થોડા દિવસો પહેલા IPL ફાઇનલમાં RCBની જીત બાદ તેના ભૂતપૂર્વ માલિક વિજય માલ્યાના પુત્ર સિદ્ધાર્થ માલ્યાએ વિજયની ઉજવણી કરતો એક ભાવનાત્મક વીડિયો શેર કર્યો હતો. આમાં તે રડતો જોઈ શકાય છે. આ વીડિયો ઇન્સ્ટાગ્રામ પરથી હટાવી દેવામાં આવ્યો હતો. ત્યાર બાદ સિદ્ધાર્થ માલ્યાએ બીજો વીડિયો શેર કર્યો અને સમજાવ્યું કે પહેલાનો વીડિયો કેમ હટાવવામાં આવ્યો હતો.
સિદ્ધાર્થ રસ્તા પર ચાલતી વખતે વીડિયો બનાવતો જોવા મળ્યો
9 જૂનના રોજ સિદ્ધાર્થ માલ્યાએ પોતાના ઓફિશિયલ ઇન્સ્ટાગ્રામ હેન્ડલ @sidmallya પરથી એક વીડિયો શેર કર્યો હતો. આ વીડિયોમાં તે રસ્તા પર ચાલતો જોવા મળી રહ્યો છે. વીડિયોનું કેપ્શન છે કે, IPLએ મારો વીડિયો કાઢી નાખ્યો હતો. વીડિયો શરૂ થતાં જ સિદ્ધાર્થ તેના ફોલોઅર્સને હેલો ગાય્ઝ કહે છે. પછી તે સમજાવે છે કે ઇન્સ્ટાગ્રામે તેનો વિડીયો કેમ ડિલીટ કર્યો હતો. તેણે કહ્યું કે તમારામાંથી ઘણા લોકોએ મારો ભાવનાત્મક વિડીયો જોયો હશે જે મેં મંગળવારે પોસ્ટ કર્યો હતો. જેના દ્વારા મેં મારા ફેન્સ અને ફોલોઅર્સ સાથે વાત કરી હતી. ઘણા લોકોએ તે વિડીયો પર ટિપ્પણી કરી હતી.
IPLએ કોપીરાઈટ ઉલ્લંઘનની ફરિયાદ કરી
તે વીડિયો ઇન્સ્ટાગ્રામ દ્વારા દૂર કરવામાં આવ્યો હતો અને મને તેમના પ્લેટફોર્મ પર થોડા દિવસો માટે પ્રતિબંધિત પણ કરવામાં આવ્યો હતો. 8 જૂનના રોજ ઇન્સ્ટાગ્રામે પ્રતિબંધ ઉઠાવી લીધો અને હવે હું આ વિડીયો ફરીથી પોસ્ટ કરી રહ્યો છું. IPL એ મારી તે પોસ્ટ અંગે કોપીરાઈટ ઉલ્લંઘનની ફરિયાદ કરી હતી. ત્યાર બાદ આ કાર્યવાહી કરવામાં આવી અને મારો વીડિયો ઈન્સ્ટાગ્રામ પરથી દૂર કરવામાં આવ્યો હતો.
મને ખૂબ જ દુઃખ છે કે વીડિયો ડિલીટ થયો
IPLએ કોપીરાઈટ નીતિના ઉલ્લંઘન વિશે વાત કરી હતી પરંતુ તે વીડિયો એક મિનિટથી પણ ઓછો લાંબો હતો. તેમાં મેચ સાથે સંબંધિત કંઈ નહોતું તેના બદલે મેં તે વીડિયો મારી લાગણીઓ વ્યક્ત કરવા માટે બનાવ્યો હતો. મને આ બધું ખૂબ જ પાગલ લાગ્યું કારણ કે તે વીડિયો કાઢી નાખવી એ મારા માટે એક તક ગુમાવવા જેવું હતું.
આ સિવાય બધા RCB ફેનની જેમ હું પણ 18 વર્ષથી આ ક્ષણની રાહ જોઈ રહ્યો હતો. મને પણ આ જીતથી સૌથી વધુ ખુશી થઈ. આ ઘટનાથી હું ખૂબ જ દુઃખી છું. મને ખાસ કરીને IPLના વલણથી દુઃખ થયું છે કે તેમની ફરિયાદને કારણે મારો ભાવનાત્મક વીડિયો ઇન્સ્ટાગ્રામ દ્વારા દૂર કરવામાં આવ્યો.સિદ્ધાર્થ માલ્યાના આ વીડિયો પર લોકોએ મિશ્ર પ્રતિક્રિયાઓ આપી છે. કેટલાક યુઝર્સે તેમને ટ્રોલ કર્યા છે તો કેટલાક લોકોએ ફરીથી તેમને અને તેમના પિતા વિજય માલ્યાને બેંગ્લોર પાછા ફરવાની સલાહ આપી છે.
