીતે નિભાવવામાં આવ્યું છે. ફિલ્મ શુક્રવારે રિલીઝ થશે અને આ ફિલ્મ સારી એવી લોકોમાં ચાહના મેળવશે તેવો વિશ્વાસ વ્યકત કર્યો હતો.

ફિલ્મની અભિનેત્રી યોગીતા પટેલે જણાવ્યું હતું કે બ્લેક બર્થ-ડે ફિલ્મમાં મારા પાત્રને એકદમ સરળ વ્યકિતત્વવાળુ દર્શાવવામાં આવ્યું છે. જે એકદમ શાંત અને સરળ સ્વભાવનું છે. આ ફિલ્મમાં રોમાન્સ સહિત લોકોને મર્ડર મિસ્ટ્રી અંગે પણ જકડી રાખવામાં આવશે. ફિલ્મની કહાની વર્તમાનના મુદ્દાઓને સ્પર્શતી આવતી હોવાના કારણે લોકોને ફિલ્મ પસંદ પડશે.

અભિનેત્રી ધ્રુવી સોનીએ પોતાના પાત્ર વિશે જણાવ્યું હતું કે આ ફિલ્મમાં મને મોટા ઘરની દિકરી બતાવવામાં આવી છે. જેના પિતા પાસે પુષ્કળ ધન છે. એકદમ જીદ્દી પ્રકારનું પાત્ર છે. જોઇએ તે જોઇએ જ તેવો સ્વભાવ આ પિકચરમાં મારો દર્શાવવામાં આવ્યો છે.

નિર્માતા બ્રિજેશ બૌધ્ધ અને શાહિદ અલીએ જણાવ્યું હતું કે આ પ્રકારની ફિલ્મ બનાવવી તે નક્કી હતું નહી. પરંતુ એક ટાસ્ક મળ્યો હતો. આ ટાસ્કના આધારે ફિલ્મમાં એક શબ્દ ઉમેરવામાં આવ્યો છે. ફિલ્મમાં પ્રથમ હેપ્પી બર્થ-ડે ટાઇટલ રાખવાનું હતું. પરંતુ અગાઉ તેનું રજીસ્ટ્રેશન થયું હોવાથી આ ટાઇટલ મળ્યું હતું નહી. જેના કારણે ફિલ્મનું ટાઇટલ બ્લેક બર્થ-ડે રાખવામાં આવ્યું છે. આ પિકચર શુક્રવારે રિલીઝ કરવામાં આવશે અને તે દર્શકોને ચોક્કસથી મનોરંજન પુરૂ પાડશે.

ગુજરાતી હોવાના નાતે માતૃભાષાની પિકચર જોવી જોઇએ : આર્જવ ત્રિવેદી

આપણે ગુજરાતમાં જન્મયા છીએ અને ગુજરાતી છીએ. એક ગુજરાતી હોવાના નાતે માતૃભાષાની પિકચરો જોવી જોઇએ. ગુજરાતી પિકચરનો ડ્રાફટ છેલ્લા ઘણા સમયથી ઉંચો આવ્યો છે. જે તાજેતરમાં રિલીઝ થયેલી ફિલ્મ ‘લાલો-કૃષ્ણ સદા સહાયતે’એ સાબિત કર્યુ છે. આ પિકચરે સમાજને માણસ બનવાનો પણ સંદેશો આપ્યો છે. ધર્મ કોઇપણ હોય પરંતુ દરેકે માનવતાને પ્રાધાન્ય આપવું જોઇએ. વર્તમાન સમયની પરિસ્થિતિને જોતાં સમાજે તેનો સ્વીકાર કરવો જોઇએ.

દિકરીઓને પૂરતી તક મળવી જોઇએ : યોગીતા પટેલ

વર્તમાન પરિસ્થિતિમાં આજે પણ સમાજમાં ઘણા એવા રૂઢીગત રિવાજો ચાલ્યા આવે છે. જેના કારણે દિકરીઓને યોગ્ય પ્લેટફોર્મ મળતું નથી અને તેના કારણે તેનું ટેલેન્ટ ધરબાઇ જાય છે. ઘણા પરિવારોને કેટલાક ક્ષેત્રોથી એલર્જી હોવાના કારણે દિકરીઓને તે ફિલ્ડમાં મોકલતા નથી. તેમાં ફિલ્મ ઇન્ડસ્ટ્રીનો પણ સમાવેશ થાય છે. ત્યારે દિકરીને પોતાના ટેલેન્ટને સાબિત કરવાની તક મળવી જોઇએ. આજે ફિલ્મ ઇન્ડસ્ટ્રીઝ સહિત મોટા ભાગના ક્ષેત્રો દિકરીઓ માટે સુરક્ષીત થયા છે. આજના યુગમાં ધીરજ રાખવાની ખૂબ જરૂર છે. ધીરજ રાખવાથી ટેલેન્ટને યોગ્ય પ્લેટફોર્મ મળશે અને સફળતા પણ મળશે.