- નશાયુકત બિસ્કિટ ખવડાવી બેભાન કરી સોનાનો ચેન અને રોકડની તફડંચી કરી હતી
- હોટેલના સીસીટીવીમાં રૂમાલ બાંધેલો આરોપી નજરે પડતો હોવાથી ચૂડા પોલીસે વધુ તપાસ આદરી
- વેપારીને બેભાન કરી સોનાનો ચેન અને રોકડ સહિત રૂપીયા 57 હજારની મત્તાની ચોરી
મુળ જામનગરના વેપારી ગત તા. 17મી ઓકટોબરે રાત્રે રાજકોટથી પાલનપુર ટ્રાવેલ્સમાં જતા હતા. ત્યારે રાજકોટ-અમદાવાદ હાઈવે પર નવી મોરવાડ પાસે આવેલી આર.આર. હોટલે બસે હોલ્ટ કર્યો હતો. જેમાં બાજુમાં બેસેલા મુસાફરે નશાયુકત બિસ્કિટ ખવડાવી વેપારીને બેભાન કરી સોનાનો ચેન અને રોકડ સહિત રૂપીયા 57 હજારની મત્તાની ચોરી કરી હતી. હોટલના સીસીટીવીમાં આ વ્યકતી મોઢે રૂમાલ બાંધેલો નજરે પડયો હતો. ત્યારે પોલીસ હવે રાજકોટ તરફ તપાસને લંબાવી છે.
જામનગરના ગોકુલનગરમાં રહેતા 38 વર્ષીય હરીદાસ પુંજાભાઈ ખાણદર દવા-બીયારણનો વેપાર કરે છે. તા. 17ના રોજ સાંજે તેઓ રાજકોટથી પાલનપુર જવા માટે મહાસાગર ટ્રાવેલ્સમાં બેઠા હતા. રાતના સમયે બસે રાજકોટ-અમદાવાદ નેશનલ હાઈવે પર ચુડા તાલુકાના નવી મોરવાડ પાસે આવેલી આર.આર.હોટલમાં હોલ્ટ કર્યો હતો. આથી બધા મુસાફરો નીચે નાસ્તો-પાણી કરવા ઉતર્યા હતા. અને પરત બસમાં બેઠા હતા. આ સમયે હરીદાસભાઈની બાજુમાં બેસેલા મુસાફરે બિસ્કિટ ઓફર કર્યુ હતુ. આ બિસ્કિટ હરીદાસભાઈએ ખાધા બાદ તેઓ સુઈ ગયા હતા. વહેલી સવારે 6 કલાકે તેઓ પાલનપુર ઉતર્યા ત્યારે અર્ધબેભાન જેવી અવસ્થામાં હતા. ત્યારબાદ તેઓને પહેરેલ પોણા 2 તોલા વજનનો સોનાનો ચેન કિંમત રૂપીયા 49 હજાર અને ખીસ્સામાં રહેલ રોકડા રૂપીયા 8 હજાર ન હોવાની ખબર પડી હતી. આથી હરીદાસભાઈએ ચુડા પોલીસ મથકે અજાણ્યા મુસાફરે બેભાન કરી સોનાનો ચેન અને રોકડ સહિત રૂપીયા 57 હજારની મત્તાની ચોરી કર્યાની ફરિયાદ નોંધાવી હતી. તપાસકર્તા અધીકારી પીએસઆઈ એન.પી.મારૂએ જણાવ્યુ કે, બનાવ સ્થળ આર.આર.હોટલના સીસીટીવી ચેક કરતા આરોપી મોઢે બાંધેલો નજરે પડે છે. આથી તેની ઓળખ કરવા માટે જયાંથી મહાસાગર ટ્રાવેલ્સના કે તેની આસપાસના સીસીટીવી, મુસાફરોનું લીસ્ટ સહિતની વિગતો મેળવવા હવે રાજકોટ જઈને તપાસ કરવામાં આવશે. આ આરોપી આવી એમઓ ધરાવતો હોવાથી ખાસ કરીને અજાણ્યા વ્યકતીઓએ આપેલ બિસ્કિટ, વેફર કે કોલ્ડ્રીકસ લોકોને ન લેવા પણ અપીલ કરવામાં આવે છે.
